Nakadaog Siya sa Ganti

“UTANG ko kini kaninyong tanan,” misulat si Kiyoe, usa ka hayskul senyor, ngadto sa sangang-buhatan sa Watch Tower Society sa Hapon. Alang sa unsa ba siya nagpasalamat ug dako? Si Kiyoe nakadaog karong bag-o sa kinatas-ang ganti sa usa ka nasodnong bangga sa komposisyon o panulat, nga gipasiugda sa Asosasyon sa Pagkaluwas sa Trapiko sa Hapon. Ang bililhong ganti naglakip sa usa ka biyahe ngadto sa Sweden.

Si Kiyoe misulat sa pagpahayag sa iyang pagpabili alang sa daghang nindot nga mga basahon nga gipatik sa Watch Tower Bible and Tract Society, nga gibati niyang nakatabang ug dako kaniya sa paglampos. Gawas sa maong bangga, siya ang mihawas sa iyang eskuylahan diha sa daghang mga bangga sa diskurso ug komposisyon. “Sa kadaghanan sa maong mga bangga,” matud niya, “ihatag ang usa ka tema, ug ang mga estudyante magdukiduki alang sa ilang mga komposisyon diha sa usa ka librarya. Hinunoa, dili kinahanglang agian ko kanang tanan nga kalisdanan. Makaplagan ko ang talagsaong materyal diha sa estante sa mga libro sa balay!” Mipadayon siya: “Bisan unsa ang tema, kon kaha mga suliran sa katigulangon, silinganan, internasyonal nga mga kalabotan, o pagpauswag sa kaugalingon, sagad nga adunay matugkarong paghisgot diha sa Bantayanang Torre o Pagmata! nga mga magasin.”

Bisan pa niana, dili lamang mga basahon ang nakatabang kang Kiyoe. Siya miingon nga ang edukasyong iyang nadawat pinaagi sa mga programa sa pagtudlo sa mga Saksi ni Jehova nakatabang niya sa pagpauswag sa iyang pagbasa ug pagsulat, ug kini nakapaarang niya sa pagpanghawod diha sa mga bangga. “Kas-a, buot ko kaayo nga makabatog edukasyon sa unibersidad,” miangkon siya. “Apan diin ba ako makabatog pagbansay nga sama niini?” Karon nagalaom siya sa pagbuhat nga bug-os panahon sa pagtabang sa uban nga makabenepisyo gikan sa edukasyon nga iyang nadawat. Bisan pag nalipay sa ganti sa komposisyon, ang kasingkasing ni Kiyoe gipunting sa pagdaog sa ganti sa kinabuhi.​—Itandi ang Filipos 3:14.