‘Ang mga Langit Nagapahayag . . .’
Mga 150 milyong kilometros gikan sa dapit diin anaa ka mismo, ang adlaw sanag kaayong nagadan-ag diha sa langit. Nga gisimba ingong usa ka diyos sulod sa libolibong katuigan, ang atong masanagong silingan sa langit, hinuon, usa ka pamatuod sa gahom sa Maglalalang niini, “ang Magbubuhat sa langit ug sa yuta.” (Salmo 115:15) Ang iyang kasanag ug kainit kinahanglanon alang sa kinabuhi sa yuta. Ug ang mga kamatuoran nga nasayran sa mga siyentipiko bahin niini maghupong kanato sa kahibulong.
Gisuginlan kita nga ang adlaw nagapatunghag labihan ka daghang enerhiya. Nakaamgo ka ba nga ubos sa katunga sa usa ka bahin sa usa ka bilyon sa kainit ug kahayag nga ipatungha niini masakmit sa yuta? Bisan pa, ang maong tipik katumbas sa 240,000,000,000,000 kabalyos!
Giunsa paggama sa adlaw kanang tanang enerhiya? Pinaagi sa usa ka tuman ka dakong nukleyar nga hurnohan sa uyok niini nga mopatunghag enerhiya pinaagi sa paggamit ug mga 3.6 milyong metriko toneladang idroheno matag segundo. Ikalipay sa katawhan, adunay igong sugnod diha sa adlaw aron kining maong proseso mopadayon sa binilyong katuigan.
Ang pila ka butang nadiskobrehan sa mga siyentipiko mopatunghag dugang mga pangutana. Pananglitan, ang adlaw kanunay nagakurog, sama sa usa ka palid nga metal nga naigog martilyo. Ngano? Usab, tagda kini: Ang naghiting sa kainit nga uyok sa adlaw mao ang labing init nga parte ug kon mas layo ang usa ka hut-ong gikan sa uyok, kini mas bugnaw. Apan sa dihang makaabot kita sa gawas nga hut-ong sa atmospera sa adlaw, ang corona, kana mausab. Ang corona mas init kay sa mga hut-ong nga duol sa nagdilaab nga uyok. Ngano?
Dugang pa, samtang—sama sa yuta—ang adlaw nagatuyok, ang lainlaing mga bahin nagatuyok sa lainlaing mga katulinon. Pananglitan, ang nawong nagatuyok nga mas tulin kay sa mga hut-ong sa sulod. Ngano? Ug sa unsang paagi kana posible? Unya anaa ang sunspots. Ang maong mga lama diha sa nawong sa adlaw motungha ug mawala sa regular nga siklo latas sa yugtong 11 ka tuig. Nganong sila mausab sa ingon ka regular nga paagi?
Bisan pag daghan pa ang pagasayron bahin sa adlaw, ang ato nang nasayran mopahinabo nga kita motan-aw nga malisangon sa Maglalalang niini, si Jehova. Matag panahong makita nato ang adlaw, kita mapahinumdoman nga “ang mga langit nagapahayag sa himaya sa Diyos; ug ang buhat sa iyang mga kamot ginasugid sa hawan.”—Salmo 19:1.