Ang Pagpangani sa Usa ka Tinuod nga Ebanghelista
SI William R. Brown sa sinugdan miadto sa Aprika niadtong 1923. Kauban sa iyang asawa ug anak, siya ‘nagbuhat sa buluhaton sa usa ka ebanghelista’ diha sa Ang Gambia, Ghana, Liberia, Nigeria, ug Sierra Leone. (2 Timoteo 4:5) Ang bunga sa iyang buluhaton maoy talagsaon.
Kining lumad sa West Indies dili sakop sa mga iglesia sa Kakristiyanohan ug piho nga wala malangkit sa politika. Inay, iyang gisundog si Jesus ug ang mga apostoles pinaagi sa pagmantala sa ngalan ug soberanya ni Jehova, nga nagpasiugda sa kahinungdanon sa lukat, ug nagsangyaw sa maayong balita sa Gingharian. (Mateo 9:35; 20:28; Juan 17:4-6) Si William R. Brown kanunayng migamit sa Bibliya, nga nagpunting niana ingong pangataposang awtoridad mahitungod sa doktrina ug pagtuo. (2 Timoteo 3:16) Pagkamapugsanon niya bahin niini nga siya nailhang Bible Brown.
Tungod sa panalangin ni Jehova, ang mga binhi nga gipugas ni Bible Brown nanurok ug nanubo. Karong adlawa, diha sa mga kayutaan diin nagpanguna siya sa dalan, hapit 200,000 ka mga Aprikanhon ang nagdedikar sa ilang mga kinabuhi ngadto sa ilang Maglalalang ug, sa baylo, nagsangyaw sa maayong balita sa Gingharian ngadto sa uban. (Mateo 24:14; 1 Corinto 3:6-9) Kining aktibo nga mga Kristohanon nailhan pag-ayo tungod sa ilang kamatinud-anon ug kamasaligan. Sila mibatig kagarbo nga nahimong mga Saksi ni Jehova ug mga sakop ni Kristo, ang nagamandong Hari.
Ang maong inani maoy gisangpotan sa tinuod Kristohanong ebanghelismo. Ang susamang pagpangani ginahimo sa tibuok kalibotan sa kada pinuy-ang kontinente. Diha sa kapin ug 200 ka kayutaan, kapin sa upat ka milyon aghopon-ug-kasingkasing nga mga lalaki ug mga babaye ang “naani” na ug nagasubli ngadto sa uban sa mga pulong sa ebanghelista nga manulonda: “Kahadloki ang Diyos ug ihatag kaniya ang himaya, tungod kay ang takna sa iyang paghukom miabot na.” (Pinadayag 14:7) Sa pagkamatuod, ang bugtong dalan aron makaplagan ang paglaom niining atong magubot nga kapanahonan mao ang pagliso sa Diyos ug pagpasakop sa iyang Gingharianong pagmando.