Gikan sa Makasaysayanhong Ospital Ngadto sa Talagsaong Kingdom Hall
NIADTONG 1770 ang iladong Ingles nga eksplorador nga si Tenyente James Cook milawig sa 369-ka toneladang barkong Endeavour sa kadaplinan sa wala pa masuhid nga silangang baybayon sa Australia. Sa gabii sa Hunyo 11, ang barko nabangga sa katakotan diha sa hilit nga dapit paingon sa amihanang bahin sa kontinente. Ang kasko nga hinimo sa kahoyng tugas grabeng nadaot. Kinahanglang ayohon kini dayon aron maluwas ang mga tripulante. Ang bukana sa duol nga suba nakita nga maoy maayong lugar alang sa pag-ayo, nga mikabat ug unom ka semana. Usa ka gatos ug tulo ka tuig sa ulahi, nadiskobrehan ang bulawan niining dapita. Misugod sa paghugop ang mga tawo aron sa pagpangitag bulawan! Tinagpulo ka libo ang miabot aron manimpalad. Natawo ang Cooktown.
Niadtong 1879 ang gobyerno mihatag ug permiso sa pagtukod ug usa ka permanenteng ospital aron maatiman ang mga masakiton ug ang nasamdan sa mga aksidente sa pagmina. Niana gihapong tuiga, diha sa laing bahin sa kalibotan, migula sa Hulyo 1 ang unang edisyon sa Zion’s Watch Tower. Sukad niadto, kining magasina nagatagana ug usa ka programa alang sa espirituwal nga kahimsog sa minilyong mga tawo nga mahadlokon-sa-Diyos. Walay nagdahom niadto nga moabot ra ang adlaw nga ang tinukod nga ospital sa Cooktown suod nga malangkit niining magasina.
Sa milabay ang kapin sa usa ka siglo, ang Cooktown Hospital kinahanglang pulihan. Aduna nay pundo sa gobyerno alang sa usa ka bag-ong tinukod, busa kadtong interesado gihangyo sa pagsumiter sa ilang tanyag sa pagbalhin sa karaang tinukod nga ospital. Ang National Trust of Queensland interesado kaayo niining makasaysayanhong tinukod. Apan, ang gastos sa pagbalhin ug sa pagpasig-uli sa tinukod dako kaayo. Walay misumiter sa ilang tanyag sa pagbalhin.
Halos sa samang panahon, ang gamay nga kongregasyon sa mga Saksi ni Jehova sa Cooktown nangitag usa ka permanenteng dapit nga magamit sa Kristohanong mga tigom. Wala silay yuta ug duna lamay $A800. Sa unsang paagi sila makatukod ug Kingdom Hall? Ang mga hawas sa lokal nga kongregasyon miboluntaryo sa pagbalhin sa tinukod nga ospital nga walay bayad. Sa unsang paagi dumalahon ni Jehova ang mga butang? Makapalipay nga balita! Gidawat ang ilang tanyag!
Karon ang sunod nga butang—yuta alang sa tinukod. Oo, sila gisultihan, nga daw may mabatonang yuta sa gobyerno nga walay bayad, basta ang tinukod preserbahon ug ayohon. Ugaling, niining panahona ang pagsupak sa giplanong proyekto midako diha sa dili-mahigalaong bahin sa komunidad. Giandam ang petisyon nga gidesinyo aron mapugngan ang mga plano sa mga Saksi. Mikaylap ang hungihong nga agawon sa mga Saksi ni Jehova ang Cooktown, ipasira ang tanang mga hotel ug mga sugalanan, ug idili ang pagbaligyag tabako. Siyempre, kini wala gayod mahitabo, apan ang pagpasona pag-usab sa yuta ug ang pagkuhag kinahanglanong mga permiso alang sa tinukod nagkalisod. Ang gitagal nga panahon nagkaduol na sa pagbalhin sa tinukod. Ang tabang sa Estado sa Gobyerno sa Queensland gipangayo. (Itandi ang Roma 13:2.) Ang permiso sa paggamit sa yuta sa gobyerno gihatag dayon, ug ang permiso sa pagtukod giisyu. Kay aduna nay yuta ug tinukod, unsay sunod?
Miabot ang usa ka pundok sa gatosan ka mga Saksi, mga hanas nga mga mamumuo ug mga katabang gikan sa nagkalainlaing mga bahin sa Estado sa Queensland, kinsa libreng miboluntaryo sa ilang panahon ug nakaugmad na sa kahanas sa pagpanukod ug mga Kingdom Hall nga dali ra kaayo. Kining proyektoha may linaing mga hagit: ang pagbalhin sa mga seksiyon sa duha ka andanang ospital ngadto sa bag-ong lokasyon ug pagpatindog pag-usab sa tinukod. Hapit na ang tinghabagat, sa makuyaw nga mga pagbunok sa ulan. Matapos ba kaha ang trabaho sa hustong panahon? Ang ubang mga tagalungsod nagduhaduha. Apan, ang daw imposible sa wala madugay nahuman. Sa Abril 1986 ang tinukod nalalin ug human niadto nahibalik sa iyang orihinal nga katahom.
Kining tanang kalihokan namatikdan, ingon sa gipadayag sa mga komento diha sa Anglican Newsletter sa Cooktown. Sa bahin kini nag-ingon: “Segurado gayod nga sawayon ako, apan . . . tan-awa ang Simbahan ug tan-awa kon puno ba kinig mga tawo ug tan-awa ang laing grupo [mga Saksi ni Jehova] ug tan-awa kon unsa ka daghan ang mga nanambong . . . , nga napuno sa mga Anglikano ug sa mga Romano Katoliko . . . Nasayod ba kamo nga gipalit sa usa ka organisasyon . . . ang daang Ospital aron tukoron pag-usab kanang ilang gitawag nga edipisyo nga simbahan tungod kay dili na sila masulod sa Tunghaan nga ilang gitigoman? . . . Pagkahuyang gayod nato, nga gitugotan kini nga mahitabo.”
Libolibong mga turista ang nagaduaw sa Cooktown tuig-tuig. Sila moduaw aron kalipayan ang matahom nga tropikal nga kalasangan ug ang Great Barrier Reef ug sa pagkat-on sa kasaysayan sa lugar. Ang Captain Cook Museum maoy popular nga atraksiyon alang sa kadaghanang mga bisita. Sukad sa 1989 ang makasaysayanhong Cooktown Hospital sa bag-ong papel niini ingong Kingdom Hall sa mga Saksi ni Jehova nahimo usab nga pangunang atraksiyon sa mga turista. Ang mga tindahan nga namaligyag mga handomanan nanindag gagmayng mga toalya ug mga kamesita nga dunay hulagway sa Cooktown Hospital-Kingdom Hall nga gipatik diha niana. Sa panahon nga daghan ang turista, mga unom ka gatos ngadto sa usa ka libo ang nagaduaw sa tinukod kada semana sa pagtan-aw ilabina sa talagsaong arkitektura niini sa 1879.
Ang magasin karon nga nailhang Ang Bantayanang Torre libreng mabatonan sa mga bisita. Sukad sa 1879 kining magasina nakaabot sa sirkulasyon nga kapin sa 15 ka milyong mga kopya kaduha sa matag bulan diha sa 111 ka pinulongan. Kini nagtultol sa mga indibiduwal ngadto sa mga saad sa Bibliya nga ang pipila sa kaliwatan sa 1914 mabuhi sa pagkakita nga mapasig-uli diha sa katawhan ang maayong pisikal ug espirituwal nga kahimsog. (Isaias 33:24) Ang tibuok yuta himoong paraiso pinaagi sa minilyong andam nga mga boluntaryo. (Salmo 37:29) Nganong dili moduaw ug usa ka Kingdom Hall sa inyong duol? Makakaplag kag butang nga mas bililhon kay sa tanang bulawan nga namina sukad sa rehiyon sa Cooktown.—Proverbio 16:16.