Samag mga Pati nga Nanglupad Ngadto sa Ilang mga Balay
ANG mga pati tingali maoy usa sa unang mga langgam nga gibuhi sa tawo. Kaliboan ka tuig kanhi, ang mga Ehiptohanon—maalamong nagplano alang sa tibuok-tuig nga abiyo sa pagkaon—nagtukod ug mga balay sa pati sa tapad sa ilang mga balay. Ang karne sa mga langgam kinaham kaayo, ug ang ilang iti gigamit nga abuno. Sa Edad Media, ang mga balay sa pati maoy butang nga gipangandoyng mahuptan nga diha sa pipila ka nasod ang mga halangdon o mga ordin lamang ang gitugotan sa pagpanag-iya niini.
Bisan tuod ang mga manok na karon maoy mipuli sa mga pati nga tuboran sa karne diha sa kadaghanang mga lamesa, makakita ka gihapon ug pipila ka karaang mga balay sa pati. Ang balay sa pati nga gilarawan dinhi makita sa Ehipto.
Mamauli nga magpanon sa gabii, ang panganod sa mga langgam motugpa sa ilang balay. Gihisgotan kini sa Hebreohanong manalagna nga si Isaias sa dihang siya nangutana: “Kinsa ba kining nanglupad sama sa usa ka panganod, ug sama sa mga pati ngadto sa ilang mga puy-anan?” Ingon niini pagkapahayag ang laing hubad: “Kinsa man kining nanglupad nga daw panganod, nga nanglupad nga daw mga pati paingon sa ilang mga balay?”—Isaias 60:8; The New English Bible.
Ang tubag makita karon diha sa ginatos ka libong mga tawo nga mahadlokon-sa-Diyos nga nagpanon ngadto sa organisasyon ni Jehova. Diha sa mga Kingdom Hall sa mga Saksi ni Jehova, sila nakatuon sa paglaom sa Diyos. (Isaias 60:9) Taliwala sa katawhan sa Diyos, sila nakakaplag nga ang espirituwal nga mga sukdanan, buhi nga pagtuo, ug maayong panag-ubanay mohatag ug malinawon ug may kasegurohang pagbati sama nianang makaplagan sa pati diha sa iyang balay.
[Picture Credit Line sa panid 32]
Pictorial Archive (Near Eastern History) Est.