Mga Magmamantala sa Gingharian Nagtaho
Maayong Balita Gikan sa Sidlakang Uropa
DAGHANG makapaukyab nga mga butang ang nagkahitabo sa teokratikanhong nataran sa Sidlakang Uropa. Tagsaon mao ang internasyonal nga kombensiyon sa Zagreb, sa Agosto 16-18, 1991, sa dihang 7,300 ka mga Saksi sa kinasingkasing nag-abiabi sa ilang mga igsoon gikan sa 15 ka mga nasod. Tanantanan, 14,684 ang mitambong. Kadto maoy kahibulongang pagpasundayag sa gugma ug panaghiusa diha sa nasod nga gitay-og sa kasamok!
Ang mga Saksi sa Sidlakang Uropa puliki sa pagsulti sa uban sa maayong balita sa Gingharian ni Jehova, nga ilang nasabtan mao lamay paglaom sa tinuod nga kalinaw. Sa pila ka mga dapit kini usa ka hagit alang kanila sa paghupot sa ilang neyutral nga baroganan. Bisan pa, ang mga tawo subsob maminaw, ug ang mga Saksi nagtaho ug maayong mga kasinatian.
Sa usa ka lungsod usa ka 16-anyos nga babaye nakadungog sa maayong balita gikan sa bugtong Saksi ni Jehova sa maong lungsod. Usa ka regular nga pagtuon sa Bibliya ang nasugdan, ug ang iyang apresasyon sa kamatuoran mitubo. Kay may dakong tinguha sa pagpahibalo sa uban sa mga kahibulongang butang nga iyang nakat-onan, siya naningkamot sa pagsulti sa iyang mga kaeskuwela apan nakasugamak ug pagsupak ug pagbiaybiay. Usa ka kaeskuwela nagsupak pag-ayo kaniya apan natingala ug nakadayeg sa iyang pailob, tungod kay ang batan-ong estudyante sa Bibliya wala masuko bisan pa sa tanan nga mga pag-insulto. Sa ulahi, usa ka mas bug-os nga pamatuod ang gihatag sa maong babaye, ug siya nakaamgo nga ang iyang tinamdan sayop. Usa ka pagtuon sa Bibliya ang nasugdan uban kaniya, ug unya ang una nga estudyante sa Bibliya ug ang iyang bag-ong kauban nagsulay sa pagpaambit sa ilang kalipay sa uban, bisan pa sa pagsupak gikan sa ilang mga ginikanan, magtutudlo, ug ilang mga kaeskuwela.
Ingong sangpotanan sa ilang pagpanaksi, laing kaeskuwela nagdawat sa kamatuoran. Karon tulo na sila diha sa klasehan, ug silang tulo maoy maayong mga panig-ingnan sa kaandam sa pagtabang sa uban ug sa pagpasundayag ug gugma sa usa ug usa. Unya laing babaye miduyog kanila.
Karon may upat na diha sa bangko sa nataran sa eskuylahan nga naghisgot sa Bibliya. Ug sa katingala sa daghan, ang ilang gidaghanon nagtubo. Laing babaye gikan sa klase, nadasig mahitungod sa ilang maayong pamatasan, nakahukom sa pag-apil sa ilang pagtuon sa Bibliya. Silang lima nagpadayon sa pag-agda sa uban, mga estudyante ug mga magtutudlo, sa pagbuhat ug sama. Bisan pa, ang mga babaye padayon nga nakasinati ug dagkong pagpiot gikan sa ilang mga ginikanan. Ang mga ginikanan naningkamot pag-ayo sa pagpugos sa mga babaye sa paghunong sa ilang pagtuon sa Bibliya pinaagi sa pagdaot sa ilang literatura ug pinaagi sa pagdagmal kanila.
Unsay sangpotanan niining pamatuod nga nasugdan pinaagi lamang sa usa ka batan-on interesadong tawo? Usa sa mga babaye nabawtismohan sa distritong kombensiyon sa 1990, ug ang laing upat sa sirkitong asembliya sa tingpamulak sa 1991. Kini maoy hinungdan sa dakong kalipay! Karong adlawa, tanan silang lima ka babaye nagaalagad ingong mga regular payunir! Sa lungsod diin kini nahitabo, sa pagkakaron may 11 na ka magmamantala, 8 kanila diha sa payunir nga pag-alagad.
Si Jehova nagatabang ug nagapanalangin sa iyang mga Saksi sa Sidlakang Uropa. Sa tin-aw may dakong kalaoman alang sa pag-usbaw taliwala sa matinuoron ug kasingkasing dinhang dapita sa kalibotan.