Sila Makakat-on Gikan sa mga Putyokan
“Sa mga katuigang dili pa dugay, ang mga enhinyero ug mga tigdesinyo sa produkto dugang nakaamgo ug usa ka butang nga dugay nang nahibaloan sa mga putyokan: ang pagporma bisan sa usa ka nipis kaayong materyal ug unom ug kilid nga balay sa putyokan dugang mopalig-on niana kay sa ubang porma.”—The New York Times, Oktubre 6, 1991.
DILI ikahibulong nga makabaton ug kaayohan ang mga tawo gikan sa matukiong pagtuon sa mga insekto. Ang karaang tawo sa pagtuo, si Job, kas-a miingon: “Palihog, pangutan-a, ang binuhi nga mga hayop, ug sila motudlo kanimo; ug ang mga pak-ang mga linalang sa kalangitan, ug sila motudlo kanimo. . . . Kinsa ang wala mahibalo mahitungod niining tanan nga ang kamot ni Jehova maoy nagbuhat niini?” (Job 12:7-9) Oo, ang kaalam sa Maglalalang dayag diha sa komung mga butang sama sa unom ug kilid nga mga selula nga imong makita diha sa balay sa putyokan.
Samtang ang talohon nga mga bungbong niining mga selulaha maoy mga tersiya lamang sa usa ka milimetrong gibag-on, kini lig-on kaayo. Gani, kini makadalag mga 30 ka pilo sa ilang gibug-aton.
Kining kusoga magamit sa praktikal nga paagi, sama sa mga himan nga mosangga sa kusog nga pagbangga. Kini nahimong proteksiyon usab sa gamit sa militar nga ihulog sa yuta gikan sa kahanginan. Ang The New York Times miingon bahin niini: “Ang mga butang nga sama ka bug-at sa mga dyip ihikot diha sa mga plataporma nga may bloke-blokeng balay sa putyokan sa ilalom aron masangga ang epekto sa kusog nga pagkahagsa.”
Ang hinimog-tawo nga mga produkto nga may sama niini nga desinyo magama gikan sa nagkalainlaing mga materyal. Ang mopatim-aw nga labing komun mao ang papel. Ang naylon-ug-lanot nga papel ug talo mao ang gigamit ingong balay sa putyokan nga nahisulod diha sa kasko sa pila ka dagkong mga ayroplano. Ang kalig-on maoy tungod sa kagaan. Ngano?
Ang kadaghanan sa mga luna tali sa mga pako sa ayroplano maoy hangin, busa kini gaan. Ang hangin may maayong mga hiyas usab ingong insulador.
Ang yanong putyokan wala gayod “mahibalo” bahin niining tanan, kay kini walay nakuhang kurso sa enhinyeriya. Apan, sa adlaw-adlaw nagaobra kini nga may kinaiyanhong kaalam nga gihatag sa Maglalalang, si Jehova.