Gikinahanglan Nato nga May Usa nga Mamati
INGONG mga tawo, kita nagapaningkamot nga makakaplag kalipay ug katagbawan sa kinabuhi. Apan sa dihang mobangon ang personal nga mga suliran, pagkadakong tabang ug pagkamakapalipay nga adunay usa nga kasuginlan sa atong mga problema!
Miingon si Dr. George S. Stevenson: “Ang pagpakigsulti sa mga butang ngadto sa uban makatabang aron mahupayan ang imong kabalaka, makatabang kanimo nga mas masabtan pa ang imong problema, makatabang kanimo kon unsay imong mahimo aron masulbad kana.” Si Dr. Rose Hilferding miingon: “Angay ipakig-ambit natong tanan ang atong mga problema. Angay natong ipakig-ambit ang atong kabalaka. Angay natong bation nga adunay usa sa kalibotan nga andam mamati ug makasabot.”
Siyempre, walay tawo ang bug-os makahatag niini nga panginahanglan. Tungod sa mga limitasyon sa panahon ug sa ubang mga butang, ang mga tawo nga atong kasumbongan tingali walay panahon sa dihang sila atong gikinahanglan kaayo, o kita tingali magpanuko nga ihisgot ang pipila ka butang bisan sa atong labing suod nga mga higala.
Apan, ang matuod nga mga Kristohanon, dili gayod mawad-an ug tigpatalinghog, kay ang pag-ampo mahimo man sa tanang panahon. Ang Bibliya kanunay nga nagadasig kanato sa pag-ampo ngadto sa Diyos, ang atong Maglalalang, kansang ngalan mao si Jehova. Kita gitudloan nga mag-ampo uban ang katim-os, diha sa ngalan ni Jesus, ug nahiuyon sa kabubut-on sa Diyos. Bisan ang personal ug pribadong mga butang maoy hustong mga ulohan sa pag-ampo. “Diha sa tanang butang . . . ipahibalo ang inyong mga hangyo ngadto sa Diyos,” kita giingnan sa Filipos 4:6. Pagkatalagsaong gasa! Ang Soberanong Magmamando sa atong uniberso andam kanunay nga moabiabi ug modawat sa mga pag-ampo sa iyang mapainubsanong mga alagad sa tanang panahong sila buot moduol kaniya—Salmo 83:18; Mateo 6:9-15; Juan 14:13, 14; 1 Juan 5:14.
Apan, ang Diyos tinuod ba gayod nga mamati? Ang uban tingali mahibulong kon ang pagkaepektibo sa pag-ampo limitado lamang sa tawhanong katakos: Ang usa ka tawo moampo, nagapahiangay sa iyang mga hunahuna ug nagapahayag niini diha sa mga pulong. Kay nakasaysay na sa iyang problema, siya mangitag haom nga solusyon ug alerto sa tanang butang nga hayan makaamot sa pagkakaplag niana. Sa dihang masulbad na ang iyang problema, siya tingali mopasidungog sa Diyos, apan sa pagkatinuod ang iyang kaugalingong hunahuna ug mga paningkamot ang mipatungha sa gitinguhang mga resulta.
Daghan karong adlawa ang nagtuo nga ingon lamang niini ang pag-ampo. Mao ba usab kanay imong pagtuo? Limitado ba diay ang gahom sa pag-ampo? Tugotan ta, nga ang mental ug pisikal nga mga paningkamot sa usa ka tawo nga nahiuyon sa iyang pag-ampo may dakong bahin sa pagkadawat sa mga tubag. Apan, unsay ikasulti sa bahin sa Diyos sa maong butang? Ang Diyos ba mamati dihang ikaw mag-ampo kaniya? Giisip ba niyang hinungdanon ang imong mga pag-ampo, ginatagad ang diwa ug nagatubag niana?
Ang mga tubag niining mga pangutanaha hinungdanon. Kon ang Diyos dili magtagad sa atong mga pag-ampo, nan ang pag-ampo may sikolohikal nga bili lamang. Sa laing bahin, kon ang Diyos nagadawat ug namati nga may kaikag sa matag usa sa atong mga pag-ampo, pagkadako sa atong pasalamat alang sa maong tagana! Kini mopalihok kanato nga pahimuslan pag-ayo ang maong tagana adlaw-adlaw.
Nan, dapiton kamo namo, sa pagpadayon sa pagbasa, samtang kining mga isyuha hisgotan sa sunod nga artikulo.