Unsay Mahitabo sa Sagradong mga Dapit sa Kakristiyanohan?
ANG mga magpapatik sa librong Holy Places of Christendom, sa arkeologong si Stewart Perowne, nangutana: “Kinsa, bisan unsa pay iyang Kristohanong tradisyon, ang makabarog diha sa Kalbaryo sa Simbahan sa Pagkabanhaw [o, Simbahan sa Sagradong Lubnganan] sa Jerusalem nga dili mahibulong: kay dinhi ning dapit nga gisimba ug gipakig-awayan sa daghang kasiglohan, mao ang sentro mismo sa Kakristiyanohan.”
Wala gayoy nakapamatuod nga kini nga simbahan gitukod diha sa Kalbaryo, nga diha niini namatay si Jesu-Kristo. Sa pagkamatuod, sa wala pa mohukom ang Romanhong imperador nga si Constantino sa pagtukod ug simbahan didto, giokupahan kini sa usa ka paganong templo. Dugang pa, si Jesus miingon: “Ang Diyos Espiritu, ug ang magasimba kaniya kinahanglang magasimba kaniya sa espiritu ug sa kamatuoran.” (Juan 4:24) Kini nga mga magsisimba wala magahimaya sa materyal “sagrado” nga mga dapit.
Sa usa ka higayon, ang Jerusalem mao ang lokasyon sa templo sa Diyos ug busa ang sentro sa putli nga pagsimba. Tungod sa pagkadili-matinumanon sa mga molupyo sa siyudad, gitalikdan kini ni Jehova nga Diyos, sumala sa gitagna ni Jesus. (Mateo 23:37, 38) Si Jesus mitagna usab sa pagkagun-ob sa maong relihiyosong sentro, nga gilantaw gihapon sa kadaghanan ingon nga usa ka sagrado nga dapit. Ang iyang mga pulong natuman sa dihang gilaglag sa mga Romano ang Jerusalem ug ang templo niini sa 70 K.P.—Mateo 24:15, 21.
Ang tagna ni Jesus sa dili madugay may dakong katumanan diha sa enterong relihiyosong gingharian sa Kakristiyanohan, nga iyang gipangangkon nga usa ka sagrado nga dapit. Ang Kakristiyanohan ug ang iyang sagradong mga dapit karon nagaatubang ug kalaglagan pinaagi sa batok-relihiyon nga puwersa nga gitawag “ang dulumtanang butang nga nagapahinabog kalaglagan.” (Daniel 11:31) Ang mga Saksi ni Jehova malipay sa paghatag ug impormasyon kon sa unsang paagi mahitabo kining makuyaw nga hitabo.
[Hulagway sa panid 32]
Usa ka kapilya sulod sa Simbahan sa Sagradong Lubnganan
[Credit Line]
Pictorial Archive (Near Eastern History) Est.