Mga Magmamantala sa Gingharian Nagtaho

Pagwali ug “Kagawasan Ngadto sa mga Binihag” sa Brazil

ANG espiritu ni Jehova gamhanang naglihok ibabaw sa iyang katawhan sa Brazil samtang sila nagawali sa maayong balita sa kagawasan ngadto niadtong naulipon sa bakak nga relihiyon. (Isaias 61:1, 2; Lucas 4:18) Niadtong 1947 dihay 648 lang ka Saksi sa nasod. Niadtong 1967 ang gidaghanon miuswag ngadto sa 41,548. Tungod sa panalangin ni Jehova, sa sinugdan sa 1991 kini miabot sa kinatas-ang ihap nga kapin ug 302,000! Sa pagkatinuod, ‘ang Diyos maoy nagpatubo.’ (1 Corinto 3:7) Sa 1990 tuig sa pag-alagad lamang, 27,068 ang nabawtismohan.

Tungod sa maong pagtubo gikinahanglan ang pag-organisar ug usa ka bag-ong sirkito kada bulan, ug 150 ka bag-ong Kingdom Hall ang gipahinungod sa usa ra ka tuig. Dugang pa, ang sangang-buhatan mipalit ug 180 ektarya nga yuta aron padak-an ang ilang mga pasilidad sa imprenta, diin sila karon nagaimprentag mga Bibliya diha sa ilang kaugalingong mga makina sa imprenta. Busa ang mga Saksi sa Brazil nagkugi sa pagtabang sa mga maaghop ug kasingkasing sa paggula sa “Dakong Babilonya” una pa “ang dakong kasakitan.”​—Pinadayag 7:9, 10, 14; 18:2, 4.

□ Ang usa ka otso-anyos nga magmamantala nagbilin ug usa ka basahon sa asawa sa hepe sa polisiya ug unya, nga siya lang usa, mihimog balikduaw. Ang iyang tuyo mao nga ipabasa sa ginang ang pipila sa mga estorya alang kaniya ug ipatug-an kaniya kon unsay iyang nasabtan gikan sa matag estorya. Samtang gisaysay niya ang mga estorya ngadto kaniya, siya mismo nakaapresyar sa basahon ug mihangyo kaniya nga ipailaila siya ngadto sa iyang inahan. Kana iyang gibuhat, ug karon ang ginang nagapahimulos sa regular nga pagtuon sa Bibliya.

□ Niadtong 1984, si Maria gipul-an sa kasalingkapaw nga iyang nasabtan diha sa katilingban, ug siya naguol tungod sa mga katalagman nga iyang nabasahan nga nagkahitabo sa kalibotan. Busa iyang gisagop ang punk nga pagkinabuhi. Siya mipahayag: “Ang among tumong mao ang pagsupak sa tanang butang ug sa tanang tawo. Ang akong panagway gituyo nga makapakurat ug mga tawo​—katingad-an, mga sininang dagtom ug kolor, ulo nga gikagisan ang bahin niana. Gipasagdan ko ang akong bana, mga anak, ug panimalay ug misugod sa pagtabakog marijuana ug migamit sa co­caine aron makaikyas sa katinuoran. Apan kadto mipabati lang kanako nga daotan pa. Mihilak ako. Sa gibasa ko ang Bibliya, ako walay hisabtan. Busa miampo ako sa Diyos alang sa panabang.

“Usa ka adlaw duha ka Saksi miduaw sa akong balay ug, tapos sa kadiyut nga panaghisgot, mitanyag kanakog duha ka magasin. Sa pagpakli sa usa kanila, akong namatikdan ang usa ka artikulong nag-ulohang ‘Independensiya Gikan sa Diyos​—Nganong Dili?’a Ang artikulo nakatandog sa akong kasingkasing. Gibati ko nga gitubag sa Diyos ang akong mga pag-ampo, ug sukad niadtong adlawa mismo, ang mga Saksi misugod sa pagtuon sa Bibliya uban nako. Sukad niadto gihimo ko ang mga kausaban nga naarang-arang ang akong pagkatawo. Ang akong bana ug pamilya sa sinugdan mitutol sa akong pagtuon sa Bibliya, apan sa nakita nila ang kausaban nga akong gihimo, sila misugod sa pagdasig kanako. Ako karon usa na ka bawtismadong alagad sa Diyos.”

Ang mga Saksi ni Jehova sa Brazil, ingon man sa tanang ubang bahin sa yuta, aktibo sa pagwali sa “kagawasan sa mga binihag.” Kapid-an nagasanong, nga nakakaplag sa tinuod nga kagawasan ug kalipay sa pag-alagad kang Jehova.

[Footnote]

[Kahon sa panid 30]

BRAZIL

Populasyon - 150,367,800

1990 Kinatas-ang Ihap sa Magmamantala - 293,466

Ratio, 1 ka Magmamantala sa - 512

1990 Gibawtismohan - 27,068

Aberids Payunir Magmamantala - 30,115

Mga Kongregasyon - 4,625

Aberids Pagtuon sa Bibliya - 341,305

Tumatambong sa Memorial - 790,926