Politika—Usa ka Bahin sa Katungdanan sa Ebanghelyo?
SUMALA kang Joachim Meisner, ang arsobispo sa Cologne ug kanhing iladong klerigong taga-Sidlakang Alemanya, “inerehes ang pagtawag sa politika nga hugaw, usa ka negosyo nga niana mabulingan sa usa ang iyang mga kamot.” Sa usa ka interbiyo niadtong 1989, siya miingon: “Ang politika maoy usa ka kamatuoran sa kinabuhi ug busa usa ka bahin sa atong katungdanan sa ebanghelyo. Kinahanglang atubangon nato ang hagit. Sa positibong paagi, kinahanglang sudlon nato ang matag politikanhong institusyon, gikan sa mga unyon ug mga asosasyon sa obrero ngadto sa politikanhong mga partido, nga mugnaon diha sa maong mga kalihokan ug mga partido ang patukoranan sa Kristohanong diwa nga gikan niana mahimong mogawas ang mga indibiduwal aron manguna sa pagpasiugda sa Aleman ug Uropanhong politika.”
Ang mosunod nga mga pangutlo gikan sa Frankfurter Allgemeine Zeitung, usa ka iladong Alemang mantalaan, nagpakita nga daghang Uropanhong mga klerigo—Katoliko ug Protestante—nagtuo sa hunahuna ni Meisner.
“Unom lang ka adlaw tapos sa iyang eleksiyon [Oktubre 1978], siya [ang papa] nagpahibalo nga ingong usa ka taga-Silangang Uropa siya walay katuyoan sa pagdawat sa presenteng kahimtang sa Uropa. . . . Giisip sa pipila nga kadto usa ka sermon, apan kadto usa ka politikanhong programa.”—Nobyembre 1989.
“Sa pila ka dapit [sa Czechoslovakia] ang iglesya nakaangkon ug hataas nga pagtahod ingong usa ka mag-uuna sa kagubot. Ang mga estudyante sa seminaryo alang sa mga pari sa Litomĕr̆ice, usa ka katedral nga lungsod sa amihanang Bohemia, . . . nanguna sa dili-mapintasong rebolusyon sa miaging Nobyembre.”—Marso 1990.
“Ang senemanang pag-ampo alang sa pakigdait diha sa [Protestante] Nikolai nga Simbahan, nga sa napulo ka tuig nakadanig gamayng pagtagad, sa kalit nahimong simbolo sa kagubot niining tuiga, sa malinawong rebolusyon sa GDR [German Democratic Republic]. . . . Ang dimaihap nga mga klerigo ug ginsakpan sa kongregasyon miapil sa mga demonstrasyon nga gihimo human niadto.”—Disyembre 1989.
Sa iyang interbiyo ang Arsobispong si Meisner miingon usab: “Kita dili makahulat nga ang Kristohanong mga politiko mahulog gikan sa langit. . . . Ako dili gayod kapoyon sa pagdasig sa batan-ong mga Kristohanon . . . nga malangkit sa politikanhong kinabuhi [o sa] . . . pagsulti sa tigulang nga mga lungsoranon: Kinahanglang dili ninyo tugotang molabay ang usa ka eleksiyon nga kamo dili malangkit.”
Uyon niana, 19 ka membro sa East German Volkskammer (parliamento) nga gipili alang sa katungdanan niadtong Marso 1990 maoy mga klerigo. Ang relihiyon maayo usab nga pagkahawas diha sa gabinete. Bahin sa usa sa tulo niini ka klerigo, ang Ministro sa Depensa si Rainer Eppelmann, usa ka hugot nga pasipista, ang mantalaang Nassauer Tageblatt misulat: “Daghan nag-isip kaniya nga usa sa mga amahan sa malinawong rebolusyon.”
Ang mga Saksi ni Jehova sa Silangang Uropa, nga mokabat sa ginatos ka libolibo, nagkalipay sa midakong relihiyosong kagawasan nga ila karong nabatonan. Apan sila wala maggamit niini aron malangkit sa politikanhon o sosyal nga mga lantugi. Nahiuyon sa katungdanan sa ebanghelyo nga gipahayag sa Mateo 24:14, sila nagasunod sa panig-ingnan ni Jesus sa paglikay sa tawhanong politika, nga kasamtangan madasigong nagawali sa maayong balita sa Gingharian sa Diyos ingong bugtong paglaom sa katawhan. Ang klero sa Kakristiyanohan—kon kaha sa Silangang Uropa o sa laing dapit—magmaalamon sa pagbuhat sa sama.—Juan 6:15; 17:16; 18:36; Santiago 4:4.