Usa ka Komplikadong Pagduol sa Diyos

“AKO ang dalan ug ang kamatuoran ug ang kinabuhi. Walay makaadto sa Amahan gawas kon pinaagi kanako,” miingon si Jesu-Kristo. Siya midugang: “Sa pagkatinuod ako magaingon kaninyo, Kon mangayo kamo sa Amahan ug bisan unsa iyang igahatag kini kaninyo pinaagi sa akong ngalan.”​—Juan 14:6; 16:23.

Sa kasiglohan, hinunoa, ang mga relihiyon sa Kakristiyanohan, ilabina ang Iglesia Romana Katolika, uban sa iyang impiyerno nga kalayo, purgatoryo, ug mga doktrina sa Trinidad, nagpalibog “sa dalan.” Si Jesus gihulagway, dili ingong andam nga tiglaban alang sa makasasalang mga tawo, kondili ingong usa ka bata diha sa mga bukton o ingong usa ka maghuhukom nga kahadlokan, nga nagahukom ug nagasilot sa mga makasasala inay kay sa pagluwas kanila. Nan, sa unsang paagi ang usa ka makasasala makaduol sa Diyos?

Ang librong The Glories of Mary (1750) nagpatin-aw. Nagtandi kang Jesus ngadto sa naglagiting nga adlaw sa hustisya, ang ika-13 nga siglo nga papa Innocent III miingon: “Bisan kinsa ang anaa sa kangitngit sa sala, palantawa siya sa bulan, papangaliyaha siya kang Maria.” Diha kang Maria, ang inahan ni Jesus, ang laing gihimong tiglaban sa katawhan. Tingali tungod sa iyang inahanong impluwensiya, ang pabor mahimong mabatonan gikan kang Jesus ug sa Diyos. Busa, diha sa mga pulong ni Laurence Justinian, usa ka klero sa ika-15 nga siglo, si Maria nahimong “ang hagdanan paingon sa paraiso, ang pultahan ngadto sa langit, ang labing tinuod nga tigpataliwala sa Diyos ug sa tawo.”

Uban nianang tanang pagdayeg nga gihatag kaniya, sa ngadto-ngadto wala lamang siya lantawa ingong “Birhen Maria” apan nahimong ang “Balaang Reyna, Inahan sa Kaluoy,” gidesinyo nga tigtabang kanunay ug gibayaw nga siya usab maoy sagrado kaayo alang sa direktang pagduol. Aduna pa bay makaplagang laing tiglaban? Komosta na man ang iyang inahan?

Sanglit ang Bibliya wala maghisgot sa ulohan, ang tubag gipangita bisan diin. Ang Apokripal nga librong Protevangelium ni Santiago naghisgot sa kasaysayan ni Anne (o Anna), ang asawa ni Joachim, kinsa wala manganak human sa daghang mga tuig sa kaminyoon. Sa kataposan, usa ka manulonda ang nagpakita kaniya ug nagpahibalo nga siya manganak. Sa nahaigong panahon, siya nahimong inahan ni “Birhen Maria,” kini giangkon.

Busa adunay mitunghang usa ka pagsimba alang kang “Saint” Anne. Ang mga alampoanan ug mga simbahan gitukod sa pagpasidungog kaniya. Ang pagpasidungog kang “Saint” Anne nahimong kaylap sa Uropa sa ika-14 nga siglo.

“Pagkakomplikado sa relihiyon!” miingon ang librong The Story of the Reformation. “Ang mga tawo nag-ampo ngadto kang Anna kinsa nahimong tigpataliwala uban kang Maria kinsa nahimong tigpataliwala uban sa iyang anak kinsa nahimong tigpataliwala uban sa Diyos alang sa makasasalang mga tawo. Kana katingalahan, apan kana mao ang matang sa patuotuo nga nagmatuto sa mga kalag sa mga tawo.” Nan, ania ang laing kaso nga ikapadapat nga tukma ang mga pulong ni Jesus: “Inyong gihimo ang pulong sa Diyos nga walay kapuslanan tungod sa inyong mga tradisyon.”—Marcos 7:13.

[Picture Credit Line sa panid 21]

Ang Museyo sa Arte sa Kaulohan, Kabilin ni Benjamin Altman, 1913. (14.40.633)