“Mga Reseta Alang sa Pagmatutog Malipayon ug Malamposong Anak”

UBOS sa maong ulohan, ang magasing Medical Aspects of Human Sexuality mipatik ug usa ka artikulo diin si Dr. Irene Jakab, usa ka propesor sa sikyatriya sa unibersidad, naglaraw sa butang gibati niya nga gikinahanglan sa pagmatutog anak nga mahimong malamposong hamtong. Apil sa mga ingrediente sa iyang “mga reseta” mao ang panginahanglan sa paghigugma sa mga ginikanan sa ilang anak, paggiya kaniya bahin sa kon unsay matarong ug daotan, ug pagbansay niya sa paghimog mga desisyon. Iyang gibati nga ang “mga reseta” angay dili mag-apil sa pagkadaling masuko sa bahin sa mga ginikanan, pagkamatinguhaon sa kahingpitan, pagkasobra ka mabalak-on, o pagkamatinugoton.

Ang “mga reseta” ni Dr. Jakab maayo man sa kaugalingon. Sa pagkamatuod, libolibo ka mga katuigan kanhi, gihatag sa Bibliya ang susamang tambag ngadto sa mga ginikanan. (Tan-awa, pananglitan, ang Proverbio 4:1; 13:24; 22:6; Colosas 3:21.) Ugaling, ang Bibliya may gilakip nga nalaktawan ni Propesor Jakab: ang kahinungdanon sa pagtudlo sa mga anak sa paghigugma sa ilang Maglalalang ug pagkasinati sa iyang Pulong. Si apostol Pablo misulat: “Kamong mga amahan, ayaw ninyo pagpasuk-a ang inyong mga anak, apan ipadayon ang pagmatuto kanila diha sa disiplina ug pagdumala sa kaisipan ni Jehova.”—Efeso 6:4; Deuteronomio 6:4-7.

Kon wala ang maong pagbansay, ang mga anak mahimong modagko nga walay moral nga angkla. Ang sangpotanan mahimong kadaotan niining imoral ug hiwi nga kalibotan.