Usa ka Maalamong Tikang Samtang Wala Pay Katalagman
Sanglit ang mga anak ni Mary karon mga dagko na, siya adunay panahon sa iyang kaugalingon ug mihukom sa pagkuhag dili bug-os panahong sekular nga trabaho. Sa dihang iyang gisultihan ang iyang bana, si Enos, hinunoa, iyang gipatin-aw nga dili na kinahanglang motrabaho pa siya. “Kon ako nakatagana kanimo ug sa mga anak, segurado nga ako makatagana kanatong duha karon,” siya miingon. Imbes nga patrabahoon ang iyang asawa, iyang gisugyot nga mainampoong palandongon niya ang pagkahimong usa ka payunir, bug-os panahong magmamantala sa Gingharian.
Bisag si Mary malipay sa pagpaambit sa mensahe sa Gingharian uban sa iyang mga silingan, siya maulawon ug kulang sa pagsalig. Apan, buot niyang sundon ang tambag sa iyang bana. Busa, uban ang nagsagol nga mga pagbati, siya nagpalista ingong usa ka auxiliary payunir sa Abril 1981.
Dali nga naugmad ni Mary ang gugma alang sa buluhatong pagsangyaw sa Gingharian nga wala gayod niya kanhi maagii. Sa wala madugay, siya nagdumalag upat ka pagtuon sa Bibliya sa balay sa interesadong mga tawo. Sulod sa usa ka tuig siya nahimong usa ka regular nga payunir, nga nagadumala ug napulo ka pagtuon sa Bibliya. Si Christine, usa ka Saksi ni Jehova nga adunay duha pa ka anak nga nagtungha, madasigong miuban kang Mary ingong iyang kauban sa pagpayunir. Ang bag-ong interesadong mga tawo misugod sa pagtambong sa mga tigom sa lokal nga Kingdom Hall, diin nagatubo ang usa ka maayong espiritu sa pagpayunir. Ug ang labing dakong kalipay ni Mary miabot sa dihang ang iyang kaugalingong anak, si Christopher, mipili sa pagsunod sa iyang panig-ingnan ug nagpayunir usab.
Unya, sa kalit, sa 1985 ang trahedya mihapak. Si Mary nakuyapan. Ang aneurysm diha sa iyang ulo nga mitultol sa grabe nga pagdugo sa utok, ug sulod sa tulo ka adlaw ang 45-anyos nga Mary namatay.
Sulod niadtong upat ka tuig nga pagpayunir, hinunoa, natukod ni Mary ang usa ka maayong baroganan sa iyang komunidad. Ang iyang serbisyo sa lubong gitambongan sa kapin sa 300 ka tawo, apil ang daghang mga silingan. Usa niadtong mitambong mao ang usa ka higala kanhi sa tunghaan nga nakadayeg sa pagtuo ni Mary, buot nga makakat-on ug dugang bahin niana, ug mihangyo alang sa usa ka pagtuon sa Bibliya. Ang ministeryo ni Mary nagapamunga gihapon.
“Ako mismo nag-auxiliary payunir karon,” matud ni Enos, “apan nagmahay ako nga wala makauban ni Mary sa dihang siya nagpayunir. Siya kanunayng maghisgot bahin sa iyang mga eksperyensiya ug malipayon kaayo. Sa pagkamatuod, kadtong pipila ka tuig mao ang labing malipayong mga tuig sa among kinabuhi, apan karon na lamang nga ako nagpabili kon ngano.”
Walay makatag-an kon kanus-a ang “panahon ug wala-damhang hitabo” mohampak, sama sa wala-damhang hitabo ni Mary. Hinunoa, kadtong magpabiling matinumanon ingong magmamantala sa Gingharian nagahatag ug kasegurohan sa ilang kaugalingon sa paborableng pag-ila sa Diyos ug sa tawo, bisan atubangan sa katalagman.—Ecclesiastes 9:11; 11:1, 2.
[Mga hulagway sa panid 31]
Ang pagpakig-ambit sa ministeryo maoy panahon nga maayong pagkagugol