Makatuo Ka ba sa Bibliya?
“BUG-OS luwas ang pag-ingon nga kon ikaw makahibalag ug tawong nagaangkong dili motuo sa ebolusyon, kanang tawhana ignorante, hungog o buang.” Sa unsang paagi maapektahan ka sa maong mga pulong sa biologong si Richard Dawkins? Kon nagtuo ka sa Bibliya, lagmit ikaw nagtuo sa paglalang inay sa teoriya sa ebolusyon. Nagkahulogan ba kana nga, ingong magtutuo sa Bibliya, ikaw ignorante, hungog, o buang?
Palandonga, usab, kining pamulonga: “Ang mga eskolar sa Bag-ong Testamento nakatino nga dili kaduhaduhaan nga ang Jesus sa unang Kristohanong mga kasulatan sa usa ka sukod maoy tinumotumo sa Kristohanong handurawan.” Kining mga pulonga diha sa The Weekend Australian gipamulong ni Dr. Robert W. Funk, usa ka propesor sa unibersidad sa relihiyosong mga pagtuon ug magsusulat sa ubay-ubayng libro bahin sa relihiyosong interpretasyon.
Si Dr. Funk nagsugod sa usa ka proyekto nga nailhang Jesus Seminar, usa ka grupo sa kapin sa gatos ka eskolar sa Bibliya nga nagsusi sa tingob sa mga pamulong ni Jesus nga gitaho diha sa Bibliya. Apil sa uban pang butang, gihinapos nila nga ang Pag-ampo sa Ginoo wala han-aya ni Jesus; nga wala mag-ingon si Jesus nga ang mga maaghop makapanunod sa yuta o nga ang mga magdadait pagatawgong mga anak sa Diyos; ug nga siya wala mag-ingon: “Ako mao ang pagkabanhaw ug ang kinabuhi. Ang nagtuo kanako . . . dili gayod mamatay.”—Juan 11:25, 26; Mateo 5:5, 9; 6:9, 10.
Bisan pag ang ilang mga paghinapos makapakurat tingali kanimo, kana dili talagsaon. Kana mao ang sangpotanan sa modernong pagsaway o kritisismo sa Bibliya, ug ang susamang mga ideya gitudlo diha sa relihiyosong mga seminaryo sa dugaydugay na. Tingali ikaw nagmagahion sa pagkadungog nga ang Bibliya gisupak sa mga siyentipiko. Apan sa dihang ang relihiyosong mga pangulo nagaduhaduha sa pagkamatuod sa talaan sa Bibliya, basin ikaw maghunahuna kon kaha panahon na nga tulotimbangon ang imong baroganan mismo. Makataronganon ba ang pagtuo sa Bibliya sa dihang daghan kaayong utokan diha sa natad sa relihiyon dayag wala na magtuo?