Paglutos Nagapadayon sa Burundi
SA SINUGDAN sa 1989, gisugdan sa mga punoan sa nasod sa Burundi sa sentral Aprika ang sunodsunod nga paglutos sa mga Saksi ni Jehova. Sumala sa gitaho sa Agosto 15, 1989, isyu sa Ang Bantayanang Torre, gisulayan sa mga awtoridad nga pugson ang mga Saksi sa pagbiya sa ilang pagtuo, pinaagi sa paggamit sa pagpanghasi, mga pagdakop, mga pagbunal, ug ubang mapintasong mga lakang. Unsa ba ang kahimtang sukad niadto?
Ang laing taho gikan sa Burundi nagaingon nga panahon sa pagduaw sa magtatan-aw sa distrito ngadto sa Kinyinya ug Gitega, gisulayan sa mga awtoridad ang pagdakop sa mga membro sa kongregasyon panahon sa usa ka tigom. Ang mga magtatan-aw sa distrito ug sirkito nakaeskapo, apan kadtong gidakop nag-apil sa duha ka estudyante sa hayskul ug usa ka batang babaye nga nagatungha sa primarya. Ang tanan gibunalan. Sa sunod adlaw ang mga Saksi nga gidakop miatubang sa gobernador ug mipatin-aw nganong sila dili mahimong mga membro sa politikanhong partido. Sila gibunalan na usab. Ang uban nagtaho sa susamang mga hitabo.
Usa ka kasaligang Kristohanong ansiano sa Burundi misulat: “Walay Saksi ni Jehova ang gidakop tungod sa pangawat, pagbuno, o pag-alsa. Kon ang mga awtoridad dunay tinuod nga mga hinungdan sa pagsilot sa mga Saksi, himoon unta nila kana sa dayag nga hukmanan inay sakiton ang malinawong mga lungsoranon, ilogon ang ilang mga kabtangan, ug gukdon sila samag ihalas nga kahayopan. Daghang igsoon sa interyor nga dapit naobligar sa pagpahawa sa ilang mga balay ug pagpuyo nga samag mga kagiw. Usa ka igsoong babaye kansang bana napriso nakigkita sa daghan sa mga awtoridad sa paningkamot nga mapagawas ang iyang bana. Siya wala tagda sa tanan uban sa tubag: ‘Dili gayod namo mapagawas ang imong bana samtang kamo nagadawat ug kuwarta gikan sa ubang nasod aron sa pagpahuyang sa atong nasod.’ Pagkadakong pasipala!”
Hinuon, adunay maayong balita gikan sa Burundi. Ang mga Saksi didto wala mangahadlok. Sa mabinantayon apan segurado ang pagwali sa maayong balita nagauswag, ug ang mga kaigsoonan nakaamgo nga pinaagi sa bug-os nga pagsalig kang Jehova, sila makaantos.
Daghang sulat nga nagpahayag sa paglapas sa katungod sa uban gisulat na ngadto sa Burundi, ug pihong daghan pa ang mosunod sa dihang ang kalibotan makaamgo nga ang Burundi nagapadayon sa waykaluoy nga pagpanglutos niini sa mga Saksi ni Jehova.
[Kahon sa panid 15]
Ang adres sa presidente sa Burundi maoy:
His Excellency Major Pierre Buyoya
President of the Republic of Burundi
Bujumbura
REPUBLIC OF BURUNDI