Kon Nganong Angay Kang Motambong sa “Diyosnong Debosyon” nga Distritong Kombensiyon
Ang magantihong tulo ka adlaw sa instruksiyon sa Bibliya nagapaabot kaninyo sa “Diyosnong Debosyon” nga Distritong Kombensiyon sa mga Saksi ni Jehova sugod karong bulana. Pinaagi sa matulon-anong mga diskurso ug mga interbiyo ug usa ka drama, itagana ang hinungdanong giya sa Bibliya. Mapresente sa 10:20 buntag sa Biyernes inigsugod sa kombensiyon pinaagig musikal nga bahin.
Ang programa sa buntag sa Biyernes mag-apil sa pakigpulong “Paglikay sa mga Ngabil nga Makadaot” ug sa hinungdanong diskurso bahin sa sinugdan sa doktrinang Trinidad. Sa hapon, ang mga ginikanan pagatambagan sa pagdawat sa ilang moral nga responsabilidad sa pagtagana sa ilang mga anak ug espirituhanong panulondon. Sunod, ang mga batan-on dasigon sa paghimo kang Kristo nga ilang sulundan ug paghimo sa kamatuoran nga ilang kaugalingon. Ang programa sa adlaw pagataposon sa panaghisgot sa usa ka talagsaong tagana nga ginahimo ilabina sa pagtabang sa mga batan-on.
Ang Sabado maoy laing adlaw nga punog instruksiyon nga magaapil sa bawtismo sa buntag ug sa hapon sa bililhong mga pakigpulong bahin sa Kristohanong Nagamandong Lawas ug sa unsang paagi kita makakooperar kanila karong adlawa. Ang mga sesyon sa hapon matapos pinaagi sa hinungdanong pakigpulong “Ang Bibliya—Pulong sa Diyos o sa Tawo?”
Sa buntag sa Dominggo, ang tukma-sa-panahong instruksiyon magpasidaan kanila batok sa “tawo sa kalapasan” ug pagkahisalaag kon bahin sa pagkaon ug ilimnon, pamostura, ug kalingawan. (2 Tesalonica 2:3) Kini pagasundan sa modernong-adlaw nga drama nga nagapasiugda sa kahinungdanon sa pagpasakop sa atong kaugalingon sa Diyos. Dayon, dili nimo buot sipyaton ang pakigpulong publiko, “Kaluwasan Haduol na Alang sa Katawhang May Diyosnong Debosyon!”
Sa Disyembre, 1989 ug Enero, 1990, ang 34 ka kombensiyon gieskedyul sa tibuok Pilipinas lamang, mao nga adunay usa nga dili layo sa inyong balay. Pakisusi sa mga Saksi ni Jehova sa inyong dapit alang sa panahon ug dapit sa usang labing duol kanimo.
[Hulagway sa panid 32]
Distritong kombensiyon sa Verona, Italya