‘Isulti ang Pulong sa Diyos sa Walay Kahadlok’

SI Jehova nga Diyos makahatag gahom sa iyang mga alagad sa ‘pagsulti sa Pulong sa Diyos sa walay kahadlok.’ (Buhat 4:31) Bisan kadtong batan-on sa mga dalan sa kamatuoran sa Bibliya ug waykasinatian sa buluhatong pagwali dili kinahanglang magpanuko sa pagsulti sa maayong balita sa walay kahadlok. Sa Côte d’Ivoire, duha ka magmamantala sa maayong balita naghimo sa ganghaan-sa-ganghaang pagsangyaw sa dihang ilang nahibalag ang usa ka propesor sa unibersidad. Ang batabatang Saksi, si Seriki, kay mibating dili takos makigsulti ngadto sa usa ka tawong edukado, mipasulti sa laing Saksi.

Ang propesor nalibog sa rasanhong pagpihigpihig ug gibasol ang Diyos tungod sa rasanhong mga suliran nga nagalungtad, kay mibati nga siya mao ang naglalang sa lainlaing mga rasa. Tapos sa taas nga estoryahay nga daw walay klarong sangkoanan, si Seriki sa kataposan nakabatog kaisog nga mosulti, ug matinahoron siyang misalga sa estoryahay. (1 Tesalonica 2:2) Sa pagmatikod nga ang balay sa propesor gidekorasyonan sa nindot nga mga piniling kolor, si Seriki nangutana sa propesor, “Nganong ang imong balay wala man nimo himoang usa rag kolor?”

“Maghunahuna ka nga ako buang!” mitubag ang propesor. Si Seriki mitubag: “Dili, apan nganong pagadahomon natong ang Diyos maghimo sa tanang butang ug sa tanang tawo nga usa rag kolor?” Tin-aw ang punto. Kadtong yanong ilustrasyon napamatud-ang epektibo, ug nakahatag ug maayong pamatuod ang kaniadto maulawong si Seriki.