Mga Magmamantala sa Gingharian Nagtaho
‘Ang Bililhong mga Butang Nangabot’
ANG propetang si Haggeo nagsulat niining mga pulonga sa 520 W.K.P.: “‘Ug uyogon ko ang tanang mga nasod, ug ang bililhong mga butang sa tanang mga nasod moabot; ug kining balaya pun-on ko sa himaya,’ nagaingon si Jehova sa mga panon.” (Haggeo 2:7) “Ang bililhong mga butang” sa tanang nasod nga magpuno sa balay ni Jehova sa himaya mao ang iyang mahadlokon-sa-Diyos nga mga magsisimba. Ang maong buotan-ug-kasingkasing nga mga tawo nagadawat sa maayong balita sa Italya, mao nga karon adunay 166,000 ka Saksi nga nagatudlo sa katawhan sa Bibliya nianang nasora. Ang Katolikong klero sa Italya nagaisip sa among talagsaong pagtubo nga “sa mausbawon makapabalaka nga katingalahan” nga “nakapabalaka ug nakapaluya” kanila. Pasugiron nato ang usa ka nangita sa kamatuoran kon unsay nahitabo kaniya.
“Ako usa ka magtutudlog katekismo sa pulo ka tuig, ug ako kombinsido nga kadto ang paagi sa pagpahayag sa akong gugma sa Diyos ug sa silingan. Bisan pag ako may usa ka higala nga usa sa mga Saksi ni Jehova, ako wala mogahig panahon sa pagpamati sa mensahe sa Bibliya. Hinuon, sa dili pa dugay sa dihang ang mga Saksi miduaw kanako, sila akong gipadayon. Buot kong sultihan sila nga dili na moduaw pag-usab sa akong ugangang-babaye, kay siya hingulion na. ‘Inay moduaw sa mga tigulang,’ giingnan ko sila, ‘makigsulti mo sa mga tawong sama kanako.’ Sukad niadto sila regular nga nagduaw sa akong balay, apan sa matag panahong motandog silag doktrinal nga punto, hangyoon ko sila nga ioktaba una ang panaghisgot sa ulahi aron ako makasusi niana.
“Nakigsulti ako sa ubay-ubayng mga pari ug nakamatikod nga sila walay Biblikanhong tubag. Usa kanila, usa ka misyonaryo, misulti kanako nga dili na gayod hinungdanon ang pagtambong sa Misa. ‘Kon buot sabton,’ matud niya, ‘sa mga nasod sama sa Brazil, pananglitan, ang mga tawo nagabuhat ug laing mga butang inay motambong sa Misa. Ang hinungdanon mao ang pag-alagad sa Diyos kutob sa maarangan sa usa.’ Kadtong mga pulonga mihatag kanakog kusog sa pagbugto sa akong koneksiyon sa Katolikong Simbahan. Ang laing pari misulti sa akong bana, nga usa usab ka Katoliko, nga kon buot nakong mahimong usa sa mga Saksi ni Jehova, tugotan lang ako kay ang mga Saksi ni Jehova may usa ra ka depekto, ang pagkasobra ka madasigon. Ako nabawtismohan sa dili pa dugay kauban sa usa sa akong mga anak lalaki. Ang akong bana nagatuon usab sa Bibliya ug nagapakitag interes sa mensahe sa Gingharian.”
Samtang giuyog ni Jehova ang mga nasod pinaagi sa pagpamantala sa iyang mga paghukom sa yuta, daghang katawhang mahiligon sa pagkamatarong nagabiya sa malimbongong mga buhat aron mosunod sa mga prinsipyo sa Bibliya. Sa wala pa mahibalo sa kamatuoran, ang usa ka lalaking Italyano misulod sa dakong utang, nga nagbanabana nga siya makabayad sa iyang utang pinaagi sa kuwarta gikan sa iyang regular nga suweldo ug sa malimbongong “mga tip” nga iyang gidawat. Sa pagkabaton sa kahibalo sa kamatuoran, gihimo niya ang lisod nga desisyon ug mihunong sa pagdawat sa malimbongong “mga tip.” Siya ug ang iyang asawa nabawtismohan ug dihadiha misugod sa pag-alagad sa bug-os-panahong ministeryo. Sa ospital nga iyang gitrabahoan, siya kadaghanan maghukas sa mga minatay, ug siya kanunay makakitag dagkong mga kantidad nga kuwarta diha kanila. Pananglitan, kas-a nakakita siyag 150,000 lire (mga $115), ug sa laing panahon 600,000 lire (mga $460). Kay matinud-anon, giuli niya ang kuwarta, ug kadto mihatag kaniyag higayon sa pagsulti ngadto sa tagdumala sa ospital ug sa mga doktor sa kamatuoran. Ang tagdumala sa ospital nagpadala niyag mga sulat sa pagdayeg tungod sa iyang matinud-anon ug responsableng kagawian.
Kining mga kasinatiana gikan sa Italya maoy pila ra ka panig-ingnan sa 7 unsang paagi ang “bililhong mga butang” nagabiya niining daotan, mabangisong sistema ug nagasulod sa hinlo, malinawong organisasyon ni Jehova sa dili pa niya uyogon sa kataposan ang politikanhong sistema ni Satanas hangtod sa pagkalaglag sa Armageddon.