Ang Pamilya sa Maduhaduhaong Kalibotan

Ang Bibliya adunay daghang ikaingon mahitungod sa mga pamilya. Kini nag-ingon nga sila ipasukad gayod sa gugma ug ang padayong bugkos sa duha ka tawo sa usag usa ngadto sa ilang mga anak nalangkit. (Mateo 19:4-6) Bisan taliwala sa mga katilingban nga walay kahibalo sa Bibliya ni sa iyang mga prinsipyo, mga 6,000 ka katuigan sa tawhanong kasinatian napamatud-an ang kahinungdanon sa pamilya.

Apan daghan sa mga batan-on, nakamatikod kon unsay makita sa mga mantalaan, sa mga basahon ug sa mga telebisyon, nakabaton ug pagduhaduha sa kahinungdanon sa kaminyoon karong adlawa. Ang pipila nagaisip sa kaminyoon ingon nga mapig-oton, ug naghunahuna nga ang pagkamatinumanon sa moral ngadto sa laing tawo naghatag utlanan sa ilang “kagawasan.” Nagduhaduha sa karaan, sila nagtuo sa “bag-ong” moralidad​—nga sa tinuoray maoy daang imoralidad ubos sa usa ka bag-ong ngalan. Sila nagpuyo uban sa usang walay tinuod nga pagkomitir sa ilang kaugalingon sa pagtukod sa usa ka tibuok kinabuhing gugma, pagsalig ug panaghiusa.

Molabay ang panahon. Sila magkatigulang. Unya, sa dihang ilang gikinahanglan ang tinuod nga pagkamatinumanon ug pagpaluyo nga angayang ugmaron, ilang mahikaplagan kanunay ang ilang kaugalingon nga ginasalikway, nag-inusara ug subo ang kasingkasing. Diha lamang ilang maamgohan nga ang tawo nga walay pagkakomitido sa usag usa, walay tinguha nga mobalos sa panahon, gugma ug debosyon sa dihang kini tinuod nga gikinahanglan.

Ang Diyos nahibalo kon unsa ang atong pagkagama. Siya nahibalo kon unsa ang labing maayo alang kanato. Ang iyang moral nga mga prinsipyo dili kay dili tagdon o isalikway nga walay seryosong mga sangpotanan. Kini mao ang kamatuoran, bisan unsa pay ikaingon niining maduhaduhaong kalibotan.