Nakahinumdom Ka Ba?

Imo bang nakita ang dili pa dugayng mga gula sa Ang Bantayanang Torre nga may praktikal nga bili kanimo? Nan nganong dili nimo sulayan ang imong panumdoman pinaagi ning mosunod?

◻ Unsay gipasabot ni Jesus sa dihang miingon siya nga walay mahimo niyang tinun-an gawas kon iyang ‘dumtan ang iyang amahan ug inahan ug asawa ug mga anak ug mga igsoong babaye ug lalaki, oo, bisan ang iyang kaugalingong kalag’? (Lucas 14:26)

Si Jesus wala magpasabot nga ang usa sa iyang mga sumusunod kinahanglan sa literal magadumot sa iyang kaugalingong mga paryenti o sa iyang kaugalingong kinabuhi. Hinunoa, ang iyang gipasabot mao nga kinahanglang dili kaayo higugmaon sa tinun-an ang uban o ang iyang kaugalingon kay sa iyang paghigugma kang Jesus.​—1/1, panid 8.

◻ Unsa ang tulo ka butang nga nakaamot sa kalamposan sa misyonerong buluhaton sa Saksi, sa miagi ug sa karong panahon?

Ang usa mao ang personal nga pakigkita sa mga tawo diha sa ilang mga balay. Lain pa mao ang direkta ug yanong pinasukad sa Bibliya nga mensahe sa Gingharian. Ang ikatulo mao ang samag-Kristo nga gugma nga gipakita sa mga misyonero sa pakiglabot sa mga tawo.​—1/1, panid 14.

◻ Nganong temporaryong gidugang sa Diyos ang Balaod sa pakigtugon ngadto sa Abrahamikong pakigtugon?

Ang Balaod sa pakigtugon nagpamatuod nga ang mga Israelinhon mga makasasala nga nagkinahanglag permanenteng saserdote ug usa ka hingpit nga halad. Kini nagbantay sa kaliwat sa Binhi ug nakatabang sa pag-ila kon kinsa kanang maong Binhi. Kadto nagpakita usab nga moabot ra ang adlaw nga ang Diyos makabaton ug usa ka nasod sa mga hari-pari.​—2/1, panid 16.

◻ Unsa ang pito ka progresibong mga pakigtugon sa Diyos nga motultol sa walay kataposang mga panalangin kanatong tanan?

Ang Edenikong pakigtugon, ang Abrahamikong pakigtugon, ang Balaod sa pakigtugon, ang pakigtugon alang sa usa ka saserdote nga sama kang Melchizedek, ang pakigtugon sa Davidikong Gingharian, ang bag-ong pakigtugon, ug ang pakigtugon sa Gingharian.​—2/1, panid 19.

◻ Ang libolibo bang mga panaglainlain sa mga manuskrito sa Bibliya nakapahuyang sa pangangkon sa Bibliya nga mao ang Pulong sa Diyos?

Dili. Ang mga eskolar sa Bibliya nagsulti kanato nga halos kining tanang mga panaglainlain dili kaayo hinungdanon sa teksto. Sila nag-alagad lamang sa paglig-on sa ebidensiya sa pagkatinuod sa Kasulatan. (Salmo 119:105; 1 Pedro 1:25)​—2/1, panid 29, 30

◻ Diin kuhaa ang terminong “agnostiko,” ug sa unsang paagi gigamit kini sa Bibliya?

Ang “agnostiko” gikuha gikan sa Gregong pulong aʹgno·stos, nga nagkahulogan “wala-hiilhi.” Gigamit ni Pablo ang porma niini diha sa iyang pakigpulong sa mga taga Atenas sa dihang naghisgot siyag usa ka paganong halaran nga gipahinungod “Alang sa Wala Hiilhi nga Diyos.” (Buhat 17:23)​—2/15, panid 5.

◻ Unsay atong buhaton kon ang pipila ka Kasulatanhong pagtultol daw bukas alang sa nagkalainlaing mga opinyon?

Atong ipakita ang mapainubsanong pagsanong nga gipakita sa unang mga Kristohanon, sa pagdawat sa mga desisyon ug mga pagtultol sa kongregasyon sa Diyos. (Buhat 15:6-29)​—2/15, panid 20.

◻ Unsay gipasabot ni Jesus sa dihang miingon siya: “Pangita kamog higala alang sa inyong kaugalingon pinaagi sa malimbongon nga bahandi, aron nga inigkahurot na niini kamo ilang pagadawaton ngadto sa dayon nga puloy-anan” (Lucas 16:9)?

Kinahanglan makugihon kita sa paggamit sa bisan unsang bahandi nga atong magamit sa pagsuportar sa intereses sa Gingharian ug busa maugmad ang panaghigalaay kang Jehova ug sa iyang Anak. Sila lamang ang makataganag dapit alang kanato sa langit o sa usa ka paraiso sa yuta sa dihang mahurot o mangawagtang ang materyal nga mga bahandi.​—3/1, panid 9.

◻ Unsang tulo ka butang ang gikinahanglan kanato aron makapahimulos sa salabotan nga gihatag ni Jehova?

Kinahanglang atong pabilhan ang organisasyon ni Jehova; kinahanglang magtuon kita sa regular sa Pulong sa Diyos ug sa tabang nga ginatagana nga makahimo kanato sa pagsabot niana; ug kinahanglang atong palandongon ang atong nakat-onan ug sa unsang paagi ikapadapat kini diha sa atong adlaw-adlaw nga kinabuhi.​—3/15, panid 14.

◻ Nganong ang mga tawo sa karaang Israel milihok uban sa dakong kakulang sa salabotan?

Sila napakyas sa pagpalandong nga mapabilhon sa tanang mga butang nga nahimo ni Jehova kanila. (Salmo 106:7, 13)​—3/15, panid 17.

◻ Unsay gihawasan sa “mga panon sa nagkabayong kasundalohan” nga gihisgotan diha sa Pinadayag 9:16?

Kining simbolikong mga kabayo naghawas dili lamang sa nagkadiyutayng nanghibilin sa mga dinihogan kondili sa nagtubo ug gamhanang “dakong panon” sa “ubang mga karnero.” (Pinadayag 7:9; Juan 10:16)—4/1, panid 19.