Usa ka Katolikong Gumonhap

ANG Katolikong Iglesya karong adlawa nagaatubang ug duha ka suliran maylabot sa Yawa. Sa usa ka bahin, kini maoy sa pagsumpo sa kiling taliwala sa modernong-adlawng mga Katoliko sa pagduhaduha nga naglungtad ang Yawa. Sa laing bahin, kini maoy bahin sa pakiglabot sa daghang dili-opisyal nga mga eksorsismo, o pagpalagpot sa daotang mga espiritu.

Gipahinumdoman ni Papa Juan Paulo II ang mga Katoliko nga kinahanglan seryosong ilhon nila ang Yawa. Diha sa iyang sulat, siya miingon: “Ayaw kahadlok sa pagtawag sa unang mamumuhat ug daotan sa iyang ngalan: ang Usa nga Daotan. Siya nakagamit ug nagpadayon sa paggamit sa mga taktika pinaagi sa dili pagpadayag sa iyang kaugalingon.”

Sa susama, si kardinal Joseph Ratzinger, prelado sa Sagradong Kongregrasyon Alang sa Doktrina sa Pagtuo, sa Roma, miingon: “Bisan unsa pay isulti sa kulag salabotan nga mga teologo, ang yawa, kon bahin sa Kristohanong pagtuo, makalibog apan matuod, personal ug dili kay yanong simbolikal lang nga presensiya. Siya gamhanan nga kamatuoran.”

Si kardinal Ratzinger mipahayag ug dakong kabalaka bahin sa dili-awtorisadong mga tigom maylabot kang Satanas nga gihimo sa mga Katoliko sa daghang nasod. Diha sa iyang sulat nga pinetsahag Septiyembre 29, 1985, nga alang sa tanang Katolikong mga obispo sa tibuok-kalibotan, siya misulat: “Sulod sa daghang katuigan, diha sa pila ka mga iglesya, dugang ug dugang mga tigom sa pag-ampo ang ginahimo sa katuyoan sa pagluwas sa mga tawo gikan sa impluwensiya sa yawa.” Iyang gipahinumdoman ang mga prelado nga sumala sa balaod sa canon, dili mahimong maghimog mga tigom nga walay permiso gikan sa lokal nga obispo ug kana nga mga permiso ihatag sa mga pari lamang. Walay layko ang may katungod sa pagpahayag “sa pormula sa eksorsismo batok kang Satanas ug sa nangahulog nga mga manulonda.”

Ang mantalaang Pranses nga Le Figaro mitaho: “Ang ‘pagsulbong’ sa eksorsismo ug batok-Satanas nga mga kalihokan dayag na sa miaging pipila ka bulan sa Italya, ilabina sa Turin, diin si kardinal Anastasio Ballestrero bag-o pang nagtudlog unom ka bag-ong mga tiggpalagpot ug yawa.” Napabalita sa tibuok-kalibotan, ang mantalaan sa Paris nga International Herald Tribune misulat: “Ang kaikag sa posibleng presensiya ni Satanas sa Turin maoy bahin lamang sa labi pang lapad nga panaghisgot sulod sa Romano Katolikong Iglesya bahin sa pagpakatawhon sa yawa nga gihisgotan sa nagkalainlaing Kasulatan ug sa pagtulon-an sa iglesya ingon nga ‘ang prinsipe niining kalibotana,’ ‘ang gahom sa kangitngit,’ ang ‘karaang serpinti,’ ang ‘tigbutangbutang.’”

Ang membro sa Akademiyang Pransis si Jean Dutourd mihimog makaiikag nga mga komento mahitungod sa modernong-adlawng mga pagduhaduha bahin sa paglungtad ni Satanas​—bisan taliwala sa Katolikong mga prelado. Siya misulat diha sa mantalaang L’Est-Républicain: “Ang pagtuo ug Diyos wala na kaayo kahinangpi karong mga adlawa, apan dugang ug dugang gitugotan kini. Ang pagtuo sa Yawa, hinunoa, gilantaw nga bug-os binuang. Ang yanong paghisgot sa ngalang Satanas . . . makapalingaw kaayo sa mga makinaadmanon, sa mga tawong maarang-arang ug kahimtang, sa mga politiko, ug usab, sa walay duhaduha, sa ubay-ubayng mga obispo. Natingala gayod ako sa ilang pagkatawa tungod kay daw ang Yawa naghatag kanatog partikular nga pagtagad sukad sa 1914.”

Kon ang mga Katoliko lakip sa pipila ka klero, kinahanglang pahinumdoman sa papa ug sa uban nga tinuod gayod nga naglungtad si Satanas, dili ba tungod kay ang iglesya sa daghan nang kasiglohan naghatag dakong pasiugda sa tradisyon, pilosopiya, ug wala-kapamatud-ing siyentipikanhong mga teoriya kay sa Bibliya?

Ang gihisgotan sa ibabaw bahin sa 1914 tukma gayod. Kadtong tuiga mao ang nagtimaan sa tagna sa Bibliya nga sinugdanan sa “kataposang mga adlaw” sa dihang ang Yawa, ingon nga mao “ang magmamando sa kalibotan,” mohimo sa iyang pangataposang paningkamot sa pagdaot sa tanang katawhan. (2 Timoteo 3:1; Juan 14:30) Sumala sa gipahayag sa usa ka Katolikong hubad sa Bibliya: “May moabot nga katalagman​—tungod kay ang yawa nanaog diha kaninyo, nga nahibalo nga hamubo na lamang ang nahibilin niyang panahon.” Maayong dawaton sa sinserong mga Katoliko ang pahayag sa Bibliya. Ngano? Tungod kay ang mga kahimtang sa kalibotan karong adlawa nagpamatuod nga “ang gingharian sa Diyos duol na.”​—Pinadayag 12:7-12; Lucas 21:25-31, The New Jerusalem Bible.

Sanglit ang Gingharian nagsaad nga taposon ang tanang pagkadaotan ug ang mga hinungdan niini, ang pagpapha sa Yawa ug sa iyang mga tigpaluyo duol na. Apan, ang mga tawo lamang nga nahibalo nga naglungtad ang Yawa ang makabarog batok sa iyang pagmando ug makalaom nga maluwas. Sa unsang paagi? Dili pinaagi sa mga eksorsismo, kondili, sumala sa gisulat ni apostol Pablo, pinaagi sa pagsul-ob sa “tibuok hinagiban nga gikan sa Diyos.” Oo, ang Pulong sa Diyos tin-aw: “Sukli ang Yawa, ug siya mokalagiw gikan kanimo.”​—Efeso 6:11-18; Santiago 4:7.

[Hulagway sa panid 26]

Ang Yawa ug ang iyang mga demonyo gitambog sa yuta.​—Pinadayag 12:9, 12

[Kapsiyon sa panid 26]

Picture Book of Devils, Demons and Witchcraft/Ernst and Johanna Lehner/Dover