Usa ka Paglantaw sa Gresya

Ang labing unang iladong nagpuyo sa Gresya gitawag mga Ionian. Gituohan nga kining ngalana naggikan sa ilang katigulangan nga si Javan (Hebreohanon, Ya·wanʹ), usa ka anak ni Japeth ug busa usa ka apo ni Noe. (Genesis 10:1, 2) Sa Kristohanong Gregong Kasulatan sa Bibliya, ang Gresya gitawag Hel·lasʹ. Kini bukiron ug batoon nga yuta, nga may pila ka kabukirang punog kakahoyan. Sa kanhing panahon ang mga Grego nahimong hanas nga mga sakayanon.

Ang karaang mga Grego may daghang diyos, nga gibatbat nga nagbantog tawhanong porma ug dakong katahom. Ang maong mga diyos gituohang nangaon, nanginom, ug natulog; ug bisan pag giisip silang balaan ug dili-mamatay, sila nanental usab ug nanglugos ug takos manglimbong ug makahimog krimen. Ang maon mga kasugiran tingali sa aktuwal maoy natuis nga mga memorya sa wala pa ang Lunop sa dihang ang mga manulondang anak sa Diyos sa pagkarebelyoso nanaog sa yuta, nakigsekso sa mga babaye, nagpatunghag gamhanang mga anak nga gitawag ug Nepilim, ug nagpuno sa yuta sa kabangisan.​—Genesis 6:1-8, 13.

Sa ikaupat nga siglo W.K.P., si Philip sa Macedon, amahan ni Alejandrong Bantogan, misugod sa paghiusa sa nangagi independenteng Gregong mga siyudad-estado, nga gipailalom sila sa paggahom sa Macedonia. Sa ikaduhang siglo W.K.P., ang Gresya nahimong Romanhong probinsiya, ug ang Gregong kultura nakaabot sa Roma.

Ang kaylap nga paggamit koi·neʹ nga Grego nakaamot sa kusog nga pagkaylap sa Kristohanong maayong balita sa tibuok Mediteranyong dapit.

Giduaw ni apostol Pablo ang Macedonia ug Gresya panahon sa iyang ikaduha ug ikatulong misyonaryong paglibot. Giporma niya ang Kristohanong mga kongregasyon sa Filipos, Tesalonica, Corinto, ug Berea. Si Silas, Timoteo, Tito, ug ubang unang Kristohanon nanudlo usab dinhi. Karong adlawa, ang Gresya dunay kapin sa 320 ka kongregasyon sa mga Saksi ni Jehova ug abot sa 23,000 ka magmamantala sa Gingharian sa Diyos.