Ika-84ng Klase sa Gilead Pagkinabuhing Sumala sa mga Pagdahom!
ANG Proverbio 10:28 nagaingon: “Ang pagdahom sa mga matarong mao ang kalipay.” Kana ang kahimtang niadtong buntag sa Marso 6, 1988. Dayag kang bisan kinsa nga naniid nga dako kaayo ang mga pagdahom taliwala sa 4,360 nga nagkatigom sa Jersey City Assembly Hall of Jehovah’s Witnesses.
Ang kamatuoran nga halos ang tibuok nga pamilyang Bethel sa Brooklyn ug Watchtower Farms nakaarang sa pagtigom sa nindot kaayong dapit mismo maoy usa ka hinungdan sa dakong kalipay ug kaukyab! Hinuon, kadtong presente nangabot nga nagdahom ug labaw kay sa dakong reunyon lamang sa pamilya. Naglabi sa ilang mga kaisipan ang butang nga sila nasayod mahimong usa ka halandumong hitabo: ang graduwasyon sa ika-84ng klase sa Watchtower Bible School of Gilead.
Nahimutang karon sa hedkuwarter sa kalibotan sa mga Saksi ni Jehova sa Brooklyn, New York, ang Gilead natukod niadtong 1943 aron mapauswag ang tinudlo-sa-Diyos nga buluhatong ‘paghimog mga tinun-an.’ (Mateo 28:19, 20) Tapos sa pagkompleto sa lima-ka-bulang kurso sa edukasyon sa Bibliya, ang mga graduwado sa Gilead gipadala, dili ngadto sa dakong-sapi nga mga trabaho, kondili ngadto sa tibuok-kalibotang natad ingong mga misyonaryo. (Mateo 13:38) Nan, hisabtan nga ang nakapribilehiyo sa pagtungha sa Gilead may dagkong mga pagdahom.—Itandi ang Lucas 12:48.
Ang programa sa graduwasyon kusganong nagtin-aw sa maong mga gidahom. Kadto gibuksan sa mainitong pag-ampo ni George Gangas, usa ka membro sa Nagamandong Lawas. Si C. W. Barber, nga sakop usab sa Nagamandong Lawas, nagsilbing tsirman niadtong adlawa. ‘Kita nagahimo sa kinadak-ang edukasyonal nga kampanya sa kasaysayan,’ matud ni Barber. Sa pagpasukad sa Isaias kapitulo 6, iyang gisaysay nga kita subsob magsangyaw ilalom sa mga pagsupak. Ug sama sa adlaw ni Isaias, ang simbolikong “ikapulo” lamang, o “salin,” ang mosanong sa atong mensahe. (Isaias 6:13; Roma 9:27) Hinunoa, dili angay nga pagabation nato nga kawang ang atong paningkamot sa pagsangyaw!
Kadtong makapadasig nga mga pulong nagpatunghag kahinam alang sa kon unsay misunod: ang sunodsunod nga mubo, apan kusganong mga pakigpulong gitumong mga graduwado. Si Calvin Chyke sa Komite sa Pabrika misugod pinaagi sa pangutana, ‘Ikaw kaha mahimong panalangin sa uban?’ Sila nakadawat ug daghang panalangin sa Gilead. Karon sila kinahanglang mohatag sa mga panalangin, pinaagi sa paghatag sa ‘espirituwal nga mga gasa’ ngadto sa uban. (Roma 1:11, 12) Bisan pag motungha ang masulayong mga situwasyon, sama sa diyutayng salapi, ang mga misyonaryo kinahanglang mopadayon sa “pagpanghatag” sa espirituwal nga paagi. (Lucas 6:38) Unya ang mga pulong sa Salmo 84:6 mamatuman kanila: “Sa mga panalangin ang magtutudlo nagalimin sa iyang kaugalingon.”
Si David Olson sa Komite sa Departamento sa Pag-alagad sunod nagpahinumdom sa mga misyonaryo sa atong tibuok-kalibotang pag-igsoonay. Sulod sa lima ka bulan napahimuslan nila ang gugma ug pagpaluyo sa mga kasaring—nga unya matibulaag lamang sa maong panahon sa tibuok kalibotan. Gipasalig kanila ni Olson nga matagamtam nila ang katumanan sa Marcos 10:29, 30, nga nagasaad kanilag bag-ong mga higala ug ‘mga pamilya.’
Si Daniel Sydlik sa Nagamandong Lawas nagpasiugda sa panginahanglan sa mga graduwado nga ‘Ugmaron ang Dagko ug Halangdong mga Pagdahom.’ Si Jehova naglalang kanato uban ang katakos sa pagbatog mga pagdahom, mga paglaom, ug mga damgo. Nan, dili ba angay nga ang mga misyonaryo magbaton ug hatag-as nga mga pagdahom sa ilang kaugalingon? ‘Ibutang ang usa ka tumong, himoa ang mga panginahanglan gikan sa inyong kaugalingon!’ mitambag si Sydlik. ‘Hanasa ang pinulongan sa nasod nga iasayn kaninyo. Ipadayon ang pagbasa sa mga isyu sa Bantayanang Torre ug Pagmata! sa inyong kaugalingong pinulongan aron padayong mahuptan ang inyong espirituwalidad. Sa dihang magtudlo sa uban,’ nagpadayon si Sydlik, ‘ibutang ang tag-as nga mga pagdahom diha usab kanila. Ipahibalo kanila nga gidahom nga sila motambong sa mga tigom ug mag-andam daan sa mga leksiyon.’
Ang sunod nga mga mamumulong nagpadayon sa samang diwa. Si Lyman Swingle, nga sakop usab sa Nagamandong Lawas, nagpahinumdom sa mga estudyante: ‘Si Jesu-Kristo mao ang nagapadala kaninyo. Ug siya mismo gipadala sa usa ka langyawng natad dinhi sa yuta.’ Sama kang Jesus, ang mga misyonaryo angay mag-isip nga seryoso sa ilang asaynment. Bisan pa niana, kinahanglang dili sila magseryoso kaayo sa ilang kaugalingon. ‘Batoni ang katakos sa pagkatawa sa inyong kaugalingon kon makabuhat kamog binuang,’ matud ni Swingle. ‘Ang Ecclesiastes 3:4 nagapahinumdom kanatong adunay “usa ka panahon sa pagkatawa.”’
Ang duha ka pangunang instruktor sa tunghaan karon may higayon sa paghatag sa ilang mga estudyante sa kataposang panambag. Ang tema ni Jack Redford mao ‘Ayaw Gayod Hikalimti ang Inyong Misyon!’ Ang klero sa Kakristiyanohan nawad-an sa salabotan niini sa misyon, kay daghan ang nalambiggit sa kalibotanong politika. Hinunoa, si Jesu-Kristo nagtuman sa iyang misyon sa pagwali, nga wala gayod madani sa gitanyag sa kalibotan ni Satanas. Busa ang mga misyonaryo kinahanglang mahinumdom kanunay nganong sila gipadala—sa pagpakaon sa gigutom sa espirituwal nga katawhan. (Itandi ang Mateo 9:36.) Busa kinahanglang ilang likayan ang mga lit-ag sama sa materyalismo ug imoralidad. Pinaagi sa paghatag ug bug-os nga pagtagad sa ilang misyon sa pagwali, sila may kalaomang makapahimulos u daghang maanindot nga mga kasinatian sa kanataran!
Si U. V. Glass misunod uban sa usa ka ilustrasyong naglangkit sa usa ka basong tubig ug kutay sa perlas. Sa daghang kayutaan ang kaputli sa usa ka basong tubig kaduhaduhaan. Samang kaduhaduhaan mao ang pagkatinuod sa kutay sa perlas. ‘Komosta ang inyong pagkakatuohan?’ nangutana si Glass. ‘Ang kakulang sa pagkakatuohan gitawag “ang hilom nga magdadaot sa mga relasyon.”’ Sa unsang paagi ang mga graduwado makaugmad sa ilang pagkakatuohan? ‘Isulti ang tinuod,’ matud ni Glass, ‘nga dili magdaot o magtuis niana. Ang pagkamatarong mao ang patukoranan sa pagkakatuohan.’—Efeso 4:25.
Usa ka haylait sa buntag mao ang kataposang pakigpulong sa 94-anyos nga presidente sa Watch Tower Society, si F. W. Franz. Sa tingog nga lig-on gihapon ug kusog, gisubli ni Franz ang kasaysayan sa Gilead. Panahon sa ikaduhang gubat sa kalibotan, ang Nagamandong Lawas nakasabot nga ‘ang Gubat sa Kalibotan II dili molahos sa Armageddon. Kana matapos ug mosunod ang usa ka yugtong malinawon.’ Ang Gilead gitukod sa pagpahimulos sa bug-os sa maong kal-ang nga yugto—ug kini kusganon sukad masukad! ‘Kita nagapuyo sa labing maayong mga panahon!’ mipatugbaw ang presidente sa Sosyedad. Ang mamiminaw nagpahayag sa apresasyon niini sa tambag sa maong karaan nang alagad ni Jehova pinaagi sa masipang pakpak!
Ang mga kurtina sa maong panahon gibuk-san, nga nagpadayag sa 24 ka estudyante sa ika-84ng klase sa Gilead nga naglingkod sa entablado. Bisan pag nag-aberids lamang sa 31.6 anyos sa edad, sila dili bag-ohang mga magwawali. Aw, ang ilang aberids maoy 11.3 ka tuig sa bug-os-panahong pagsangyaw! Ug ang ilang grupo may pagkainternasyonal, nga naggikan sa Netherlands, Australia, Pinlandiya, Sweden, Alemanya, ug Tinipong Bansa. Sa tabang ni A. D. Schroeder, usa sa orihinal nga mga instruktor sa Gilead, si C. W. Barber nagtunol kanila sa ilang mga diploma. Ang mamiminaw nahinam sa pagkahibalong ang mga graduwado igapadala ngadto sa siyam ka nasod: Pilipinas, Sierra Leone, Western Samoa, Taiwan, Tanzania, Papua New Guinea, Bolivia, Guam, ug Colombia! Dayon ang nindot nga sulat sa apresasyon gibasa sa usa sa mga estudyante alang sa klase.
Tapos sa hamubong pahulay alang sa paniudto, ang mamiminaw nagtigom pag-usab alang sa pinamubong Pagtuon sa Bantayanang Torre, nga gidumala ni Robert Wallen sa Bethel nga Komite. Sa pagkatapos sa pagtuon, ang mga suga gipahiyong. Ang tsirman sa programa miawhag sa mamiminaw nga ‘magrelaks ug pahimusli ang gasa sa mga estudyante kaninyo, ang programa sa mga estudyante sa ika-84ng Klase, nga nag-ulohang: “Paghimaya sa Atong Ministeryo.”’
Pinaagi sa mga awit, mga kasinatian, ug mugbong mga drama, ang mga estudyante sa maong panahon nagpresentar sa sulod nga pagtan-aw sa kinabuhi sa estudyante ug misyonaryo. Pananglitan, gipakita sa unsang paagi ang nagkadaiyang teritoryong sangyawanan sa New York City gigamit ingon bansayanan sa misyonaryo. Usa ka kataw-anang mubong drama, nga gibase sa tinuod nga mga kasinatian sa mga estudyante, nagpakita sa unsang paagi ang mga estudyante nakatuon sa paghatag ug epektibong dili-pormal nga pagsangyaw sa sub-ways sa siyudad. Gihulagway usab sa kataw-anan, apan tinuod, nga paagi mao ang mga esena sa paghimo sa mga misyonaryo sa kadaghanan balikwaot nga mga pagpasibo ngadto sa langyawng kultura ug mga batasan.
Usa ka migraduwar nga misyonaryo nagsu-ma pag-ayo sa programa. sa pag-ingon: ‘Unsay labi pang maayong paagi sa paghimaya sa atong ministeryo kay sa pagtabang sa uban sa pagbutang sa ilang bug-os nga pagsalig sa Pulong ni Jehova?’ Walay duhaduhang ang tanang nanambong nadasig sa pagpalandong sa unsang paagi sila makabatog labawng personal nga bahin sa buluhatong pagsangyaw. Ingong panapos, ang mga estudyante niadto mipasundayag sa usa ka modernong-adlawng drama nga nagpasiugda sa panginahanglang kita magpasakop sa Diyos. Ang laing halandumong okasyon niadto natapos uban sa mapabilhong pag-ampo ni J. E. Barr sa Nagamandong Lawas.
Sa walay duhaduha, ang programa sa graduwasyon sa Gilead nahimo nga sumala sa mga pagdahom. Apan komosta man ang migraduwar nga klase mismo? Kami masaligon nga, sama sa mga nag-una kanila, kining kinaulahiang grupo sa migraduwar nga mga misyonaryo labaw pang magkinabuhi sumala sa gidahom, oo, sa gikinahanglan, gikan kanila ni Jehova—nga ilang himayaon ang ilang ministeryo diha sa ilang langyawng mga asaynment!
[Hulagway sa panid 24]
Ika-84ng Migraduwar nga Klase sa Watchtower Bible School of Gilead
Sa listahan sa ubos, ang mga lumbay ginumerohan sa atubangan paingon sa likod ug ang mga ngalan gilista gikan sa wala patuo sa matag lumbay.
(1) Norberg, C.; Holmes, T.; Holland, J.; Vehlen, B.; Rector, D.; Thomas, K. (2) Rajalehto, T.; Rajalehto, T.; Hoefnagels, J.; Moonen, A.; Summers, C.; Wahl, H. (3) Holland, J.; Holmes, F.; Hoefnagels, H.; Koivula, V.; Moonen, M.; Thomas, B. (4) Wahl, M.; Rector, W.; Summers, G.; Keighley, P.; Vehlen, P.; Norberg, O.