‘Gipahinungod sa Dakong Diyos si Jehova sa Walay Kataposan’

NIADTONG Abril 1935, ang usa ka iladong Amerikanong ministro ug mamumulong miduaw sa Hawaii. Kadto nakaikag nga linain sa mga Saksi ni Jehova, nga may gidaghanon lamang nga 12 niadtong panahona, sanglit ang maong inilang bisita mao si Joseph F. Rutherford, ang ikaduhang presidente sa Watch Tower Bible and Tract Society. Ang pakigpulong “Kinsay Momando sa Kalibotan?” naghisgot sa umaabot nga pagmando sa kalibotan sa Gingharian sa Diyos. Kadto gipahayag sa awditoryum sa usa ka lokal nga hayskul ug nahimantala pag-ayo.

Ang ngalan sa Diyos ug ang iyang Gingharian mao ang tema sa buluhaton sa pagsangyaw sa mga Saksi ni Jehova sukad sa ilang modernong-adlawng pagsugod. Busa makaikag sa tanan nga nagapabili ug nagagamit sa personal nga ngalan sa Diyos nga labing gamhanan, si Jehova, nga ang Hawaiianong katumbas, ang Iehova, kasagarang gigamit sa unang Hawaiianong mga magsisimba. Usa sa unang mga simbahang gitukod sa mga ministro sa Kakristiyanohan sa Hawaii, ang batong simbahan sa Kawaiahao sa Honolulu, may batong pamag-ang nga gipahiluna niadtong 1839. Nahisulat sa ibabaw sa maong batong napahinungod mao ang mga pulong: “Kang Iehova nga among Diyos hangtod sa kahangtoran.”

Sukad 1935, sa miduaw si Judge Rutherford, ang buluhaton sa mga Saksi ni Jehova sa Hawaii miuswag gikan sa 12 lamang ka aktibong Saksi ngadto sa kapin ug 5,400 karong adlawa. Sila tinuod nga ‘gipahinungod sa dakong Diyos si Jehova sa walay kataposan.’