Ang Pagkamatinud-anon ba Kinaraan?
ANG pagpasiugda sa pagkamatinud-anon ingong dalan sa kinabuhi—kinaraan ba kana sa modernong kalibotan, gisalikway ingong dili na praktikal o walay tinuod nga bili? Daw ingon gayod niana. Palandonga lang ang pila ka pananglitan kon unsa ka kaylap ang pagkadili-matinud-anon, ang mga porma niini, ang mga sukod nga kini mikaylap, ug unsa ka mahal nga palas-anon kini.
Sa katuigang dili pa dugay, ang paglimbong sa buhis sa Kasadpang Alemanya gibanabana nga $10 bilyones (U.S.) sa usa ka tuig, ug sa Sweden ang kantidad sa usa ka tuig moabot ug $720 (U.S.) kada tawo. Busa kon ikaw nagpuyo sa bisan hain niining yutaa, nakaapekto ang pagkadili-matinud-anon sa imong ginabayad nga mga buhis. Ang paglimbong sa buhis alang sa kinitaan kaylap kaayo diha sa Tinipong Bansa nga tungod niini naalkansi ang kagamhanan ug gibanabanang $100 bilyones sa buhis sa usa ka tuig. Hunahunaa kon unsa ka dakong tabang nianang kawartaha sa pagpamayad sa makalipong nga depisit sa badyet sa kapangulohan! Dugang pa, gipanikasan sa ilegal nga mga negosyo ang kagamhanan sa T.B. ug laing $10 bilyones. Ang pagpangawat ug pagpangiriw nakapildi sa mga tindahan sa Tinipong Bansa ug $4 bilyones sa usa ka tuig, nga maoy nakapataas sa mga prisyo sa mga baligya. Ang panikas sa pagpasingil sa mga pagtawag sa telepono sa long distance diha sa ubang numero sa telepono nakapildi sa mga Amerikano ug $1 milyones sa usa ka tuig.
Sa Canada ang “kawatan ug panahon,”—kadtong nag-usik-usik sa panahon diha sa trabahoan, nakapildi sa ilang mga amo ug $15 bilyones (sa Canada) sa matag tuig, “sobra sa tulo ka pilo ang total nga alkansi tungod sa kiriwang mga empliyado, panghukhuk, paglimbong sa seguro, sa bandalismo, sa mga kickback, sa tinuyong pagsunog ug ubang mga krimen batok sa negosyo.” Sumala sa 1986 nga pagtuon, ang palas-anon sa pagpangawat sa Tinipong Bansa maoy $170 bilyones sa usa ka tuig.
Ang malamposong multimilyong-dolyar nga mga kompaniya sa mahakugong nagapangawat gikan sa ilang kaugalingong mga kagamhanan. Sa unsang paagi? Pinaagi sa pagpamaligya kanilag mga gamit ug mga piyesa nga hilabihan ka taas nga prisyo: ang 12-sentabos nga yawi sa tornilyo giprisyohag $9,606 (U.S.); 67-sentabos nga mga transistor giprisyohag $814; ang 17-sentabos nga plastik nga putos sa tiil sa bangko giprisyohag $1,118. “Naghisgot kamog bilyonbilyong dolyares” sa alkansi sa kagamhanan, miingon ang senador sa T.B.
Dugang pa sa ibabaw, ang dili maayong pananglitan sa tanang bahin sa iladong mga tawo nakapaluya sa pagkahimong matinud-anon. Sumala sa imo nang nasayran, ang mga lider sa ubang mga nasod nagapamakak, nagalipod, nagatabon, ug nagalikay sa ilang kaakohan—oo, bisan sa pagpatay sa mga kaatbang sa politika ug ipasangil kini sa ubang tawo.
Busa ang pagkamatinud-anon ba kinaraan? Dili na ba kini ang labing maayong lagda? Labing maayo lang ba ang pagkamatinud-anon tungod kay gisugo kita sa Pulong sa Diyos nga kinahanglang magmatinud-anon kita? Ang sunod nga artikulo importante kanimo kon gusto nimong matubag kining mga pangutanaha.