Usa ka Mapabilhong Tigulang
Usa ka 79-anyos nga babaye gikan sa Japan natandog sa pagsulat sa mosunod tapos nakabasa sa Hunyo 1, 1987, nga gula sa Ang Bantayanang Torre bahin sa tema “Kinsay Moatiman sa mga Tigulang?”
Alang sa mga Igsoon nga Akong Gitahod,
Dihang nagtuon sa Hunyo 1, 1987, nga gula bahin sa mga tigulang, akong nakita ang materyal nga labing masinabuton ug maluluton. Sa dihang nakaabot ako sa parapo 11, mikuha akog panyo tungod kay nagsige na lamang akog hilak ug dili makapugong. Kadto maoy mga luha sa dakong pasalamat. Pagkadako sa gugma ug kalulot! Ang akong mahimo lang mao kanang gipamulong sa Salmo 150—dayega si Jah! Mapaubsanong gihatag ko ang akong dakong pasalamat kaninyo mga igsoon sa pagpatik niining mahunahunaong mga artikulo bahin sa pagpakitag kalulot sa mga tigulang, hangtod sa gamayng mga detalye. Siyempre, mapasalamaton ako sa maayong mga artikulo nga inyong ginapatik matag bulan, ug kulang ang mga pulong sa pagpahayag sa akong apresasyon. Sa makausa pa, nagpasalamat ako kaninyo.
Makalilipay, ang tanan diha sa among kongregasyon mahigugmaon ug maluluton kaayo. Ila akong kuhaon ug ihatod sa ilang mga awto gikan sa teritoryo sa pagsangyaw, ug tungod sa ilang malulutong serbisyo, usa ako ka auxiliary payunir. Mapasalamaton kaayo ako sa adlaw-adlaw nga ako nabuhi diha sa usa ka katingalahan ug mapanalipdanong organisasyon.
Diha sa kalibotan karon, nga niini mas daghan ang mga tawong tigulang apan wala na kaayo tagda, wala nay mas bililhon pa kay sa mga panalangin nga atong nadawat gikan sa mahigugmaong Diyos. Maoy akong pag-ampo nga makatabang akog daghang tawo kutob sa maarangan sa pagkakat-on sa kamatuoran aron sila makabaton ug kalipay uban kanato.
Iya kang Jehova ang pagdayeg ug salamat kaninyo, minahal kong mga igsoon. Pasayloa ang akong bati nga agi, nga gikaulaw ko. Hinaot nga panalanginan kamo ni Jehova ug hatagan kamog maayong panglawas.
Usa ka walay-bili nga tigulang babaye, [pinirmahan] Nogami
Ang mga pulong ug mga pagbating sama niini nagpamatuod nga ang tinuod nga gugmang Kristohanon walay utlanan o limitasyon sa panuigon. Ang mga Saksi ni Jehova, batan-on ug tigulang, nagapakita sa ilang pagkadisipulo pinaagi sa pagsunod sa mga pulong ni Jesus: “Pinaagi niini ang tanan mahibalo nga kamo akong mga disipulo, kon kamo adunay gugma sa usag usa.”—Juan 13:35.