Gikan sa Pagkaulipon sa Paghimog-Tisa Ngadto sa Kagawasan!
ANG mga piramide ba sa Giza (kasikbit sa modernong Cairo) makapahinumdom sa giabusohang mga ulipon nga nagtrabaho ilalom sa mainit nga adlaw nga nagguyod sa pagpahimutang sa dagkong mga bato? Ug imo bang mahanduraw ang Hebreohanong mga ulipon taliwala kanila?
Sa pagkatinuod, ang mga piramide sa Ehipto nga makita sa sunod nga panid pinetsahan balik pa sa panahon dihang ang pamilya sa amahan ni Jose nga si Jacob (kun, Israel) mibalhin ngadto sa Ehipto. Apan mas komun kay sa pagtukod ug dagkong mga bato mao ang paggamit ug mga tisa, nga gihimo sa milyonmilyon ilalom sa mao gihapong mainit nga adlaw.
Ang mga Hebreohanon nga gidawat sa Ehipto sa panahon ni Jose gipanalanginan sa Diyos pinaagi sa pagpadaghan kanila, nga nakapalisang sa mga Ehiptohanon. Atong mabasa: “Sila gibutangan nila [ang mga Hebreohanon] ug mga tinugyanan sa buhat, aron sa paglisod kanila diha sa ilang mga lulan; ug nagpatindog sila ug mga siyudad . . . Ang mga Ehiptohanon naghimo sa mga anak sa Israel nga ulipon ug gipiotan. Ug gipait nila ang ilang mga kinabuhi tungod sa mabug-at nga trabaho sa paghimog pinagba nga yuta ug mga tisa.”—Exodo 1:7-14.
Sa tuo, imong makita nga nagahimo gihapon ug mga tisa ang Ehipto, ang uban gipauga diha sa dangkahanan sama sa usa nga makita dinhi. (Itandi sa Genesis 11:1-3; 19:28.) Apan, tingali ang kadaghanan sa karaang mga tisa sa mga Ehiptohanon pinauga sa adlaw. Ang nagpabilin mao ang paggamit ug dagami sa paghimog mga tisa. Makita ang mga dagami diha sa mga tisa nga nakalotan sa kagun-oban sa karaang Beer-sheba (gisal-ot).
Ang pagdugang ug dagami makalig-on sa mga tisa. Sa paghimo tisa, ang lapok (o yutang kolonon), tubig, ug dagami hinayhinayng tamakan sa tiil, dayon piiton diha sa mga molde, ug dayon ibulad. Handurawa ang pagtrabaho niini sa tibuok adlaw sa adlaw-adlaw. Siyempre, imong masabot kon nganong ang mga Israelinhon ‘nag-agulo tungod sa pagkaulipon ug nanagtuaw sila, nga sa ingon ang ilang pagpangayog panabang midangat ngadto sa tinuod nga Diyos.’—Exodo 2:23.
Nakadungog kanila si Jehova ug gipadala si Moises kang Paraon aron makabaton ug kagawasan ang mga Israelinhon. Apan, gipasamot hinoon sa mapahitas-ong Paraon ang ilang lulan. Karon sila na mismo ang manigom sa ilang dagami, ug gipadayon gihapon ang ilang pahat sa paghimog mga tisa sama sa miagi. Aw, sama gayod kini sa sentensiya sa kamatayon! Ang Diyos miingon: “Karon makita mo kon unsay buhaton ko kang Paraon, kay pinaagi sa kamot nga kusgan iyang abugon sila.”—Exodo 5:1–6:1.
Tingali nahibalo ka na sa nahitabo. May katakos si Jehova sa pagpukan sa daogdaogang Paraon. Tapos sa hampak sa kamatayon, ang Diyos ‘nagpagawas sa mga anak sa Israel gikan sa yuta sa Ehipto.’ (Exodo 12:37-51) Gibiyaan ang mga piramide, mga tisa, ug mabangis nga pagkaulipon, mibaktas ang Israel paingon sa Yutang Saad. Kining historikal nga mga kamatuoran nagapasalig kanato sa katakos ni Jehova nga Diyos sa pagtagana ug tinuod nga kagawasan alang sa mga Kristohanon sa umaabot nga bag-ong kalibotan, uban sa yutan-ong Paraiso niini.—Itandi sa Roma 8:20, 21.
[Bug-os panid nga letrato sa panid 31]
[Tinubdan sa letrato sa panid 2]
Photos, pages 30, 31: Pictorial Archive (Near Eastern History) Est.