Ang Supremong Persona Walay Katumbas

ANG SUPREMONG PERSONA. Nagtuo ka ba kaniya? Bisan pa sa kaylap nga pagpalayo gikan sa mga iglesya diha sa kadaghanang mga yuta, milyonmilyon nagtuo gihapon sa labing-gamhanan, mapuangurong Persona nga kadangpan, ilabina kon sila may problema.

Pananglitan, sa Aprika adunay daghang lokal, tradisyonal nga mga relihiyon nga dako kaayog kalainan sa usa ug usa ug nga nagasimba ug nagkalainlaing mga diyos sa daghang mga ngalan. Bisan pa, ang kadaghanang mga tawo lig-ong nagtuo sa usa ka Supremong Persona nga “walay katumbas” ug “ang bug-os nga magmamando sa uniberso.”

Sumala sa gibatbat sa libro ni Dr. Peter Becker nga Tribe to Township, ang usa ka tigulang nga magwawali nga Sotho sa Habagatang Aprika miingon: “Ang akong tigulang nga amahan ug ang iyang amahan . . . dugay nang nahibalo bahin sa Diyos, ang Molimo, sa wala pa moabot ang mga misyonero, ang Diyos nga Supremong Persona nga maoy naglalang sa tanang mga butang . . . Hinungdanon ba nga tawgon namo [sa Basuto] ang Diyos, nga Molimo, sa Zulu, Nkulunkulu, sa Xhosa, Thixo . . . ?”

Sa pagkatinuod, makalibog ang daghang mga ngalan. Hayan mouyon ka nga ang Diyos sa uniberso managsama alang sa tanang tawo ug nga kinahanglang may unibersohanong ngalan. Ang dinasig nga koleksiyon sa karaang mga sinulat, ang Bibliya, tinamod sa tibuok globo. Kini nag-ingon: “Aron sila makaila nga ikaw lamang, kansang ngalan mao si Jehova, ikaw lamang ang Labing Hataas sa tibuok nga yuta.” (Salmo 83:18) Busa, sumala sa Bibliya, ang Supremong Persona adunay walay katumbas nga ngalan.

Unsang matanga sa Persona kining usa nga Diyos, sumala sa gipadayag sa Bibliya? “Ang tanan niyang mga dalan matarong”; “usa ka Diyos nga maloloy-on ug mapuanguron, mahinay sa kasuko ug dako sa mahigugmaong kalulot ug kamatuoran”; “malumo ug maloloy-on”; “Diyos, dili sa kasamok, kondili sa kahusay”; “ang Diyos gugma.”​—Deuteronomio 32:4; Exodo 34:6; Santiago 5:11; 1 Corinto 14:33; 1 Juan 4:8.

Gipadayag usab sa Bibliya nga si Jehova mao lamang ang bugtong usa nga angay simbahon. Oo, sanglit kay walay katumbas, makataronganong nangayo siya ug ekslusibong debosyon. (Exodo 20:5) Si Jesu-Kristo miingon: “Si Jehova nga imong Diyos mao lamang ang simbaha, ug siya lamang ang hatagi ug balaang pag-alagad.”​—Mateo 4:10.

Bisan pa niana, ang kadaghanang mga Aprikano, samtang nangangkon nga nagtuog Supremong Persona, nagasimba ug daghang mga diyos. Dili ba nagpakita kana kanimo ug usa ka kalibganan bahin sa pagkapersona o kinaiyahan sa Diyos? Apan bisan diha sa dakong bahin sa Kakristiyanohan, ang matin-aw, halangdon, nga persona sa Diyos gipahanap pinaagi sa paglantaw kaniya nga usa ka trinidad sa Diyos. Tingali imong nadunggan kini ingong Santisima Trinidad, ang doktrina nga misteryoso ug malisod sabton. Pananglitan, ang pulyetong The Blessed Trinity nag-ingon: “Ang doktrina sa Santisima Trinidad . . . misteryo . . . Dili kini mapamatud-an pinaagi sa katarongan . . . Dili kini mapamatud-an nga kini posible.”a (Italiko ilaha.) Ang pulyeto midugang: “Busa, ang pamatuod, nga usa kini misteryo mao ang pagpakita nga anaa kini diha sa pinadayag, diha sa Balaang Kasulatan.”

Apan gitudlo ba gayod kining doktrinaha sa Balaang Kasulatan? Ang Supremong Persona ba tulo ka persona sa usa ka Diyos?

[Mga footnote]