Diyos Siya ba Tinuod nga Persona?
“KINAHANGLANG may Diyos” mipahayag ang Agosto 14, 1981, isyu sa Daily Express. Ang mantalaan nagtaho sa dayag nga pagkakombertir sa duha ka iladong siyentipiko ngadto sa pagtuo sa Diyos. Ang ilang bag-ong-kaplag nga pagtuo mitungha tapos sa pagdiskobre sa katingalahang matematikal nga probabilidad batok sa pagtungha nga kinaiyanhon sa kinabuhi. Bisan pa niana, unsay gipasabot nianang duha ka bag-ong magtutuo sa miingon silang “Diyos.” Mitaho ang Daily Express: “Ang Diyos nga ilang gipasabot, MAO ang uniberso.”
Kon ikaw nagtuo ug Diyos, unsa ang imong pag-isip kaniya? Ginaisip mo ba usab siya ingong dili-ikabatbat nga intelihensiya, usa ka abstraktong puwersa nga omnipresente, usa ka dakong “Usa ka Butang”? O ginaisip mo ba siyang usa ka mabatbat, intelihenteng Persona?
Ang pipila malisdan sa paghunahuna nga ang Diyos usa ka persona. Bation pa gani nila tingali nga ang pagbuhat niana magpakunhod kaniya ngadto sa pagkasama na lamang sa tawo—sama sa binata nga larawan sa usa ka tawong tigulang nga nagsul-ob ug hataas nga biste, ug may pandong uban ang taas ug puting bungot, nga naglingkod sa panganod. O sumala sa pagdibuho ni Michelangelo sa Diyos diha sa kisame sa iyang bantog nga kapelyang Sistine—usa ka maskulado, kusgang lalaking tigulang nga nagalutaw sa kahanginan.
Matuod, inigkabati nato sa pulong “persona,” kita awtomatikong maghunahuna sa usa ka tawo. Pananglitan, ang Webster’s Third New International Dictionary nagbatbat sa “person” o persona ingong “usa ka indibiduwal nga tawo.” Apan kini nagabatbat usab sa “person” o persona ingong “usa nga gitiman-an sa may-hunahuna nga panabot, gahom sa pangatarongan, ug moral nga diwa.” Busa, ang usa tukmang makahunahuna sa Diyos ingong usa ka Persona nga walay paghulagway kaniya ingong tawo.
Apan ang pipila tingali motutol: ‘Unsa may deperensiya kon kaha imong isipon ang Diyos ingong abstraktong puwersa o ingong Persona?’ Aw, kon ang Diyos usa lamang ka puwersa, nga “Usa ka Butang,” wala ba kini magpasabot nga ang tawhanong kinabuhi susamang bug-os mekanikal? Sa ingon ang tawo makunhod ngadto sa usa ka “kini,” usa ka ngipon sa usa ka dakong makina. Apan kon ang Diyos usa ka intelihenteng Persona, dili ba kana mohatag sa kinabuhi ug labaw nga kahulogan? Tinuoray, kana magbukas sa posibilidad sa pagbatog usa ka relasyon uban sa Diyos—usa ka relasyon dili tali sa duha ka “mga kini” kondili tali sa duha ka persona.
Dayag, ang persona-sa-persona nga relasyon uban sa Diyos labing tilinguhaon. Apan sa unang bahin, unsaon nato pagkahibalo kon kaha ang Diyos usa ka Persona o dili? Ug, kon siya mao man, sa unsang paagi atong mabatonan ang maong relasyon? Atong tan-awon kon unsay ginaingon sa Bibliya bahin niini.