Dili Patambongon ang mga Bata sa mga Tigom?

‘ANG mga masuso ug mga bata angay dili dad-on ngadto sa balay sa Diyos.’ Kana ang pagbati sa iladong komentarista sa Bibliya si Adam Clarke. Hinuon, siya mihatag ug pagtugot sa kabos nga inahang ‘walay makaatiman sa iyang anak samtang siya wala diha.’ Kana sila katugotan sa pagdala sa ilang mga anak sa simbahan “bisan pag lisod alang sa kongregasyon, ug alang sa pila ka ministro, nga makabati sa paghilak sa usa ka bata.”

Gipasukad ni Clarke ang iyang batok-bata nga pagkamadapigon sa teksto sa Bibliya sa Nehemias 8:2, nga mabasa: “Sumala niana gidala ni Esdras nga saserdote ang kasugoan sa atubangan sa kongregasyon sa mga lalaki ingon man sa mga babaye ug sa tanang may pamuot na sa pagpamati.” Ugaling, ang maong paghubad nagasupak sa espiritu sa Deuteronomio 31:12: “Tigoma ang katawhan, ang mga lalaki ug ang mga babaye ug ang mga bata . . . aron sila makapamati ug aron sila makakat-on.”​—Tan-awa usab ang 2 Timoteo 3:15.

Tungod niini, mopatim-aw nga sa paghikay sa maong tigom wala sa hunahuna ni Nehemias ang pagpahigawas kang bisan kinsa. Hinunoa, ang tuyo sa pagdapit lagmit mao ang pag-apil sa tanang “may pamuot na sa pagpamati,” sa pagdasig sa bug-os nga pagpakiglangkit! Pagkadili-makataronganon ang paghangyo sa mga ginikanan nga ibilin ang ilang mga anak nga walay magbantay!

Makaiikag, ang mga Saksi ni Jehova karong adlawa gidasig sa pagdala sa ilang mga masuso ug mga anak ngadto sa Kristohanong mga tigom. Matuod, may panahong kini tingali makapahinabog ginagmayng pagkatugaw ug diyutayng kalisod alang sa mga ginikanan. Apan ang Kristohanong mga ginikanan nagapaningkamot sa pagbansay sa ilang mga anak sa paglingkod nga hilom. Sa nahaigong panahon ang ilang mga bata mahimong “may pamuot na sa pagpamati” ug pagdawat sa mohatag-kinabuhi nga impormasyon.​—Hebreohanon 10:24, 25.