“Magtigom Kamo”

SI Jeremias nagsulti sa mga pulong sa ibabaw samtang ang ang karaang Jerusalem ug Juda nameligro sa katalagman. Dinalian niadto nga ang mahinulsolon, matuod nga mga magsisimba ni Jehova magtigom alang sa kaluwasan. Sa susama karong adlawa, ang apostatang Kakristiyanohan hapit nang mahanaw sa “dakong kagun-oban,” duyog sa imperyo sa bakak nga relihiyon sa tibuok kalibotan. Bisan pag ang katuigan milahutay sukad sa 1914, dihang ang klero sa Kakristiyanohan mihatag ug bug-os nga pagpaluyo sa pag-ula sa dugo sa Gubat sa Kalibotan I, “ang nagsilaob nga kasuko ni Jehova wala motalikod” sama gayod sa susamang yugto sa panahong milahutay sa mga pagmando sa mga hari sa Juda gikan sa sad-an-sa-dugong si Manases ngadto sa walay-pagtuo nga si Zedekias. Ang mga maaghop sa yuta karon kinahanglang mangita kang Jehova aron maluwas.​—Jeremias 4:5-8; 2 Hari 24:3, 4; Sofonias 2:2, 3.

Sa unsang paagi ang modernong-adlawng pasidaan gihatag? Ang magasing imong ginabasa karon maoy usa ka epektibong instrumento. Nga walay hunong sukad sa 1879, kining magasina, samag magbalantay ibabaw sa iyang bantayanang torre, nag-awhag sa pagtagad ngadto sa umaabot nga pagkapukan sa bakak nga relihiyon, ingon nga gihulagwayan sa Babilonya, ug sa malinawong Milenyong Pagmando ni Kristo nga mosunod. (Isaias 21:6-12; Pinadayag 20:2, 3; 21:1-4) Gikan sa unang isyu nga may 6,000 ka kopya sa Ingles, kini miusbaw hangtod nga Ang Bantayanang Torre​—Nagapahayag sa Gingharian ni Jehova karong adlawa nagapahimulos sa tibuok-yutang sirkulasyon nga 12,315,000 ka kopya diha sa 103 ka pinulongan. Dugang pa, ang format niini miuswag latas sa katuigan. Kini giimprenta karon sa upat ka kolor diha sa 21 ka pinulongan, apan ang ubang edisyon anaa usab sa madanihong dagway, ingon nga nahiangay sa bililhong misyon sa magasin.

Tungod sa pag-uswag sa produksiyon, kinahanglan ang pagbulagbulag sa pag-imprenta, mao nga kini karon gidumala sa mga pabrikang gipadagan sa Sosyedad diha sa 35 ka sangang buhatan sa gawas sa Tinipong Bansa. Dugang pa, gikan sa Enero 1987, ang mga edisyon sa among kaubang magasing ang Pagmata! nga giimprenta sa Tinipong Bansa, Brazil, Britanya, Canada, Denmark, Pinlandiya, Alemanya, Italya, ug Hapon maanaa sa upat ka kolor. Sa Tinipong Bansa kini naposible sa pag-instalar sa tulo ka MAN-Roland tulin kaayong rotary presses sa magasin sa Watchtower Farms Factory sa Wallkill, New York.

Ang sangang buhatan sa Sosyedad sa Hapon nagagamit usab sa tulo ka tulin kaayong mga makina sa paggamag mga Bibliya, mga libro, ug mga magasin diha sa ubay-ubayng pinulongan sa Asia. Dugang pa, kining sangaha nakahatag ug dakong suportar sa mga sanga sa Australia, Korea, ug South Africa sa pagsangkap kanila sa upat-kolor nga mga makina sa imprenta, mao nga kining tulo ka sanga karon nagabalhin ngadto sa upat-kolor nga pag-imprenta sa magasin.

Latas sa katuigan, may pag-ambitay sa mga katigayonan taliwala sa mga sanga sa Sosyedad, nga ang organisasyon sa hedkuwarter maoy nanguna. Busa daghan ang naayudahan sumala sa panginahanglan, kon kaha kini maoy sa pagpanukod o pagpadako sa mga tinukod sa sanga, pagsangkap kanila, o sa pagsuportar sa hinungdanon-sa-tanang buluhaton sa pagsangyaw sa kanataran. Ang maong “pag-angay-angay” nga paagi, nga gipaposible sa daghang mga amot sa mga Saksi ni Jehova sa tibuok yuta, tugob gipanalanginan ni Jehova.​—2 Corinto 8:12-15.