Mga Magmamantala sa Gingharian Nagtaho

“Katingalahang Distritong Kombensiyon”

KINI ang pangunang-ulohan sa usa ka mantalaan sa Martinez de la Torre, Veracruz, Mexico, mahitungod sa usa ka kombensiyon sa mga Saksi ni Jehova nga gihimo nianang siyudara. Ang mantalaan mikomento: “Ang daghang tumatambong sa distritong kombensiyon sa [mga Saksi ni Jehova] nga gihimo sa lokal nga Exposition Grounds mao ang labing mabutyagong pasundayag sa usa ka talagsaong hitabo sa tibuok kalibotan sa atong mga adlaw: ang nagauswag nga kawalay pagsalig sa mga tawo sa mga doktrina sa gitawag ‘Kristohanong’ mga iglesya ug sa lig-ong pagtuo nga makalilisang kaayo ang mga suliran nga ang mga gobyerno walay gahom sa pagsulbad.

“Wala pa sukad makatigom ang usa ka politikanhong tigom o sosyal nga okasyon sa maong panon nga nagpadayag sa ingong kahusay ug kahinlo. Yanong katingalahan ang pagkakitag 5,000 ka tawo nga mabinantayong nagpatalinghog sa usa ka programang nasentro sa linain sa impormasyon gikan sa Bibliya ug nagahisgot sa mga bahin sa matag-adlawng kinabuhi gikan sa pagmatutog mga anak ug pagkinabuhing nahiusa ingong pamilya ngadto sa moralidad ug espirituwal nga kahimsog, uban ang pagdrama sa estorya sa Bibliya ug kapadapatan niana sa modernong panahon.”

Tapos sa pagkomento bahin sa “dakong pasundayag sa nahiusang kahanas ug organisasyon,” ang balita miingon: “Ang bili sa kalihokang gihimo sa lokal nga mga Saksi ni Jehova masukod sa mga resultang nakab-ot sa pila ra ka tuig. Karong adlawa kini usa ka asosasyong nagatubong kusog kaayo, nga wala gayod mabalaka sa negatibong mga komento nga kasagarang nagalibot kanila. Bisan unsang negatibong butang ang ipasangil kanila mahanaw dihang mapanid-an sa usa ang ilang baroganan bahin sa mga butang nagalibot kanila, ang husayng paagi sa ilang pag-uswag, ang ilang pagtahod sa awtoridad, ug ang dakong apresasyong ilang naangkon tungod sa kahinlo ug maayong sinultihan.

“Kining mga estudyante sa Bibliya nalangkoban sa halos 100 porsiento sa kanhing mga aktibista sa nagkalainlaing relihiyon, nga kadaghanan Katoliko, nga nakamatikod sa pagkiling sa relihiyon ngadto sa politika ug pagdawat niini ug pag-uyon sa dili-Biblikanhong mga buhat sama sa pagsagol sa mga relihiyon o interfaith, imoralidad, ug kapintasan. Nahimong tinubdan sa katagbawan nga sila magpahiuyon sa Kasulatanhong mga prinsipyo sa panggawi nga dili moliso sa idolatriya o sa mga tradisyon nga hanap ug sinugdanan. Kini nakahatag kanilag dalayegong panaghiusa sa pagtuo nga nagapalahi kanila bisan diin sila hikaplagan.”

Ang maong mga komento nagapahinumdom kanato sa prinsipyo nga gipahayag ni Jesus: “Pinaagi sa ilang mga bunga inyong mailhan sila.” (Mateo 7:16) Daghang buotan ug kasingkasing nga mga tawo sa Mexico nakaila sa pagka-Kasulatanhon sa mga pagtulon-an sa mga Saksi ni Jehova, nakig-uban kanila, ug tugob gipanalanginan sa espirituwal nga paagi ni Jehova nga Diyos.

[Hulagway sa panid 29]

Kasagarang talan-awon sa kombensiyon sa Mexico