Ang Pagkabanhaw ni Jesu-Kristo—Dili Sugilanon

ANG asoy ba sa Bibliya bahin sa pagkabanhaw ni Jesus tinumotumo lamang? Dili pa dugay ang International Herald Tribune mitaho mahitungod sa pagtuki nga gihimo sa Hudiyohanong magsusulat nga ginganlag Pinchas Lapide. Ang iyang konklusyon? Ang pagkabanhaw dili sugilanon.

Daghang butang ang miagak kang Lapide ning konklusyona. Una, ang mga asoy sa Ebanghelyo naghinugilon nga tulo ka babaye ang miduaw sa lubong ni Jesus ug nakakita nga walay sulod kadto. Apan sa karaang mga panahon, ang mga babaye “giisip nga dili makahatag ug katuohang pulong,” miingon ang taho sa Tribune. Gani, ang kaugalingong mga disipulo ni Jesus wala motuo sa mga babaye! Busa dili gayod mahitabo nga gituyo sa pagmugna kining sugilanona.

Gihisgotan usab ni Lapide ang dakong epekto sa pagkabanhaw ni Jesus diha sa Iyang mga disipulo. Gikan sa usa ka grupo sa mga lalaki nga hadlokan kaayo nga sa ingon ilang gitalikdan si Jesus sa gidakop siya, sila “nahimo sa usa lamang ka gabii nga masaligon may misyong katilingban, nga kombinsido sa kaluwasan.” Mitaho ang Tribune sa pangatarongan ni Lapide: “Walay panan-awon kun taligmata ang igong makapatin-aw ning bag-ong kausaban.”

Sa kataposan, anaa ang sumbong nga gikawat lamang sa mga disipulo ni Jesus ang iyang lawas. Bahin niini si Gg. Lapide mitubag: “Magpasakit ug magpalutos ba ang mga mangingilad sa ngalan sa usa ka handurawan, hangtod sa malipayong pagkamartir?” Bisag si Gg. Lapide dili magtutuo ni Jesus ingong Mesiyas, siya wala magduhaduha nga ang gipamulong sa manulonda sa duha ka libo ka tuig kanhi matuod: ‘Si Kristo nabanhaw.’—Mateo 28:6.