Gidungog nga mga Pag-abuso sa Gahom Karon

DIHA sa kasugoan nga gihatag pinaagi kang Moises, ang Maglalalang puwersadong nagsaway sa pagdawat ug mga suborno sa kabahin sa mga maghuhukom. (Exodo 23:8; Deuteronomio 10:17; 16:19) Atong nakita ang pagkamaalamon sa maong mga instruksiyon pinaagi sa pagtan-aw sa pila ka bag-ong mga kaso sa mga pag-abuso sa gahom sa mga opisyal.

Ang usa nga nalangkit niini mao si Maghuhukom Martin T. Manton. Balik sa 1918 misulay siya sa pagbabag sa mga paningkamot sa mga Estudyante sa Bibliya, nga maoy pagtawag niadto sa mga Saksi ni Jehova, sa pagpiyansa alang kang J. F. Rutherford ug sa pito niya ka kauban. Kining walo ka Kristohanong ministro giakusar nga nangilabot sa paningkamot sa gubat ug gipadala sa pederal nga bilanggoan sa Atlanta, Georgia. Ang korte sa apelasyon nga naghusay sa ilang kaso gilangkoban sa tulo ka huwes, lakip kang Manton. Siya misupak, apan ang duha ka huwes miuyon sa apelasyon, ug ang dili tukmang silot nabaliskad.

Unsang matanga sa huwes si Manton? Gitawag siya sa prensa nga “ang labing hataas nga hudisyal nga huwes [sa Tinipong Bansa] sunod sa siyam ka Huwes sa Korte Suprema.” Usa usab siya sa labing iladong layko sa Amerika, gihimo siya sa papa nga “Knight of St. Gregory.” Ang pagkapukan ni Manton miabot sa gihukman siya nga sad-an ug gisentensiyahag duha ka tuig sa bilanggoan ug gipamultag $10,000. Alang sa unsa? Sa pagbaligya sa mga desisyon sa hukmanan. Dugang pa niana, may pagkabaga ang iyang nawong sa pagpanapi sa moatubang kaniya, nanghulga nga gawas kon bayran siya ug dakong kantidad, mopakanaog siya ug sentensiya nga batok kanila. Ang The New York Times miingon mahitungod kaniya: “Ang pagpanapi nagatubod sa Pederal nga hukmanan.” Pagkadako nga pag-abuso sa gahom sa hukmanan!

Sa ulahing mga katuigan laing iladong kaso mitungha, may labot kang Spiro Agnew, bise presidente sa Tinipong Bansa gikan sa 1969-73. Giakusar siya nga nangawkaw sa kagamhanan ug libolibong dolyares, ug busa miluwat siya. Di pa dugay sa 1983, iyang gibayran ang estado sa Maryland ug kapin sa $250,000 tungod sa mga hiphip nga iyang gidawat.

Unya anaa si Richard M. Nixon, nga mipili kang Agnew sa pagdagan ingong bise presidente. Ang komite sa Senado sa U.S. nga nag-atiman sa kaso sa Watergate mirekomendar nga ikiha si Nixon sa tulo ka sumbong: nga iyang giabusohan ang iyang gahom sa pagkapresidente; nga iyang gibabagan ang hustisya; ug nga wala niya tagda ang subpoena. Tingali nahibalo ka nga miluwat siya sa Agosto 9, 1974, nga may nahibilin pang duha ug tunga ka tuig sa iyang pagkapresidente.

Ang ingon nga pag-abuso sa gahom kaylap sa tibuok-yuta. Pananglitan, ang magasin sa Canada nga Maclean’s sa Hulyo 15, 1985, mitaho bahin sa “walay kontrol nga mga parti sa sekso sa Parliament Hill . . . ug sa walay awtorisasyong pagsuhol.” Kini nag-asoy nga diha sa parti usa ka labaw nga opisyal sa kagamhanan miingon sa 30-anyos nga babaye: “Kon dili nimo huboon ang imong senina, wala kay trabaho.”

Sa samang yugto, usa ka internasyonal nga magasin sa balita mipatik sa artikulong “Kadaotan Nakapahinay sa Kauswagan sa Tsina.” Kini mitaho: “Halos kada adlaw, ang opisyal nga prensa adunay mga asoy sa pagpanuwitik, nga nalangkit ang dagko ug ranggo nga mga opisyal.”

Dili pa dugay, ang The New Zealand Herald, ubos sa ulohan: “Tunglo sa Kadaotan Dakong Hulga sa ‘Suwertehon nga Nasod,’” mitaho sa panghunahuna sa retiradong huwes: “Ang Australia, sa tunga-tunga sa katuigang 1980, adunahan, masaligon ug daotan.” Ang artikulo naghisgot ug “sistema sa hustisya nga sa nangaging katuigan nakakitag huwes gikan sa labing taas nga korte sa yuta nga nabilanggo ug gihimo kana halos kada adlaw sa makakurat nga ebidensiya sa kapolisan nga nagdawat ug suborno.”

Matin-aw nga ang tanang mga tig-abuso sa gahom wala magtagad sa prinsipyo nga gipamulong ni Kristo: “Walay tinabonan nga dili pagaukban, ug walay tinagoan nga dili mahibaloan.”​—Mateo 10:26.