Mga Magmamantala sa Gingharian Nagtaho
Mga Rasa Nagkahiusa sa South Africa!
ANG Imbali maoy usa ka lungsod sa itom sa gawas lamang sa Pietermaritzburg, Natal, sa South Africa. Sa gihatagan ug lote ang duha ka kongregasyon sa mga Saksi ni Jehova sa Imbali, ang mga ansiano sa puti ug sa Dekolor nga mga kongregasyon sa Pietermaritzburg nagtigom dayon sa pagplano sa unsang paagi sila makatabang sa ilang itom nga kaigsoonan sa pagtukod ug Kingdom Hall sa labing mubong panahon nga posible. Bisan tuod ang trabaho sa pagtukod mikabat sa kapin ug siyam ka bulan, sa aktuwal mikabat lamag 48 ka adlaw sa pagtrabaho sa pagtapos sa buluhaton, nga kadaghanan gibuhat sa mga Sabado.
Alang sa lokal nga mga molupyo sa Imbali, ang pagtukod sa maong Kingdom Hall nagpasundayag sa butang nga ilang gihunahuna nga imposible gayod. Handurawa lamang ang tinagkawhaang puti, Dekolor, ug Indian nga mga Saksi nga nangabot nga nagpanon sa lungsod gikan sa Pietermaritzburg ug Durban ug nagtrabahong abaga sa abaga duyog sa Aprikanhong itom nga mga kongregasyon! (Itandi ang Sofonias 3:9.) Ang mga lalaki, mga babaye, ug mga bata tanan nagpasa sa materyal ug kasangkapan sa usag usa ug nangaon sa usa ra ka lamesa. Ang ingong rasanhong panaghiusa dili igdungog sa usa ka Aprikanhong lungsod, ilabina niining panahon sa kagubot! Segurado, kini usa ka dili-malalis nga ebidensiya nga ang mga Saksi ni Jehova maoy nahiusang katawhan nga tinuod nagamahal sa usag usa.
Sa pagkomento bahin sa maong panaghiusa, usa ka silingan miingon: “Ang pagkakitag mga puti, mga itom, Dekolor, ug Indian nga nagbuhat nga nagkahiusa nakapatingala kanamo. Dili namo masinati ang ingong kooperasyon sa among mga simbahan.” Ang alkalde sa Imbali, si Mr. Pakkies, mitambong sa dedikasyon sa tigomanan niadtong Nobyembre 10, 1985, ug mipahayag ug katingala sa panaghiusa ug determinasyon sa mga Saksi sa paghuman sa maong dakong proyekto sa ilang kaugalingon. Iyang gisuma kon giunsa nila pagbuhat kana pinaagi sa pagpahayag, “Kini mabuhat lamang tungod sa gugma.” Pagkatinuod! Ug dili ba si Jesus mismo miingon: “Pinaagi niining gugmaha nga inyong nabatonan sa usag usa, ang tanan mahibalo nga kamo akong mga tinun-an”?—Juan 13:35, The Jerusalem Bible.
Tungod kay nagsingabot nga tulin ang kataposan sa presenteng sistema sa mga butang, ang mga Saksi ni Jehova sa tibuok South Africa nakaamgo sa panginahanglan sa pagtukod ug mga Kingdom Hall diha sa mga lungsod ug kabalangayan sa itom sa labing madali. Ang unang Kingdom Hall sa Soweto gipahinungod sa Pebrero 1985. Ang daghan pang uban ginatukod pa. Sa 700 ka kongregasyon sa kanataran sa mga itom, mga 70 dunay ilang kaugalingong mga Kingdom Hall, busa adunay dako kaayong panginahanglan nga pagatagan-an. Ang tigomanan sa Imbali nagatabang sa pagtagana niana nga panginahanglan. Kini makapalingkod ug 400 ka tawo, kinsa, nga hamugaway, makakaon sa hinungdanong espirituwal nga pagkaong ginadulot dinha. Oo, diha sa maong mga sentro sa edukasyon sa Bibliya, ang mga mahigugmaon sa pagkamatarong nagatuon sa unsang paagi sila makalabang-buhi sa kalaglagan niining sistema sa mga butang aron maangkon ang kinabuhi diha sa bag-ong sistema sa Diyos diin ang tanang rasa sa katawhan magpuyo sa walay kataposan ingong usa ka nahiusang pamilya!