Gugma Nakatabang

SAYO sa miaging tuig duha ka bagyo ang miagi sa Korea. Sa pipila lamang ka oras, ang ubang dapit nalubog sa kapin sa 20 ka pulgada (50 cm) sa ulan. Ang resulta mao ang labing grabeng baha nga miagi sa nasod sulod sa 40 ka tuig. Kapin sa 200,000 ka tawo ang nawad-ag puloy-anan, ug 181 ang gitahong nangamatay ug nangawala. Mokabat ug milyonmilyong dolyares ang napilding propidad, ug ang kadaot sa pananom sa uma dili mabanabana.

Misugod ang ulan sa Biyernes sa gabii ug nagpadayon sa tibuok adlawng Sabado. Nalapawan ang unom ka dam sa itaas nga Han River, misaka ang tubig sa suba ug kapin sa usa ka piye ug tunga (0.5 m) nga sobra sa lebel sa pagkaluwas sa peligro. Sa buntag sayo sa Dominggo, nga walay pasidaan, miliki ang awasan, ug ang bul-og sa tubig sa baha miawas sa kanait nga kalungsoran. Sa nagkahubas ang tubig nianang gabhiona, duolan sa 60,000 ka tawo niining dapita ang nawad-an sa ilang mga puloy-anan.

Ang tanang bahin sa lungsod naigo sa baha. Apan ang kaulohang siyudad sa Seoul, diin adunay 174 ka kongregasyon sa mga Saksi ni Jehova, mao ang pinakagrabeng naigo, ilabina sa duha ka dapit nga gialagaran sa Kongregasyon sa Mangwondong ug Sungnaedong. Taliwala kanila ang total nga 130 ka pamilyang Saksi nawad-an sa ilang mga balay. Dihadiha ug sa kinabubut-on, misanong ang mga Saksi ni Jehova sa Korea sa mga panginahanglan sa ilang isigka-Kristohanon.

Bisag naputol ang mga linya sa telepono sa daghang mga dapit, misugod pagpangabot ang mga taho sa sangang opisina sa Watch Tower Society. Duha ka komite ang giporma dayon sa pag-organisar sa hinabang alang sa mga Saksi sa duha ka grabeng napayhag nga lugar. Gisultihan ang magpapanawng mga sirkitong magtatan-aw sa Seoul sa pagpakigkita sa mga igsoon sa pagsusi kon diin ang panginahanglan ug unsang tabang ang mahimo alang sa duha ka pinakagrabeng naigo nga lugar.

Nahibalo ang mga Saksi sa ubang dapit sa sukod sa kadaot pinaagi sa balita sa TV. Misugod sila sa pagtawag sa sanga sa pagpangutana kon asa magpadalag mga donasyon sa ilang mga igsoong nahiagom sa kadaot. (Mitawag usab ang sanga sa Watch Tower sa Japan, mitanyag sa pagtabang.) Misugod pagpangabot ang donasyong salapi gikan sa tanang bahin sa nasod. Bugas humay, miki, ug ubang mga pagkaon, besti ug mga habol. Giapod-apod dayon kini sa mga komitiba diha mismo sa lugar. Daghan kaayo ang gihatag sa mga igsoon nga sa ulahi gipahibalo sa opisina sa Seoul nga wala nay panginahanglag donasyong kuwarta.

Dayon miabot ang dakong buluhaton sa paghinlo. Tulo ka gatos ka Saksi ang mibulonter niining trabahoa. Gipadala sila nga parisparis ngadto sa matag balay sa pagtabang sa paghinlo ug sa pagbalik sa mga butang sa normal sa mas madaling panahon. Ang usa ka boluntaryo miingon: “Pinaagi sa pagbansay diha sa atong mga asembliya ug sa mga organisasyon sa kombensiyon, nasayod kami kon unsaon sa pagtinabangay ug sa pagtapos sa mga buluhaton.” Nasuko ang kadaghanan sa komunidad sa ilang nakita nga gipahimuslan sa ubang tawo ang mga biktima. Sa laing bahin, natingala sila sa pagkakita sa kalma, malipayon, ug matinabangong tinamdan sa mga Saksi, bisan sa malisod kaayong mga kahimtang.

“Napasundayag sa makausa pa,” miingon ang usa ka Saksi diha sa nahitaboan, “nga kanang katalagmana makapukan sa atong materyal nga mga butang sa kalit, apan dili kana makapukan sa atong pagtuo.” Uban sa mga luha sa kalipay, ang usa ka Saksi nga babaye miingon: “Bisan pag nawala kanamo ang tanang butang, dili ikaingon nga makaluluoy kami. Ang mainit nga gugma sa atong mga igsoon nakahatag kanamog kalig-on.”

Sa pagkatinuod, katingalahan ang pagtan-aw sa gugmang nagalihok. Ang inisyatibo sa mga Saksi diha sa nahitaboan ug ang pagsanong dayon niadtong ‘may relasyon sa pagtuo’ tagsaon. (Galacia 6:10) Ang mga igsoon sa Korea nadasig gayod ning eksperyensiyaha. Kombinsido sila pinaagi sa maayong pagkaorganisar nga pagtabang nga mahigugmaong gihatag nga adunay usa lamang ka katin-awan—ang gugma nakatabang!