Determinadong Makigtigom
“LABING kusog nga ulan sa 80 anyos mipatay ug 28,” kana ang mabasa sa mga pangunang-ulohan sa pagkaugma. Sa unom ra ka oras, gikan sa 2 s.b. ngadto sa 8 s.b., ang total nga mga 10 pulgada (25 cm) ang mibunok sa amihanang Taiwan. Ilabinang naapektahang grabe mao ang Taipei City. Nianang pila ra ka oras, ang kon unsay normal nga dag-um sa usa ka bulan mibundak, nga mipahinabog baha abot sa 13 ka tiil (4 m) sa pipila ka dapit. Apan ang amihanang Taiwan mao ang dapit nga gikan niana ang mga Saksi ni Jehova mag-asembliya niadtong adlawa, ug ang Taipei mao ang siyudad nga himoan sa ilang asembliya! Sila makaarang ba sa pagtigom sa ikaduhang adlaw sa ilang kaduha-sa-tuig sirkitong asembliya?
Sa mimata ako niadtong adlawa, Hunyo 3, 1984, ang akong asawa ug ako wala makaamgo unsa ka grabe ang bagyo. Ang kusog nga pagbunok kasagaran na sa tinghabagat, ug kami wala kaayo maghunahuna niana. Inanay, ang talagsaong kahilom nadayag. Ang mga bus sa siyudad, nga kasagaran mohunong matag pila ka minutos atubangan sa apartment nga among gipuy-an, wala na magbiyahe. Ug sa dihang, sa 7:30 s.b., napalong ang koryente, nasugdan namo pag-ila nga kadto dili kasagarang ulan sa habagat. Kay nabalaka sa asembliya nga naeskedyul nga mosugod sa 9:55 s.b., akong giteleponohan ang tagdumala sa mikropono sa asembliya sa pagtinong adunay gipaandar-sa-bateriyang kasangkapan sa mikropono ug mga plaslayt didto enkasog mapalong ang koryente panahon sa programa.
Sa maomaong panahon, misugod kami pagkabati gikan sa among mga silingan ug mga higala mahitungod sa kaylap nga pagbaha sa among seksiyon sa siyudad. Kay determinadong tua sa asembliya panahon sa sesyon sa buntag, kami nanlakaw dayon tapos sa alas 8 s.b. nga sakay sa among motorsiklo alang sa kasagaran 20-minutos nga pagsakay paingon sa Assembly Hall. Sa nakabiya na kami sa among kalye, among naamgohang may suliran sa pag-agi. Ang upat ka lainlaing ruta nga gisulayan namo dili maagian sa nagpaduol kami sa ubos nga dapit. Sa daghang beses sa nangagi kami nakaagi sa tubig nga 12-16 ka pulgada (30-40 cm) sa giladmon samtang nagduaw sa mga kongregasyon panahon sa ting-ulan. Apan karon, bisan ang mga bus ug mga trak nangaaberiya sa abot sa hawak nga tubig. Busa among giuli sa balay ang motorsiklo ug mihukom sa pagbaktas sa dapit. Determinado gihapon kaming makigtigom uban sa among espirituwal nga mga igsoon niadtong adlawa.
Ang pagbaktas napamatud-ang lisod. Bisan tuod mituang na ang ulan niadto, ang tubig mipadayon sa pagtaas. Ang lagom nga katubigan namuhagay samag mga tubod gikan sa mga kanal ug manhole samtang nagpadulong kami sa Subang Ching Mei, kay ang midakong katubigan luyo sa mga dike labi pang taas kay sa yuta sa palibot. Kami naghawiray nga hugot ug inanay miubog agi sa kusog nga sulog—nga mainampingong nagsusi sa matag tikang aron kami dili mangahulog sa mga bangag. Sa diha na lang nga kami nakaabot sa ibabaw sa taytayan sa suba nga bug-os namong naamgohan ang pagkaseryoso sa kahimtang. Ang niadto kasagarang gamay nga sapa sa tunga sa lapad nga agianan sa suba nga gigamit sa pagtanom sa utanom ug pagbuhig mga baboy, mga 49 ka tiil (15 m) ubos sa taytayan, sa maong panahon maoy kusog nga sulog nga nakapuno sa kanal sa suba halos abot sa tumoy sa mga dike—ug mga 3 ka tiil lamang (1 m) ubos sa taytayan!
Ang baha sa pikas nga bahin sa taytayan mipatim-aw nga labi pang grabe. Apan ang pila ka lalaking nakaagi miingong ang kahimtang sa dalan dili ingon ka daotan ug ang mga bus ug taksi nagbiyahe pa sa kadalanan didto. Busa kami mipaingon niadtong dapita. Apan samtang kami nagkalayo, mipatim-awng mas kusog ang sulog. Ang akong misis, nga mubo kay kanako, kinahanglang mangupot nga hugot kanako sa paghupot sa iyang panimbang. Unya kami nakaabot sa usa ka lugar nga daw dili maagi. Gikan sa usa ka dalan sa kilid, ang kusog, lalom, samag-subang agos sa tubig nagbuhagay. Ikalipay, duha ka pisi ang gitaod latas nianang seksiyona, ug pinaagi sa pagpanghawid niana kami nakaagi ra. Samtang kami nagpadayon ngadto sa bulubungtod ang tubig mikunhod ug sa kataposan kami nakahunong, naghaw-as sa tubig gikan sa among botas ug sa ingon migaan ang among mga tiil.
Sa pagkaabot sa unang wala-bahai nga dalan, giatubang namo ang laing suliran nga nakababag sa among pag-abot sa Assembly Hall: Ang pila ka bus nga nagbiyahe tuman ka puno ug ang kadaghanang taksi dili magpasakay. Apan sa kataposan ang usa ka taksi, nga may pasahero na, mihunong alang kanamo. Tapos ang daghang pagliko aron makalikay sa gibahaang mga lugar kami nakaabot sa Assembly Hall sa lapas ug diyutay sa 10 s.b.
Sa among kalipay, ang kadaghanang Saksi didto na ug naghulat sa pagsugod sa asembliya. Ang tanan nanlimbasog gayod aron makaabot didto, nga miubog sa nagkalainlaing giladmon sa tubig, kay ang mga bus ug motorsiklo—kasagarang gigamit sa kadaghanan—dili makaagi. Pagkatagsaon ang pagkakita sa ilang pagpabili sa programa sa asembliya! May 417 lamang ka Saksi sa maong seksiyon, apan daghang interesadong tawo ang misagubang sa baha sa ilang determinasyon nga makigtigom uban kanila ug mapreskohan sa espirituwal nga mga kamatuoran sa Bibliya. Ang tumatambong nga 629 sa sesyon sa buntag misulbong ngadto sa 764 alang sa pangunang pakigpulong sa hapon! Kapin sa 30 ka tawo ang nangamatay tungod kay nalumos o tungod sa mga banlas sa lapok sa among dapit sa amihanang Taiwan, apan walay mausa niadtong determinadong makigtigom ang nakaagom sa kadaot. Salamat sa panalipod ni Jehova, ilang napahimuslan ang nindot nga programa.
Oo, kami masaligong si Jehova magapanalipod kanatong tanan sa atong determinasyon nga makaadto sa asembliya—nga walay pagkabalakang hinobra sa atong mga balay ug sa mga butang didto. Ug sa pagkamatuod, walay mausang mitambong ang nakaagom ug seryosong kapildihan o kadaot. Apan kaming tanan nakabatog dakong kaayohan tungod sa tam-is nga pakig-uban sa among isigka Kristohanon ug sa talagsaong programa nga gipresentar. Kadto nagpamatuod kanamo nga, bisan pag sayon ang pag-oktaba sa pag-adto sa Kristohanong mga miting o mga asembliya dihang adunay pipila ka kalisod, kadtong maningkamot tugob pagagantihan.—Tinampo.