Umaw nga Silinganan Alang sa Kabataan

SA INANAY ang modernong katilingban nag-usab sa silinganan alang sa pagtubo sa himsog nga bata gikan sa tambok ngadto sa umaw nga silinganan, matud ni Propesor Edward A. Wynne, University of Illinois. Iyang gibasol ang hinobrang indibiduwalismo, kabahandianon, ug kapakyasan sa relihiyon. “Hisabtan nganong gibati sa pila ka ginikanan nga nasamok,” matud ni Propesor Wynne diha sa The Wall Street Journal. “Ang pipila mosurender ug ang may-katakos nga mga magtiayon nagaplano sa paglangan o paglikay pa sa pagmatutog anak.” Siya nagatambag sa pangontrang mga lakang, sama sa paghimo sa mga magtiayon sa seryosong pagkakomitir sa hustong pagmatutog anak, nga tingali mag-apil sa pagpakig-uban sa usa ka relihiyon nga nagadasig sa panaghiusa sa pamilya ug nagadahom sa pagkalangkit gikan sa mga membro niini, nga sagolan ang disiplina sa gugma, ug pagsakripisyo sa madungganong mga tumong.

Gipasiugda sa Bibliya kining maong panginahanglan kasiglohan kanhi. Kini nagatambag sa mga ginikanan: “Matutoa sila [mga anak] sa Kristohanong pagtulon-an diha sa Kristohanong disiplina.” (Efeso 6:4, Phillips) Ang Pulong sa Diyos dugang nagatambag: “Tigoma ang katawhan, ang mga lalaki ug ang mga babaye ug ang mga bata . . . aron sila makapatalinghog ug makakat-on.” (Deuteronomio 31:12) Ang kanunay nga pagpadapat niining mga prinsipyoha tinong motabang sa mga pamilya sa pagbuntog sa paubos nga pagbira sa modernong katilingban.