Naglungtad ba ang Diyos?—Pipila ka Siyentipiko Mitubag
ANG propesor sa pisika nga si Ulrich J. Becker, sa Massachusetts Institute of Technology, miingon sa dihang mikomento bahin sa paglungtad sa Diyos: “Sa unsang paagi ako milungtad kon walay maglalalang? Wala akoy nahibaloang makapakombinsir nga tubag nga gihatag sukad.”
Kasukwahi ba kini sa iyang siyentipikanhong mga panglantaw? Ang makapukaw-sa-hunahuna nga tubag sa propesor mao, “Kon imong nadiskobrehan kon sa unsang paagi ang usa ka ruyda sa ‘orasan’ motuyok—mahimo kang magbanabana kon sa unsang paagi molihok ang ubang ruyda, apan wala kay katungod nga tawgon kining siyentipikanhon ug mas maayo pang dili tubagon ang pangutana kon kinsa ang nagpahugot sa kuwerdas.”
Kasukwahi sa opinyon sa pipila, daghang tinahod nga mga lalaki sa siyensiya ang wala magwagtang sa ideya nga dunay Diyos—usa ka Dakong Utok luyo sa paglalang sa uniberso ug sa tawo.
Tagda ang duha pa ka panig-ingnan niining puntoha. Sa dihang ang propesor sa matematika nga si John E. Fornaess, sa Princeton University, gipangutana sa iyang mga hunahuna bahin sa paglungtad sa Diyos, siya mitubag: “Ako nagtuo nga dunay usa ka Diyos ug nga ang Diyos maoy nagtukod sa uniberso sa tanang hut-ong gikan sa yanong mga partikulo ngadto sa buhing mga butang ngadto sa dagkong mga hugpong sa mga galaksiya.”
Ang propesor sa pisika nga si Henry Margenau, sa Yale University, miingon nga kombinsido siya nga ang mga balaod sa kinaiyahan gilalang sa Diyos, nga midugang: “Ang Diyos naglalang sa uniberso gikan sa wala sa usa ka buhat nga nagpalungtad usab sa panahon.” Unya miingon siya nga sa librong The Mystery of Life’s Origin, tulo ka siyentipiko ang misaysay nga ang usa ka Maglalalang maorag kasaligang katin-awan sa sinugdanan sa kinabuhi. Nagpaluyo niini nga panglantaw, ang astronomo nga si Fred Hoyle nag-ingon nga ang pagtuo nga ang unang selula misugod nga sulagma ra maoy sama sa pagtuo nga ang usa ka unos nga miigo sa usa ka tambakan nga puno sa nagkabulagbulag ug nagkalamukat nga mga piyesa sa Boeing 747 nga ayroplano makapatungha ug 747.
Niining mga tubaga ikadugang ang mga pulong sa magsusulat sa Bibliya nga si Pablo: “Ang dili-makita nga mga hiyas [sa Diyos] tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo, bisan gani ang iyang dayong gahom ug pagka-Diyos.”—Roma 1:20.
Oo, ang Diyos naglungtad gayod! Apan unsay iyang rason sa pagtugot sa presenteng makaluluoyng kahimtang sa kalibotan? Unsay iyang katuyoan alang sa yuta? Tukma ba natong mahibaloan kon kinsa ang matuod nga Diyos?
[Blurb sa panid 3]
“Kon imong nadiskobrehan kon sa unsang paagi ang usa ka ruyda sa ‘orasan’ motuyok—mahimo kang magbanabana kon sa unsang paagi molihok ang ubang ruyda, apan . . . mas maayo pang dili tubagon ang pangutana kon kinsa ang nagpahugot sa kuwerdas”