Nganong Dili Siya Motuo ug Diyos?
SI Olesya, usa ka batan-ong babaye sa Rustavi, Georgia, kanhing republika sa Unyong Sobyet, nagpakita sa duha ka bisita ug usa ka letrato sa iyang mga ginikanan ug miingon: “Kon adunay Diyos, dili gayod unta niya tugotan nga mamatay ang akong mga ginikanan dihang sila bata pa kaayo!” Human nga ang bana ni Olesya, si Tamazi, miabot sa balay, ang mga bisita nagbilin kanila sa mga brosyur nga Tagamtama ang Kinabuhi sa Yuta sa Walay Kataposan! ug “Tan-awa! Ginabag-o Ko ang Tanang Butang.”
Sa dihang gibalikduaw ang magtiayon, nabasa na ni Olesya ang “Tan-awa!” nga brosyur ug buot nga motuon sa Bibliya. Nagustohan niya ang iyang nabasa. Panahon sa panaghisgot nga misunod, siya daling nakaabli sa brosyur ug gibasa ang mga bahin nga iyang namarkahan. Ang makataronganong mga argumento nakapahingangha kaniya.
Pananglitan, ang brosyur nag-ingon: “Ang mahimayaong mga kahibulongan sa kinaiyahan nga nagaalirong kanato—ang kabulakan, ang kalanggaman, ang kahayopan, ang kahibulongang linalang nga gitawag tawo, ang mga milagro sa kinabuhi ug sa pagkatawo—kining tanan nagpamatuod sa dili-makitang Batid nga Intelihensiya nga nagbuhat kanila. (Roma 1:20) Kon dunay intelihensiya, dunay hunahuna. Kon dunay hunahuna, dunay usa ka persona. Ang kinalabwang intelihensiya mao ang iya sa Kinalabwang Persona, ang Maglalalang sa tanang buhing butang, ang Tuboran mismo sa kinabuhi. (Salmo 36:9) Ang Maglalalang takos gayod sa tanang pagdayeg ug pagsimba.—Salmo 104:24; Pinadayag 4:11.”
Sa ulahi mitug-an si Olesya nga ang saad sa Diyos sa pagbanhaw sa namatay nga mga minahal nagtukmod kaniya nga buot motuon sa Bibliya. Kami nagtuo nga ikaw usab makabenepisyo gikan sa nagapalig-on-sa-pagtuo nga impormasyon nga anaa niining mga brosyura. Kon buot nimog kopya sa Tagamtama ang Kinabuhi sa Yuta sa Walay Kataposan! ug “Tan-awa! Ginabag-o Ko ang Tanang Butang” o buot nga may usang moduaw aron pagdumala ug usa ka libreng pagtuon sa Bibliya sa balay, palihog pagsulat sa Watch Tower, P.O. Box 2044, 1060 Manila, o sa nahiangayng adres nga gilista sa panid 5.