“Ang Gugma Dili Gayod Mapakyas”—Ikaw Mapakyas Ba?
UNSA ang gugma? Sa tibuok kalibotan, adunay mga sanglitanan nga nagpasiugda sa bili sa matuod nga gugma. Ang sanglitanan sa Zulu nag-ingon, “Ang gugma dili mopilig dahon sa balili nga higugmaon niini.” Sa Pilipinas ang mga tawo moingon, “Ang gugma mao ang asin sa kinabuhi.” Ang sanglitanan sa taga-Lebanon nag-ingon, “Ang gugma dili motan-awg mga depekto ug ang pagdumot nagapadako sa mga kahuyangan.” Sama usab mao ang panultihon sa Irlandia, “Ang gugma nagatago sa kangil-aran.” Ang mga taga-Wales nag-ingon, “Ang gugma mas kusgan kay sa higante.” Ang taga-Norway nag-ingon, “Kanang gihigugma kanunay gayod nga matahom.” Usa ka tawong Ingles lagmit moingon, “Ang usa ka pennyweight nga gugma bale ug usa ka librang balaod.” Sa Espanya, adunay panultihon, “Ang matuod nga gugma molungtad hangtod sa kamatayon.”
Sa walay duhaduha, ang matuod nga gugma gipabilhan bisan asa kita moadto. Ang gugma nga mohatag ug tinuod gayod nga kalainan sa kinabuhi mao kanang gihubit sa magsusulat sa Bibliya nga si Pablo: “Ang gugma taas-ug-pailob ug malulot. Ang gugma dili abughoan, kini dili magapanghambog, dili magapaburot, dili magagawing binastos, dili magapangita sa kaugalingon niining kaayohan, dili mapasuko. Kini dili magahambin ug talaan sa kadaot. Kini dili magamaya sa pagkadili-matarong, apan magamaya uban sa kamatuoran. Ginaantos niini ang tanang butang, nagatuo sa tanang butang, nagalaom sa tanang butang, nagaagwanta sa tanang butang. Ang gugma dili gayod mapakyas.”—1 Corinto 13:4-8.
Oo, “ang gugma dili gayod mapakyas.” Ang gugma magpaayo. Ang gugma magpahiusa. Ang gugma ikapasundayag dili lamang sa mga pulong kondili sa dili-hakog nga mga buhat. Ang gugma adunay putli nga motibo. Busa, si Pablo nagsulat usab: “Kon akong ihatag ang tanan kong mga gipanag-iya aron pakaonon ang uban, ug kon itugyan ko ang akong lawas, aron ako makapanghambog, apan walay gugma, wala gayoy gikapulos kanako.” Kon kita magsakripisyo o maghatag ug mga gasa aron lang makita sa uban, nan sa panglantaw sa Diyos kini walay kapuslanan.—1 Corinto 13:3.
Gipadayag ni Jesus kini niining paagiha: “Sa dihang magahimo kag mga gasa sa kaluoy, ayaw paghuyop ug trompeta sa imong unahan, maingon sa ginabuhat sa mga salingkapaw . . . aron himayaon sila sa mga tawo. Sa pagkamatuod ako magaingon kaninyo, Nagabaton na sila sa ilang ganti sa bug-os. Apan ikaw, sa dihang magahimog mga gasa sa kaluoy, ayawg pahibaloa ang imong wala nga kamot kon unsay ginabuhat sa imong tuo.” Oo, ang gugma dili magpasiatab o manghambog.—Mateo 6:2, 3.
Ang gugma nga walay pagkasalingkapaw dili mangita sa kaugalingong kaayohan. Ang matuod nga gugma magpahimo sa usa ka tawo nga makalipayng ikauban. (Mateo 11:28-30) Ang mosunod nga wala-hiilhing kinutlo tingali magpahunahuna kanato bahin sa matang sa gugma nga atong gibati alang sa uban: “Ang pagkamatarong nga walay gugma magpatig-a kanato. Ang pagtuo nga walay gugma maghimo kanato nga panatiko. Ang gahom nga walay gugma maghimo kanato nga mabangis. Ang tulumanon nga walay gugma maghimo kanato nga gahig-ulo. Ang kahusay nga walay gugma maghimo kanato nga hiktin-ug-hunahuna.”
Ang mga tawo nga nagkinabuhi sa mga lagda lamang mahulog sa laang sa pagkawalay-gugma. Makapadasig gayod kitang tanan kon kita magkinabuhi sumala sa tambag ni Pablo: “Isul-ob sa inyong kaugalingon ang malumong mga pagmahal sa pagkamabination, kalulot, pagkamapaubsanon sa hunahuna, kalumo, ug hataas-nga-pailob. Padayon nga mag-inantosay sa usag usa ug bukas nga magpinasayloay sa usag usa kon ang usa may hinungdan sa pagreklamo batok sa lain. Maingon gayod nga si Jehova bukas nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob sa inyong kaugalingon ang gugma, kay kini usa ka hingpit nga bugkos sa panaghiusa.”—Colosas 3:12-14.
[Hulagway sa panid 15]
Ang matuod nga mga Kristohanon nagapadapat sa gugma ingon sa pagkatudlo ni Jesus niana