‘Kadto Maoy Samag Pagkaon ug Dugos’
SA TUNGATUNGA sa 1993, sa Altus, Oklahoma, T.B.A., usa ka mabalak-ong amahan, usa ka sarhento sa Air Force sa T.B., nag-ampo alang sa giya aron tabangan ang iyang anak nga babaye, nga adunay mga problema sa kaminyoon ug naghunahuna sa pagdiborsiyo. Sa sunod nga buntag usa sa mga Saksi ni Jehova mituktok sa iyang pultahan ug nagtanyag kaniya sa Hulyo 8, 1993, nga isyu sa Pagmata!, nga nagpasiugda sa ulohang “Diborsiyo—Ang Ganghaan Ngadto sa Labi Pang Malipayong Kinabuhi?”
Bisan pag ang tawo walay gusto sa mga Saksi ug wala pa gayod sukad makapaminaw kanila kaniadto, siya midawat dayon ug mibasa niadtong magasing Pagmata! Sa ulahi iyang gipaambit ang mga kasulatan ug ang mga punto gikan niini sa iyang anak nga babaye. Gibasa usab niya ang isyu sa Ang Bantayanang Torre nga gibilin kauban sa Pagmata! Kadto naundan sa artikulo nga nagtukmod kaniya sa pagpalandong bahin sa dugay na niyang pagtuo sa Trinidad. Nakaamgo siya nga ang iyang pag-ampo alang sa tabang may kalabotan sa iyang anak nga babaye gitubag, apan siya nahibulong kon nganong ang Diyos mogamit ug mga tawo nga wala motuo sa Trinidad sa pagtubag sa iyang mga pag-ampo. Siya nangatarongan nga seguradong ang Diyos dili mogamit sa mga tawo sa pagtubag sa mga pag-ampo kon sila wala magtudlo sa kamatuoran.
Busa siya natukmod sa pagtelepono sa Kingdom Hall sa mga Saksi ni Jehova aron sa pagkuhag pipila ka literatura nga nagapatin-aw nga mas detalyado sa ilang mga pagtuo mahitungod sa Trinidad. Ang tawo nga nakatubag sa telepono nagatambong sa usa ka tigom sa Kristohanong mga ansiyano. Ang sarhento sa air force dihadiha miadto sa Kingdom Hall, diin siya gihatagan sa librong Ikaw Mabuhing Walay Kataposan sa Paraiso sa Yuta ug sa brosyur nga Angay ba Nimong Tuohan ang Trinidad?
Niadtong gabhiona, gibasa sa tawo ang tibuok brosyur. Samtang nagbasa niana siya naghinamhinam kaayo, siya miingon sa ulahi, nga kinahanglan siyang mohunong ug moingon sa iyang kaugalingon, ‘Kalma lang. Imposible kini. Dili kini katuohan.’ Gipresentar sa brosyur ang pamatuod sa Bibliya batok sa doktrina sa Trinidad nga tataw kaayo nga sa dihang kadto iyang gibasa, siya mipatin-aw, “kadto maoy samag pagkaon ug dugos.” Sa sunod nga gabii siya mitambong sa iyang unang tigom sa mga Saksi ni Jehova ug nalipay sa iyang napatalinghogan.
Human sa iyang unang pagtuon sa Bibliya uban sa mga Saksi ni Jehova ug sa bug-os nga panaghisgot sa hunahuna sa Bibliya bahin sa pagpanabako, iyang gilabay ang iyang sigarilyo ug wala na gayod manabako. Ang pagtuon sa Bibliya gihimo uban kaniya makadaghan matag semana. Tulo ka bulan human mabasa ang brosyur nga Trinidad, ug human makaretiro gikan sa pagkasundalo, misugod siya sa pagpakig-ambit sa publikong pagsangyaw nga buluhaton kauban sa mga Saksi. Tulo ka bulan sa ulahi siya nagpasimbolo sa iyang dedikasyon ngadto kang Jehova nga Diyos ug gibawtismohan. Siya karon nag-alagad ingong bug-os-panahong ministro.