“Gikan sa Baba sa mga Bata”

Usa ka babayeng taga-Ballito, Natal, Habagatang Aprika, mipahayag ug mainitong apresasyon alang sa librong Akong Basahon sa mga Estorya sa Bibliya ug nagsulat:

“Aduna akoy pag-umangkon, si Rudi Naidoo, nga usa lamang ka tuig ug tunga ang pangedaron, ug nganlan niya ang halos matag persona diha sa libro pinaagi lamang sa pagtan-aw sa ilang mga hulagway. Sultihan ka pa niya kon unsay gibuhat sa mga persona sa Bibliya diha sa mga hulagway. Pananglitan, ang estorya 11 nagpakita nga si Noe naghalad ug mga halad. Si Rudi moingon kanamo, ‘Noe​—ampo Jehova.’

“Sa dihang gipangutana kon unsay ginabuhat ni Josue sa estorya 49, mobarog si Rudi sama kang Josue diha sa hulagway, samtang siya nagaingon, ‘Adlaw ayaw lihok!’ Dili kaayo siya makalitok ug maayo sa mga pulong apan mobungat niana sa iyang kaugalingong makapahimuot, mahigugmaong paagi.

“Sa makausa pa, buot ko kamong pasalamatan alang niining ekselenteng publikasyon. Ang gagmayng mga bata makahimo sa pag-asoy sa mga butang nga wala hisayri sa pipila ka hamtong. Ang mga pulong ni Jesus sa Mateo 21:16 tinuod gayod: ‘Gikan sa baba sa mga bata ug mga masuso ikaw nagtagana ug pagdayeg.’”

Kon buot nimong makadawat ug Akong Basahon sa mga Estorya sa Bibliya o buot nimong may moduaw kanimo sa imong balay aron hisgotan ang bili sa edukasyon sa Bibliya uban kanimo, palihog pagsulat sa Watch Tower, P.O. Box 2044, 1099 Manila, o sa adres nga duol kanimo nga nalista sa panid 5.