Pagsulay sa Klero sa Pag-abot sa mga Batan-on
“Ang opisina sa mga kapilyan sa McGill University . . . gisulong sa grupo sa gipomadahang-buhok, nagsul-ob ug dyaket nga panit nga mga punk,” mitaho ang The Gazette sa Montreal, Canada. Ang “mga punk,” hinunoa, dili kasagarang matang. Sila maoy mga membro sa klero—mga kapilyan sa unibersidad—ug maoy bahin sa gitawag sa mantalaan nga “usa ka bag-ong grupo sa mga teologo nga direktang nakiglangkit sa mga estudyante sa unibersidad nga nagpangitag espirituwal nga kalamdagan.”
Ang mga kapilyan nagsinina sama sa “mga punk” alang sa usa ka poster nga gidesinyo aron ianunsiyo ang ilang mga serbisyo diha sa kampus. Ang usa kanila, nga usa ka Presbiteriano nga ministro nga ginganlag Roberta Clare, nagpatin-aw: “Midisider kami sa paghimog poster nga punk tungod kay buot kaming magpalayo gikan nianang mas-balaan-kami kay kaninyo, mahukmanong larawan nga sagad hunahunaon dayon sa mga tawo kanamo.”
Apan, siya nag-ingon nga daghang estudyante kay sa miagi ang interesado sa pagtuon sa relihiyon sa tunghaan. Daghan ang nakigbisog sa malisod nga mga pangutana ug naglaom sa mga magtutudlo ug sa mga kapilyan sa unibersidad alang sa mga tubag. Ang mantalaan miinterbiyo ug usa ka estudyante kinsa mausisaon bahin sa kon nganong ang relihiyon adunay kusganong impluwensiya diha sa komunidad, kon nganong adunay daghan kaayong mga relihiyon, ug kon nganong kini daw maoy hinungdan sa daghang kagubot sa kalibotan. Siya naglibog sa tinuod nga ilhanan ni Jesu-Kristo ingon man sa pangutana bahin sa sinugdanan sa uniberso.
Gigamit ba niining mga kapilyan ang Bibliya aron tabangan ang mga estudyante nga makakaplag sa mga tubag sa Diyos sa maong malisod nga mga pangutana? Daw panagsa. Kining Bag-ong Grupo nga mga teologo nagkauyon nga dili mangabig, nga gilantaw nilang “pagpangawat-ug-karnero.”
Bisag maayo tingali ang ilang katuyoan, ang maong mga klero nahisalaag gayod gikan sa mga paagi sa pagtudlo nga gigamit ni Kristo ug sa iyang mga apostoles. Ang unang mga Kristohanon wala mabalaka bahin sa “pagpangawat-ug-karnero,” ni sila nagpanuko sa pagtudlo sa Pulong sa Diyos ug pagtabang sa sinserong mga nagpangita-sa-kamatuoran aron kini masabtan. (Lucas 24:44, 45; Buhat 20:20) Sa pagkatinuod, ang tukmang kahibalo bahin kang Jehova nga Diyos ug sa iyang Anak, si Jesu-Kristo, maoy gikinahanglan aron maangkon ang kinabuhing walay kataposan. (Juan 17:3) Ang kabubut-on sa Diyos mao nga ang tanang matang sa mga tawo kinahanglang “makadangat sa tukmang kahibalo sa kamatuoran” aron maluwas.—1 Timoteo 2:3, 4.
Ang buluhaton sa mga Saksi ni Jehova naglakip sa pagdumala sa libreng mga pagtuon sa Bibliya sa balay uban niadtong kinsa nagtinguha nga matubag ang ilang mga pangutana sa Bibliya. Ang mga Saksi ni Jehova sa inyong komunidad malipay sa pagtabang kanimo.