Paghupay sa mga Hamtong nga Nakalabang sa Masakit nga Kasinatian Panahon sa Pagkabata

SILA mahigalaon nga batan-ong magtiayon, mga tinahod kaayo sa kongregasyon. Apan may tono sa pagkadinalian ang bana sa dihang nangutana siya kon ang ansiano makaduaw ba kanila, ug ang asawa naghilak. Ang asawa nag-antos sa mga yugto sa grabeng depresyon ug pagdumot sa kaugalingon, mga hunahuna pa gani sa paghikog. Siya giamong-amongan sa dihang batan-on pa. Nagpasalamat nga ang organisasyon ni Jehova nagtaganag pagtultol kon unsaon pagtabang ang mga biktima sa maong mga krimen, gitun-an sa ansiano ang mga sulat sa Sosyedad ngadto sa mga ansiano maingon man ang Oktubre 8, 1991, nga mga artikulo sa Pagmata! ug ang Abril 1, 1984, nga artikulo sa Bantayanang Torre nga naghisgot niining maong ulohan. Ania ang pila ka mapuslanong mga puntos nga gikutlo gikan niining maong mga tinubdan.

1. Pamati, pamati, pamati. Sa dihang mapangos ang tuhod sa usa ka bata, ang una niyang buhaton mao ang pagdangop kang Mama o Papa alang sa kahupayan. Apan ang giamong-amongang bata tingali dili gani gayod makahimo niana. Busa ingong hamtong, nabatonan gihapon niya ang samang panginahanglan​—nga motug-an, magpahungaw niana, nga hupayon sa usa ka mabinationg mamiminaw. (Itandi ang Job 10:1; 32:20.) Sa dihang ang ansiano miduaw sa magtiayong nahisgotan sa ibabaw, ang bana natingala nga diyutay ra kaayo ang gisulti sa ansiano ug taas ang gigugol niyang panahon sa pagpamati. Ang bana, usa ka praktikal kaayo, matinabangong tawo, nakakaplag nga naningkamot siya sa pagsulbad sa suliran pinaagi sa pagtubag sa pagbati pinaagig matarong nga panabot, nga naningkamot sa pagtul-id sa mga pagbati nga para kaniya daw dili-makataronganon. Iyang nakat-onan nga ang iyang asawa labawng nagkinahanglan ug empatiya kay sa mga tubag. (Itandi ang Roma 12:15.) Kinahanglan niyang madunggan nga siya may tinuod nga mga katarongan sa pagbating sama sa iyang gibati.

2. Iyagyag ang mga bakak. Ang pag-among-among nagtudlo sa kabataan nga sila mahugaw, dili-hiligugmaon, dili-bililhon. Sama sa bakak nga mga doktrina, kining maong mga ideya makapalisod sa pagbaton ug himsog nga relasyon kang Jehova. Busa iyagyag ang mga bakak, ug pulihi sila sa kamatuoran​—nga hinayhinay, subli-subli, mapailobon. Pangatarongan gikan sa Kasulatan. (2 Corinto 10:4, 5) Pananglitan: “Nasabtan kong mibati kang hugaw. Apan unsay pagbati ni Jehova kanimo? Kon gitugtan niya ang iyang Anak sa pagpakamatay ug pagtaganag usa ka lukat alang kanimo, wala ba kana magpasabot nga siya nagmahal kanimo? [Juan 3:16] Sa Iyang mga mata, ang pag-among-among nakapahimo ba nimong mahugaw, o nagpahimo kana sa nag-among-among nga mahugaw? Hinumdomi, si Jesus nag-ingon: ‘Walay bisan unsa diha sa gawas sa tawo nga sa pagsulod niini kaniya makapahugaw kaniya; apan ang mga butang nga magagula gikan sa sulod sa tawo mao ang mga butang nga makapahugaw kaniya.’ [Marcos 7:15] Ang pag-among-among ba migula gikan sa sulod nimo, nga usa ka gamayng bata? O ang tig-among-among nagtinguha niana diha sa iyang kaugalingong hunahuna?”

3. Sulti nga makahupay. Ang matag indibiduwal maoy lahi, busa ang tambag ni Pablo nga “hupaya ang mga magul-anon” lainlain ug kapadapatan sa matag kaso. (1 Tesalonica 5:14) Hinuon, ang yanong pagsulti talagsa rang makahupay. Pananglitan, ang yanong pagsulti sa nakalabang sa pag-among-among nga mobasa pa ug dugang sa Bibliya, mosangyaw pa ug dugang, o ‘itugyan lang kang Jehova ang imong palas-anon’​—bisan usahay makatabang kining mga sugyota—​mahimong dili mopatunghag mga resulta. (Salmo 55:22; itandi ang Galacia 6:2.) Daghan ang nagbuhat na niining mga butanga sa labing maayo nga ilang mahimo ug napikal kaayo sa ilang kaugalingon tungod kay wala makahimo sa mas maayo pa.​—Itandi ang 1 Juan 3:19, 20.

Sa susama, ang yanong pagsulti sa mga nakalabang sa pag-among-among nga kalimtan ang kagahapon labi pang makadaot kay sa makaayo. Kon mahimo pa nila, lagmit nakalimtan na unta nila​—ug dili unta magkinahanglan ug tabang aron moabot lamang nianang yano kaayong solusyon.a Hinumdomi, ang ilaha maoy hilabihan ka sakit nga emosyonal nga kasinatian. Kon itandi nato, hunahunaang nakaagi ka ug biktima sa aksidente sa awto nga naghigda nga nag-agulo taliwala sa kagun-oban. Sultihan mo ba lang siya nga dili hunahunaon ang sakit? Tin-aw, labaw pa ang gikinahanglan.

Kon dili ka segurado nga ang imong ginasulti makahupay ug makatabang, nganong dili pangutan-on ang nagmagul-anon? Kay bisan ang tambag nga matuod ug Kasulatanhon kinahanglang tukma sa panahon ug haom usab.​—Itandi ang Proverbio 25:11.

Human sa pila ka pagduaw, ang igsoong babaye nakakitag pila ka kauswagan sa iyang panglantaw, ug ang iyang bana mas nakatabang kaniya latas sa malisod nga mga panahon. Sukad niadto silang duha nakahimo na sa paghupay sa uban kinsa nakaagi usab sa susamang masakit nga mga kasinatian. Pagkamakapalig-on ang pagkakita kang Jehova, “ang Diyos sa tanang kalipay,” nga naglihok pinaagi sa iyang Pulong ug sa iyang katawhan aron sa “pagbugkos sa mga dugmok ug kasingkasing” niining masamok nga panahon.​—2 Corinto 1:3; Isaias 61:1.

[Footnote]