“Adlaw sa mga Saksi ni Jehova”

ANG mga Saksi ni Jehova nagpahimulos sa panagtigom sa daghan kaayo sa ubay-ubayng beses sulod sa tuig. Sila nagatigom aron sa pagkat-on bahin sa Diyos ug sa iyang matarong nga mga prinsipyo. Kining mga tigoma maoy ekselenteng kahigayonan usab aron sa pagdasig sa pagpakig-uban sa isigka-Kristohanon.​—Hebreohanon 10:24, 25.

Unsa ang matang sa epekto niining dagkong mga pundok sa mga bisitang Saksi diha sa mga siyudad nga napili alang sa maong mga asembliya? Hinuon, anaa ang pinansiyal nga kaayohan alang sa ekonomiya sa dapit. Apan anaa usab ang epekto sa “ilang panig-ingnan sa espirituwal nga dedikasyon ug personal maayong pamatasan,” sumala sa giingon sa usa ka proklamasyon nga giluwatan sa alkalde sa siyudad sa Gainesville, Georgia, T.B.A.

Kining opisyal nga kasulatan nagpahayag sa bahin: “SAMTANG, ang mga Saksi ni Jehova nagatigom sa Georgia Mountains Center sa aberids 14 ka hinapos-sa-semana matag tuig sulod sa milabayng 11 ka tuig, nga ang tumatambong sa matag sesyon may aberids nga 2,200 ka tawo; ug . . . kining ‘dakong panganod sa mga Saksi’ sa tino nakahatag ug makapadasog nga pamatuod bahin sa pagtuo ug dedikasyon ngadto sa tanan nga nakapaniid niini:

“BUSA, KARON, ako, si Emily D. Lawson, Alkalde sa Siyudad sa Gainesville, sa ingon nagaproklamar sa Sabado, Nobyembre 23, 1991, ingong ‘ADLAW SA MGA SAKSI NI JEHOVA’ sa Gainesville; nga nagaawhag sa tanang lungsoranon sa pag-ila ug paghatag ug mainitong pag-abiabi sa maong mga bisita, ug sa pagtinguha sa pag-awat sa ilang panig-ingnan sa espirituwal nga dedikasyon ug personal maayong pamatasan, sa matag higayon niining hinapos-sa-semana ug sa umaabot.”