Gikan sa Among mga Magbabasa
Lupus Ang una kong hunahuna tapos sa pagbasa sa artikulong “Kon sa Unsang Paagi Ako Nagkinabuhi Uban sa Lupus” (Mayo 8, 1990) maoy “Salamat kanimo, Jehova!” Ako walay lupus, apan sa duha ka tuig ako nakigbisog sa Chronic Fatigue Syndrome, nga may pila ka susamang mga simtoma. Sa walay duhaduha, kining artikulo nagatubag sa mga pag-ampo sa daghan, daghang tawo, dili lamang kadtong may lupus apan kadtong may ubang balikbalik nga mga sakit.
Tapos sa 20 anyos sa bug-os-panahong pag-alagad, nga ang miaging 4 ka tuig nagapanaw uban sa akong bana, usa ka magtatan-aw sa sirkito, usa ka dakong pagpasibo nga ako maghinayhinay aron ako makapadayon sa pag-obra. Ang asoy sa kasinatian ni Robin nagtino sa akong mga kabalaka ug mga kapakyasan mismo, apan naghatag praktikal nga tambag sa pag-atubang sa maong mga hagit. Dili ako makapasalamat nga igo kaninyo tungod sa pag-imprenta niini. Magbutang akog kopya sa kiliran sa akong higdaan aron mabalikbalik sa pagbasa.
T. E., Tinipong Bansa
Limbong sa Siyensiya Gidayeg ko ang inyong maisogong baroganan batok sa relihiyon sa ebolusyon. (Enero 22, 1990) Gilaayan na ako sa mapagawalong mga tinamdan sa mga siyentipiko nga nagatawag sa mga tawo nga walay-katakos ug walay-alamag kon dili sila modawat sa “pagtuo.”
S. L., Tinipong Bansa
Mga Katalagman Naglagot kaayo ako sa artikulo bahin sa mga bagyo ug linog. (Pebrero 22, 1990) Inyong gipunting ang usa ka hitabo sa pangawat ingong panig-ingnan sa kalainan tali sa “ang kalibotan” ug sa mga Saksi ni Jehova. Gibati ko nga labing mangil-ad ang paghulagway lamang sa mga Saksi diha sa dinayeg nga kahayag.
J. K., Tinipong Bansa
Ang mga artikulo nagpasundayag sa unsang paagi ang mga Kristohanon karong adlawa nagapakitag tinuod nga gugma sa usag usa panahon sa masulayong panahon, sama sa unang siglo. (2 Corinto 8:1-4) Bisan pag gitaho ang pila ka negatibong hitabo, ang artikulo nagpahayag usab nga “ang maong dimabinationg mga buhat nalandongan sa daghang buhat sa tawhanong kalulot ug kaluoy” nga gihimo sa mga dili-Saksi.—ED.
Paghingulitawo Nalipay ako sa labihan sa dihang akong nadawat ang Pebrero 8, 1990, nga isyu nga naghisgot sa mga kausabang masinati sa paghingulitawo. Ako usa ka nag-inusarang ginikanan, ug sa miaging pila ka bulan, nabalaka kaayo kon unsaon sa pagpatin-aw niining mga kausabana ngadto sa akong anak lalaki. Ako maulaw kaayo nga mogamit ganig pila ka pulong uban niya! Busa nagsulat gayod ako ug nagpasalamat kaninyo sa pagtagana niining impormasyona.
C. B., Tinipong Bansa
Utang Sa miagi lang gabii kami nanglingkod ug nagplano sa pagbayad sa among mga utang. Among nabanabana nga kana mokabat ug usa ka tuig. Karong adlawa, among nakita ang Pebrero 8, 1990, nga isyu diha sa among mga sulat, uban ang artikulo bahin sa paglingkawas sa utang. Kana nakapadasig kaayo kanamo sa pagtuman sa among plano. Kini may maayong mga tambag usab mahitungod sa among umaabot nga mga batasan sa pagpanggasto.
S. S. ug K. S., Tinipong Bansa
Mga Dinosaur Ang akong ngalan maoy Ronald, ug ako diyes anyos. Ako interesado kaayo sa mga dinosaur ug naglaom sa usa ka taho bahin kanila sa dugay nang panahon. Sa kataposan miabot ang usa ka artikulo bahin sa mga dinosaur (Pebrero 8, 1990), ug buot kong moingon nga salamat kaayo kaninyo.
R. M., Austria
Ako usa ka estudyante sa usa ka lokal nga unibersidad. Duha ka adlaw una makadawat niining isyuha, naghunahuna ako sa pagsulat kaninyo bahin sa baroganan nga nabatonan sa mga Saksi bahin sa edad sa yuta. Ang akong mga pangutana natubag na, ug ako nagaplano nga ipaambit kining kahibulongang impormasyon uban sa akong propesor.
M. H., Tinipong Bansa