“Ang Sudlanang Kalabasa Wala Mabuak”

Ang kaguol ginapadayag sa nagkalainlaing mga paagi sumala sa mga kostumbre ug sa kultura sa matag nasod ug tribo. Pananglitan, ang mga tawo sa Yuroba sa Nigeria adunay tradisyonal nga pagtuo sa reinkarnasyon o pagbalhin sa kalag ngadto sa laing lawas o buhing butang. Busa sa dihang ang inahan mamatayag anak, bation ang hilabihang kaguol sa mubo nga panahon. Apan, kini wala isipa nga kataposan na sa kalibotan, kay ang mga Yuroba adunay panultihon nga ingon niini: “Tubig lamang ang nayabo. Ang sudlanang kalabasa wala mabuak.” Kini nagpasabot, sumala sa mga taga Yuroba, nga ang gisudlag tubig nga sudlanang-kalabasa, ang inahan, makaanak pa. Dugang pa, sumala sa ilang pagtuo, ang patayng bata mobalik ingong usa ka reinkarnasyon, busa ang bisan unsang paglugway sa kaguol makalangan sa inahan sa pagbaton ug laing anak, o sa pagbalik sa iyang anak ingong usa ka reinkarnasyon. Busa, ang kaguol mubo lamang nga panahon ug ginapugngan.

Kon ang usa sa kaluha mamatay, ang ubang mga inahan magdala ug usa ka kinulit nga larawan nga naghawas sa namatayng bata. Sa panahon sa pagpangaon, usa ka platong pagkaon ang isilbi alang sa namatay nga bata. Kon mopalit ug senina alang sa buhi nga kaluha, palitan usab ug senina ang namatay. Kining batasana walay kataposang himoon sa pagtuo nga ang paghunong niini makapatay sa buhi nga kaluha! Siyempre, sila nga adunay tukmang kahibalo sa Bibliya dili motuo o mosunod nianang kustombreha.