UNANG SULAT NI PEDRO

1 Gikan kang Pedro, nga apostol+ ni Jesu-Kristo, ngadto sa temporaryong mga residente nga naa sa Ponto, Galacia, Capadocia,+ Asia, ug Bitinia, kamo nga gipili 2 sumala sa kahibalo nga nabatonan nang daan sa Diyos nga Amahan,+ nga gibalaan sa balaang espiritu+ aron mahimong masinugtanon ug mawisikan sa dugo ni Jesu-Kristo:+

Hinaot ang dili hitupngang pagkamaayo* ug ang kalinaw sa Diyos modagaya kaninyo.

3 Dayegon ang Diyos ug Amahan sa atong Ginoong Jesu-Kristo, kay tungod sa iyang dakong kaluoy gipahinabo niya nga ipanganak ta pag-usab+ aron makabatog buhi nga paglaom+ pinaagi sa pagkabanhaw ni Jesu-Kristo,+ 4 ug madawat ang dili madunot ug wala mahugawi ug dili mawala nga panulondon.+ Giandam kini sa langit para kaninyo,+ 5 kinsa gipanalipdan sa gahom sa Diyos tungod sa inyong pagtuo para sa kaluwasan nga ipadayag panahon sa kataposan. 6 Tungod niini kamo naglipay pag-ayo, bisan tuod kinahanglan mong mag-antos kadiyot tungod sa lainlaing pagsulay,+ 7 aron nga pinaagi sa sinulayang kalidad sa inyong pagtuo,+ nga mas bililhon pa kay sa bulawan nga mawala ra bisag gidalisay* sa kalayo, madawat ninyo ang kadayeganan, himaya, ug dungog dihang ipadayag na si Jesu-Kristo.+ 8 Bisag wala mo makakita niya, gihigugma ninyo siya. Bisag wala mo makakita niya karon, nagpakita mog pagtuo kaniya ug nalipay gyod mo pag-ayo, 9 kay segurado mo nga ang inyong pagtuo moresulta sa inyong kaluwasan.+

10 Bahin niini nga kaluwasan, ang mga propeta,* nga nanagna bahin sa dili hitupngang pagkamaayo sa Diyos para kaninyo, makugihong nagpakisayod ug nagsusig maayo.+ 11 Nagsige silag susi kon kanus-a o kon unsang panahona matuman ang mga butang bahin sa Kristo+ nga gitagna sa balaang espiritu nga naa kanila, kay kini abanteng nagtagna bahin sa pag-antos sa Kristo+ ug sa himaya nga mosunod. 12 Gipadayag sa Diyos kanila nga sila nag-alagad, dili para sa ilang kaugalingon, kondili kaninyo. Gisulat nila ang mga butang nga gipahibalo kaninyo, ug nadungog ninyo kini gikan sa mga nagpahayag sa maayong balita sa tabang sa balaang espiritu nga gikan sa langit.+ Bisan ang mga anghel gusto kaayong mahibalo bahin niini.

13 Busa andama ang inyong hunahuna para sa buluhaton;+ hupti ang inyong maayong panghunahuna;+ ibase ang inyong paglaom sa dili hitupngang pagkamaayo nga ipakita kaninyo inigpadayag kang Jesu-Kristo. 14 Ingong masinugtanong mga anak, ayaw na mog pahiuyon* sa inyong kanhing mga tinguha dihang wala pa moy kahibalo, 15 apan sama sa Balaang Usa nga nagtawag kaninyo, magmabalaan kamo sa tanan ninyong panggawi,+ 16 kay nasulat: “Magmabalaan mo, kay ako balaan.”+

17 Ug kon kamo nagatawag sa Amahan nga patas nga nagahukom+ sumala sa binuhatan sa matag usa, managgawi kamo nga may kahadlok+ samtang temporaryo mong nagpuyo niining kalibotana. 18 Kay nahibalo mo nga dili pinaagi sa madunot nga mga butang, sa plata* o bulawan, nga kamo nahigawas*+ sa inyong way pulos nga pagkinabuhi nga napanunod ninyo sa inyong mga katigulangan.* 19 Apan pinaagi kini sa bililhong dugo sa Kristo,+ nga sama sa dugo sa walay depekto ug hinlo nga nating karnero.+ 20 Tinuod, gipili na siya sa Diyos sa wala pa matukod ang kalibotan,+ apan siya gipadayag panahon sa kataposan para kaninyo.+ 21 Pinaagi kaniya kamo nahimong mga magtutuo sa Diyos,+ nga maoy nagbanhaw kaniya+ ug naghatag kaniyag himaya,+ aron motuo mo ug molaom sa Diyos.

22 Karon nga nahinloan na ninyo ang inyong kaugalingon pinaagi sa pagsunod sa kamatuoran mao nga naa na moy sinserong inigsoong pagmahal,+ higugmaa pag-ayo ang usag usa nga kinasingkasing.+ 23 Kay kamo gipanganak pag-usab,+ dili pinaagi sa madunot, kondili pinaagi sa dili madunot nga binhi,*+ pinaagi sa pulong sa buhi ug walay kamatayon nga Diyos.+ 24 Kay “ang tanang tawo* samag sagbot, ug ang tanang himaya niini samag bulak sa kapatagan; ang sagbot malaya, ug ang bulak malarag, 25 apan ang pulong ni Jehova* magpabilin hangtod sa hangtod.”+ Ug kini nga “pulong” mao ang maayong balita nga gipahayag kaninyo.+

2 Busa isalikway ninyo ang tanang pagkadaotan,+ pagkamalimbongon, pagpakaaron-ingnon, kasina, ug pagpanglibak. 2 Samag mga bata nga bag-ong natawo,+ ugmara ang pagpangandoy sa puro* nga gatas sa pulong sa Diyos, aron pinaagi niini kamo motubo ug maluwas,+ 3 kana kon inyo nang natilawan* ang pagkamaayo sa Ginoo.

4 Sa pagduol ninyo kaniya, nga usa ka buhing bato nga gisalikway sa mga tawo+ apan pinili ug bililhon sa Diyos,+ 5 kamo mismo ingong buhing mga bato gitukod ingong espirituwal nga balay+ aron mahimong balaang mga saserdote, aron magtanyag ug espirituwal nga mga halad+ nga dalawaton sa Diyos pinaagi kang Jesu-Kristo.+ 6 Kay ang Balaang Kasulatan nag-ingon: “Tan-awa! Nagbutang ko sa Zion ug piniling bato, bililhong bato nga pamag-ang* ingong pundasyon, ug kadtong magpakitag pagtuo niini dili maulawan.”+

7 Busa bililhon siya kaninyo kay mga magtutuo mo; apan para sa mga dili motuo, “ang bato nga gisalikway sa mga magtutukod,+ kini nahimong pangunang bato nga pamag-ang”+ 8 ug “bato nga kapandolan ug dakong bato nga makapatumba.”+ Sila nangapandol kay dili sila motuman sa pulong. Kanay dangatan nianang klaseha sa mga tawo. 9 Apan kamo maoy “piniling katawhan, mga saserdote nga hari, balaang nasod,+ katawhan nga espesyal nga gipanag-iya sa Diyos,+ aron ipahayag ninyo bisan asa ang dalayegong mga hiyas”*+ sa Usa nga nagtawag kaninyo gikan sa kangitngit ngadto sa iyang kahibulongang kahayag.+ 10 Kay kaniadto dili mo katawhan sa Diyos,+ apan karon katawhan na mo niya; kaniadto wala mo kaluy-i, apan karon gikaluy-an na.+

11 Mga hinigugma, ingong mga langyaw ug temporaryong residente,+ giawhag mo nako nga padayong likayan ang makasasalang mga tinguha,+ nga nakig-away kaninyo.+ 12 Hupti ang maayong panggawi taliwala sa mga nasod,+ aron nga dihang ila mong akusahan nga nagbuhat ug daotan, sila makasaksi sa inyong maayong mga buhat,+ ug ingong resulta, ilang himayaon ang Diyos sa adlaw sa iyang pagsusi.

13 Tungod sa Ginoo pasakop mo sa matag awtoridad nga gihimo sa tawo,+ sa hari+ man kay labaw siya 14 o sa mga gobernador nga gipadala niya aron silotan ang mga nagbuhat ug daotan ug dayegon ang mga nagbuhat ug maayo.+ 15 Kay kabubut-on sa Diyos nga pinaagi sa pagbuhat ug maayo inyong mapahilom* ang sayop nga mga estorya sa mga tawong dili makataronganon.+ 16 Mga tawo mo nga may kagawasan+ apan gamita ang inyong kagawasan, dili ingong pasumangil* sa paghimog daotan,+ kondili ingong mga ulipon sa Diyos.+ 17 Pasidunggi ang tanang klase sa tawo,+ higugmaa ang tanang igsoon,*+ kahadloki ang Diyos,+ pasidunggi ang hari.+

18 Ang mga sulugoon kinahanglang magpasakop ug motahod pag-ayo sa ilang mga agalon,+ dili lang niadtong maayo ug makataronganon, kondili niadtong lisod sab pahimut-an. 19 Kay makapalipay gyod dihang ang usa molahutay sa kalisdanan ug mag-antos bisag walay sala aron makabatog hinlong konsensiya atubangan sa Diyos.+ 20 Kay unsay kaayohan kon silotan mo tungod sa inyong sala ug molahutay niini?+ Apan kon molahutay mo sa kalisdanan tungod sa pagbuhat ug maayo, makapalipay kini sa Diyos.+

21 Sa pagkatinuod, kamo gitawag para niini, kay bisan ang Kristo nag-antos alang kaninyo,+ nga nagbilin kaninyog sulondan aron sundon ninyo pag-ayo ang iyang mga tunob.+ 22 Siya walay nahimong sala+ ug walay panglimbong sa iyang baba.+ 23 Dihang siya giinsulto,*+ wala siya mobalos ug insulto.*+ Dihang siya nag-antos,+ wala siya manghulga, apan gisalig niya ang iyang kaugalingon sa Usa nga nagahukom+ sa matarong nga paagi. 24 Iyang gidala ang atong mga sala+ sa estaka*+ pinaagi sa iyang kaugalingong lawas, aron kita mamatay* maylabot sa sala ug mabuhi sa pagkamatarong. Ug “pinaagi sa iyang mga samad kamo naayo.”+ 25 Kay kamo samag mga karnero nga nasaag,+ apan karon kamo namalik sa magbalantay+ ug tig-atiman* sa inyong kinabuhi.*

3 Sa samang paagi, kamong mga asawa, pasakop mo sa inyong mga bana,+ aron nga kon dunay dili masinugtanon sa pulong sa Diyos, sila makabig nga walay pulong pinaagi sa inyong panggawi,+ 2 kay saksi sila sa inyong putling panggawi+ ug lawom nga pagtahod. 3 Ang inyong pagpatahom dili angayng panggawas lang​—⁠ang pagsalapid sa buhok ug ang pagsul-ob ug bulawang mga alahas+ o mahalong mga sinina⁠— 4 kondili sa inyong kasingkasing sab pinaagi sa pagsul-ob ug dili madunot nga sinina, ang kalmado ug lumo nga personalidad+ nga bililhon kaayo sa panan-aw sa Diyos. 5 Kay mao nay gihimo sa balaang mga babaye kaniadto nga milaom sa Diyos; sila nagpatahom sa ilang kaugalingon pinaagi sa pagpasakop sa ilang mga bana, 6 sama nga si Sara nagmasinugtanon kang Abraham, nga nagtawag kaniyag ginoo.+ Ug kamo mahimong iyang mga anak, kon padayon mong mobuhat ug maayo ug dili magpadaog sa kahadlok.+

7 Sa samang paagi, kamong mga bana, padayon sa pagpuyo uban kanila sumala sa kahibalo.* Pasidunggi ang mga babaye+ ingong mas huyang nga sudlanan, kay sama ninyo manununod sab sila+ sa gasa nga kinabuhi, aron dili mababagan ang inyong mga pag-ampo.

8 Sa kataposan, kamong tanan kinahanglang magkahiusa* sa hunahuna+ ug magpakitag simpatiya,* inigsoong pagmahal, kaluoy,+ ug pagkamapainubsanon.+ 9 Ayaw balosig kadaot ang kadaot+ o balosig insulto ang insulto.+ Hinuon, balosi kinig panalangin,+ kay gitawag mo aron inyong panalanginan ang uban, aron kamo sab panalanginan sa Diyos.

10 Kay “kadtong nagmahal sa kinabuhi ug gustong magkinabuhi nga malipayon kinahanglang magbantay sa iyang dila batok sa pagsultig daotan+ ug sa iyang ngabil batok sa pagsultig limbong. 11 Kinahanglang magpalayo siya sa daotan+ ug mobuhat ug maayo;+ kinahanglang tinguhaon niya ang pakigdait ug huptan kini.+ 12 Kay ang mga mata ni Jehova* anaa sa mga matarong, ug ang iyang mga dalunggan mamati sa ilang mga hangyo,+ apan isalikway ni Jehova* ang mga nagbuhat ug daotan.”+

13 Sa pagkatinuod, kinsay mohimog kadaot ninyo kon dasig mo sa paghimog maayo?+ 14 Apan bisan pag mag-antos mo tungod sa pagkamatarong, kamo malipayon.+ Ayaw kahadloki ang ilang gikahadlokan* ug ayawg kabalaka.+ 15 Apan balaana ang Kristo ingong Ginoo diha sa inyong kasingkasing, nga andam kanunay sa pagdepensa atubangan sa tanan nga mangayog katarongan sa inyong paglaom, apan buhata kana nga may kalumo+ ug lawom nga pagtahod.+

16 Mentinaha ang maayong konsensiya,+ aron nga bisag sultihan mog daotan, kadtong mosulti batok kaninyo maulawan+ tungod sa inyong maayong panggawi ingong mga sumusunod sa Kristo.+ 17 Kay mas maayo pang mag-antos tungod sa pagbuhat ug maayo,+ kon itugot kini sa Diyos, kay sa mag-antos tungod sa pagbuhat ug daotan.+ 18 Kay ang Kristo namatay kausa alang sa tanang panahon para sa mga sala,+ usa ka matarong nga tawo alang sa mga dili matarong,+ aron giyahan mo ngadto sa Diyos.+ Siya gipatay ingong tawo*+ ug gibanhaw ingong espiritu.+ 19 Ug niini nga kahimtang siya miadto ug miwali sa mga espiritu nga gibilanggo,+ 20 nga kaniadto wala magmasinugtanon dihang ang Diyos mapailobong nagpaabot* sa panahon ni Noe,+ samtang gitukod ang arka,+ nga pinaagi niana walo lang ka tawo* ang naluwas latas sa tubig.+

21 Ang bawtismo, nga maoy katumbas niini, nagaluwas sab kaninyo karon (dili pinaagi sa pagkuha sa kahugawan sa unod, kondili pinaagi sa paghangyo sa Diyos ug maayong konsensiya),+ pinaagi sa pagkabanhaw ni Jesu-Kristo. 22 Siya naa sa tuong kamot sa Diyos,+ kay miadto siya sa langit, ug gipasakop kaniya ang mga anghel, mga awtoridad, ug mga gahom.+

4 Kay ang Kristo nag-antos man dihang tawo pa siya,+ andama sab ang inyong kaugalingon nga magbaton sa samang panghunahuna;* kay ang tawong nag-antos mihunong na sa pagpakasala,+ 2 aron sa nahibilin niyang panahon ingong tawo siya magkinabuhi, dili na para sa mga tinguha sa mga tawo,+ kondili para sa kabubut-on sa Diyos.+ 3 Kay igo na tong panahon nga inyong gibuhat ang kabubut-on sa mga nasod+ dihang nagpadayon mo sa walay kaulaw nga paggawi,* sa pagtinguha kon unsay daotan, sa pagpalabig inom, sa banha ug way pugong nga paglipaylipay,* sa pagpalabwanayg inom, ug sa dulumtanang mga idolatriya.+ 4 Natingala sila kay wala na mo makig-uban nila sa daotang pagkinabuhi, busa nagsulti silag daotan batok kaninyo.+ 5 Apan kining mga tawhana manubag kaniya nga andam sa paghukom sa mga buhi ug sa mga patay.+ 6 Gani, kini ang hinungdan nga ang maayong balita gipahayag sab ngadto sa mga patay,+ aron nga bisag gihukman sila base sa kon unsay makita sumala sa panglantaw sa tawo, sila mabuhi pinaagi sa paggiya sa espiritu sumala sa panglantaw sa Diyos.

7 Apan ang kataposan sa tanang butang duol na. Busa batoni ang maayong panghunahuna,+ ug alisto* kanunay sa pag-ampo.+ 8 Labaw sa tanan, batoni ang init nga gugma sa usag usa,+ kay ang gugma magtabon sa daghang sala.+ 9 Abiabiha ang usag usa nga walay pagbagulbol.+ 10 Sumala sa nadawat nga gasa sa matag usa, gamita kini sa pag-alagad sa usag usa ingong maayong mga piniyalan sa dili hitupngang pagkamaayo* sa Diyos, nga gipakita sa lainlaing paagi.+ 11 Kon ang usa maayong manulti, mosulti siya nga samag mga pahayag kini sa Diyos; kon ang usa moalagad, kinahanglang mosalig siya sa kusog nga ginahatag sa Diyos;+ aron nga sa tanang butang ang Diyos mahimaya+ pinaagi ni Jesu-Kristo. Ang himaya ug ang gahom iya hangtod sa kahangtoran. Amen.

12 Minahal nga mga igsoon, ayaw mog katingala sa nagdilaab nga mga pagsulay nga inyong naagoman,+ nga mora bag naay katingalahang nahitabo kaninyo. 13 Apan padayon mo sa paglipay+ kay nakaambit mo sa mga pag-antos sa Kristo,+ aron kamo sab maglipay ug magsadya pag-ayo dihang ipadayag ang iyang himaya.+ 14 Kon kamo ginapakaulawan* tungod sa ngalan sa Kristo, malipayon mo,+ kay ang espiritu sa himaya, oo, ang espiritu sa Diyos, naa kaninyo.

15 Hinuon, ayaw tugoti nga naa ninyoy mag-antos ingong mamumuno o kawatan o mamumuhat ug daotan o hilabtanon sa kinabuhi sa uban.+ 16 Apan kon ang usa nag-antos ingong Kristohanon, dili siya angayng maulaw,+ hinuon padayon niyang himayaon ang Diyos samtang nagdala niining ngalana. 17 Kay kini ang gitakdang panahon nga ang paghukom magsugod sa balay sa Diyos.+ Busa kon kini magsugod kanato,+ unsa may dangatan niadtong dili masinugtanon sa maayong balita sa Diyos?+ 18 “Ug kon ang tawong matarong lisod man ganing maluwas, unsa pa kaha ang tawong dili diyosnon ug ang makasasala?”+ 19 Busa kadtong nag-antos tungod sa paghimo sa kabubut-on sa Diyos kinahanglang padayong magtugyan sa ilang kaugalingon sa kasaligang Maglalalang samtang sila nagbuhat ug maayo.+

5 Busa ingong ansiyano sab, nga nakasaksi sa mga pag-antos sa Kristo ug mag-aambit sa himaya nga ipadayag+ unya, kini ang akong hangyo* sa mga ansiyano diha kaninyo: 2 Bantayi ang panon sa Diyos+ nga gipaatiman kaninyo, nga mag-alagad ingong mga tigdumala,* nga dili pinugos, kondili kinabubut-on atubangan sa Diyos;+ dili tungod sa tinguha nga mamentaha,+ kondili kinasingkasing; 3 dili magharihari sa mga gipanag-iya sa Diyos,+ kondili mga ehemplo sa panon.+ 4 Ug dihang madayag na ang pangulong magbalantay,+ madawat ninyo ang dili malawos nga korona sa himaya.+

5 Sa samang paagi, kamong mga batan-ong lalaki, pasakop mo sa tigulang nga mga lalaki.*+ Apan kamong tanan magpaubos* sa usag usa, tungod kay ang Diyos batok sa mga mapahitas-on, apan pakitaan niyag dili hitupngang pagkamaayo* ang mga mapainubsanon.+

6 Busa paubos mo ilalom sa gamhanang kamot sa Diyos, aron bayawon mo niya sa gitakdang panahon,+ 7 samtang inyong itugyan kaniya ang tanan ninyong kabalaka,+ kay gimahal mo niya.+ 8 Hupti ang maayong panghunahuna, magmabinantayon!+ Ang inyong kaaway, ang Yawa, naglibotlibot nga samag leyon nga nagngulob, nga nangitag matukob.*+ 9 Apan barog mo batok kaniya,+ lig-on sa pagtuo, kay nahibalo mo nga ang inyong mga igsoon sa tibuok kalibotan nakasinati sab sa samang mga pag-antos.+ 10 Apan human mo mag-antos sa makadiyot, ang Diyos nga dili hitupngan ang pagkamaayo, nga nagtawag kaninyo sa iyang walay kataposang himaya+ tungod sa inyong pagkanahiusa sa Kristo, magtapos mismo sa inyong pagbansay. Palig-onon mo niya,+ hatagan mo niyag kusog,+ ibutang mo niya sa lig-ong pundasyon. 11 Ang gahom iya hangtod sa hangtod. Amen.

12 Pinaagi kang Silvano,*+ nga giisip nakong matinumanong igsoon, akong gisulat kining mubong sulat aron dasigon mo ug pasaligan nga ang Diyos naghatag gayod kaninyo sa iyang dili hitupngang pagkamaayo. Barog mong lig-on niini. 13 Ang babaye* nga nia sa Babilonya, nga pinili sama ninyo, nangomosta kaninyo, apil sab si Marcos+ nga giisip nakong anak. 14 Komostaha ang usag usa uban ang halok sa gugma.

Hinaot nga kamong tanan nga nahiusa sa Kristo may kalinaw.